بھارت وچ ودھدی انتہا پسندی تے اقلیتی خواتین دے حقوق

عالمی تے بین الاقوامی سطح اتے صرف تے صرف مفادات دے تحت ایہہ فیصلے ہوندے نیں
کہ کسے ملک دے نال دوستانہ تعلقات رکھنے آں یا اوہدے نال معاملات وگاڑنے آں

شاہد حسین

عالمی تے بین الاقوامی سطح اتے صرف تے صرف مفادات دے تحت ایہہ فیصلے ہوندے نیں کہ کسے ملک دے نال دوستانہ تعلقات رکھنے آں یا اوہدے نال معاملات وگاڑنے آں۔ تے عموماً معاملات نوں اینا کدی وی نہیں وگاڑیا جاندا کہ لوڑ پین تے ہتھ نہ ملایا جا سکے۔ ایس سطح اتے مفادات دے تحفظ یا عدم تحفظ نوں جانچن دا سب توں وڈا پیمانہ اے کہ کسے ملک نال معاشی مفادات کس حد تک جڑے نیں تے ایہدے توں طویل مدتی تناظر وچ معاشی استحکام لئی کنا فیدہ پہنچ سکدا اے۔ ایہو وجہ اے کہ دنیا دے بہت سارے ملک تے کئی بین الاقوامی تے عالمی ادارے بھارت دے خلاف اقلیتاں دے نال ہون والی بدسلوکی توں لے کے یورینیم دی سمگلنگ دے واقعات تک دے واضح ثبوتاں تے شواہد دی موجودگی دے باوجود اوہدے خلاف کوئی ٹھوس کارروائی نہیں کردے کیوں جے سوا ارب توں ودھ آبادی دا ایہہ ملک اک بہت وڈی منڈی اے جہنوں کوئی وی اپنے ہتھ توں گنوانا نہیں چاہندا۔ بھارت صرف عام شیواں دا ای خریدار نہیں بلکہ اوہ وڈے وڈے ملکاں دے اسلحے‘ بارود تے ٹیکنالوجی دا وی اہم گاہک سمجھیا جاندا اے۔
ایہہ حقیقت ہن کسے کولوں لکی چھپی نہیں کہ بھارت وچ جدوں توں نریندر مودی وزیراعظم بنے نیں اوہدوں توں ہندو انتہا پسندی نوں اک نویں شکل ملی اے۔ بھارتیہ جنتا پارٹی (بی جے پی) دے وابستگان تے اوہناں دے حامی ملک بھر وچ جتھے تے جیویں جی چاہندا اے بالعموم ساری اقلیتاں تے بالخصوص مسلماناں دے خلاف ہر طرح دی کارروائیاں کسے خوف و خطر دے بغیر کردے وکھائی دیندے نیں۔ کئی واقعات توں ایہہ گل ثابت ہو چکی اے کہ ایس سلسلے وچ پلس تے انتظامیہ وی شرپسنداں دا ساتھ دیندی اے تے حد ایہہ اے کہ انج دے لوکاں نوں عدالتاں کولوں وی ریلیف مل جاندا اے۔ ایہہ صورتحال نہایت تکلیف دہ تے افسوسناک اے۔ عالمی اداریاں تے بین الاقوامی برادری نوں ایس حوالے نال بہت سارے ثبوت تے شواہد مل چکے نیں جہناں دی بنیاد اتے کئی واری مذمتی بیان تے جاری ہوندے نیں لیکن گل زبانی جمع خرچ توں اگے کدی نہیں ودھدی۔ ایہو وجہ اے کہ انتہا پسند عناصر دی تخریب کاریاں دا سلسلہ تھمن دی بجائے ودھدا ای چلا جا رہیا اے تے تعلیمی اداریاں‘ عبادتگاہواں‘سڑکاں‘ گلی محلیاں تے گھراں سنے کوئی وی جگہ ایہناں عناصر دے شر توں محفوظ نہیں رہی۔
انج نہیں اے کہ سناتن دھرم یا ہندومت دے سارے پیروکار بی جے پی‘ آر ایس ایس (راشتریہ سیوم سیوک سنگھ) تے انج دی ای دوجی انتہا پسند جماعتاں ‘تنظیماں تے گروہواں دے سیاسی نظریات توں اتفاق کردے نیں یا اوہناں ولوں اقلیتاں دے خلاف کیتے گئے اقدامات وچ اوہناں دا ساتھ دیندے نیں لیکن ایہہ اک تکلیف اوہ حقیقت اے کہ بھارت وچ ایسے لوکاں دی تعداد وچ مسلسل وادھا ہو رہیا اے جہڑے مودی سرکار دے ایما اتے تخریب کاری دی کارروائیاں کر رہے نیں۔ اک ویلے تک ایہناں کارروائیاں دا دائرہ صرف اوہناں علاقیاں تک محدود سی جتھے ایہہ انتہا پسند اکثریت وچ ہوندے سن تے بآسانی کسے اقلیت نال تعلق رکھن والے لوکاں نوں نشانہ بنا سکدے سن لیکن مودی سرکار دی آشیر باد نال اوہناں دی کارروائیاں ملک دے ایسے حصیاں وچ وی پھیل گئیاں نیں جتھے تعداد وچ تے بوہتے نہیں ہوندے لیکن پلس تے انتظامیہ دے تعاون نال اوہناں نوں تخریب کاری وچ سہولت مل جاندی اے۔ ایہہ صورتحال ہور وی بوہتی خطرناک اے کیوں جے ظلم و ستم دا نشانہ بنن والے لوک ہن قنون نافذ کرن والے اداریاں تے حکومت دے سامنے داد فریاد وی نہیں کر سکدے۔
پچھلے سال جولائی دے مہینے وچ ای ایس انتہا پسندی تے بربریت دی اک نویں شکل سامنے آئی۔ 4جولائی 2021 نوں سماجی رابطے دے پلیٹ فارم ٹویٹر اتے سلی ڈیلز (Sulli Deals) دے نام نال اک قبیح سلسلہ شروع کیتا گیا جہدے تحت بیسیاں مسلماناں کڑیاں تے زنانیاں دی تصویراں نشر کرکے اوہناں دی بولی لان دا آکھیا گیا۔ اوہناں وچوں ہر تصویر دے نال Deal of the Dayلکھیا ہویا سی۔ جہناں مسلم زنانیاں تے کڑیاں نوں ایس گھنائونے سلسلے دے ذریعے نشانہ بنایا گیا اوہناں وچ کئی ایسی وی سن جہڑی اپنے اپنے شعبیاں وچ اک نام تے مقام رکھدیاں نیں۔ ایس سلسلے نوں اک پاسے تے مسلماناں دے خلاف نفرت نوں ہوا دین لئی استعمال کیتا تے دوجے پاسے ایہدا مقصد اوہناں مسلم بچیاں تے زنانیاں نوں ڈرا دھمکا کے زندگی دی دوڑ وچ شریک ہون توں روکنا سی جہڑیاں مختلف شعبیاں وچ پیشہ وارانہ بنیاداں اتے خدمات فراہم کر رہیاں سن۔ ایہناں زنانیاں وچوں اک ھنا محسن خان وی سن جہناں نے ہمت کر کے انفارمیشن ٹیکنالوجی ایکٹ دے تحت باقاعدہ مقدمہ کرایا۔ ایس حوالے نال بھارت دے نیشنل کمیشن فار ویمن نے وی تعزیرات ہند دی دفعہ 354 اے دے تحت اک مقدمہ درج کرایا۔
برہان وانی دی شہادت دے دن رفتا ہویا زخم فیر توں پھٹ پیا۔ امریکہ تے بھارت دی انھی محبت ساریاں اتے عیاں ہو چکی اے۔اوہناں دی ایس محبت دی سب توں وڈی وجہ اوہناں دونواں دے سازشی تخریب کار ذہناں دی ہم آہنگی اے۔ اوہناں دے اندر سرایت کرن والا چنگیز خان دا لہو ابل ابل کے ایس دنیا وچ بربریت دی تریخ لکھ رہیا اے۔ مقبوضہ کشمیر وچ درندہ صفت بھارتی فوج مولی گاجر وانگوں مسلماناں نوں وڈ رہی اے۔ یمن‘ عراق تے فلسطین دے اذیت ناک منظر‘ ادھ کٹے انسانی جسم‘ لرزہ خیز سزاواں‘ لاشاں دے مینار‘ معصوم نوخیز بچیاں دے گوشت دے لوتھڑے ۔ اسیں گنوائیے تے کیہ کیہ؟ تے اوہناں دے ظلم دے خلاف اپنی آواز نوں امن دے علبمرداراں تک پہنچائیے تے کس طرح؟ اوہ گونگے بہرے تے انھے ہو چکے نیں۔ سانوں یاد اے کہ نیٹو فورسز دے حملے اتے جدوں ڈرون اتے پابندی لگی تے کنا تلملایا سی امریکہ مگر ایہہ کیویں ممکن اے کہ بھارت تے امریکہ گٹھ جوڑ وچ کارروائیاں ختم ہو جان۔ اوہناں دی تے آواز اتے ظلمت کدے کھول دتے جاندے نیں‘ لاشاں دی لاشاں سٹ دتی جاندیاں نیں۔ اسیں اپنے لوکاں نوں پھڑ کے اوہناں دے حوالے کرن وچ انصاف دا بول بالا کرنے آں جتھے کم نہیں بندااوتھے اسیں اوہناں دے ات گرداں دے خلاف افواج پاکستان نوں اگے کر دینے آں۔ ایہہ گل حقیقت اے کہ اج ساڈا وجود جے قائم اے تے افواج پاکستان دی عظمت تے قربانیاں دے کارن وگرنہ گل صرف سول حکومت دی ہووے تے ایہہ پاکستان دے نال نال اپنی پوری قوم نوں کوڑیاں دے بھائو ویچ دین۔ جدوں توں ساڈی فوج نے آپریشن شروع کیتے اوس ویلے توں وزیرستان دے بیشتر علاقیاں دے نال نال ملک دے دوجے علاقیاں وچ وی امن دی صورتحال بہتر ہوگئی۔ بھارت دی شر پسندیاں دا منہ توڑ جواب دے کے فوج اوہنوں ہراساں کیتے رکھدی اے مگر بھارت جئی لومڑی کدھرے نہ کدھرے اپنی شاطرانہ چالاں نال مسلماناں نوں ظلم دی بھینٹ چڑھاندی رہندی اے۔ بیرون ملک وی ساڈی فوج دی جرات مندی تے جذبہ ایمانی دے چرچے عام نیں۔
ساڈے جری بہادر فوج دے سربراہان اپنے وطن تے عوام نوں بچان لئی اوہناں نوں پرامن زندگی گزارن دا احساس دین دا کوئی دقیقہ فروگزاشت نہیں کردی۔ ساڈی حکومت کیہ کر رہی اے؟ برہان وانی توں پہلاں تے اوہدے مگرون جہنے وی ظلم نامے لکھے گئے اوہناں دی اک ای پکار سی کہ کشمیر بنے گا پاکستان۔ اوہناں دے کول تے پاکستان دی قومیت وی نہیں اے مگر اوہ تڑپ رہے نیں پاکستان لئی مگر اسیں کنے بدقسمت آں کہ اسیں اپنے وطن دے رکھوالے بنن دے بجائے اوہنوں بیوپار کرنے آں۔ اسیں تے اپنے گھر دے بچیاں دی حفاظت نہیں کر سکدے۔ اوہناں سارے حقائق دے پیش نظر زیب نہیں دیندا کہ اسیں مدرسیاں اتے ہون والے ڈرون حملے اتے‘ یمن دی بے کفن لاشاں اتے‘ فلسطین دے بچیاں دی فریاد اتے تے اوہناں دے جسماں توں رسدے ہوئے لہو اتے ماتم کریے۔ سانوں تے پہلاں اپنے ضمیر دا ماتم کرنا چاہیدا اے۔ کیہ اسیں مسلمان کہلان دے لائق آں؟ کیہ معصوم بچے چالاک ہوسکدے نیں جہناں دلاں وچ قرآن محفوظ ہووے تے جہناں دے پر نور چہرے اوہناں دی بے گناہی دا ثبوت دیندے ہون کیہ اوہ ات گرد ہو سکدے نیں۔ کیہ ساڈی معصوم بچیاں جہناں نوں کوئی وی درندہ چیر پھاڑ کے رکھ دیندا اے اوہ کسی ات گردی وچ ملوث سن۔ آزادی دی جنگ مختلف صورتاں وچ ہر جگہ جاری اے۔ ہر علاقے دا حریف امریکہ تے بھارت اے یافیر اوہناں دے ہتھوں وکے ہوئے ساڈے آستیناں دے سپ۔ اسلامی ملکاں دے سربراہان نوں کون دسے کہ آتش فشاں پھٹن توں پہلاں کوئی تدارک کر لئے ورنہ اووی ایہدے لاوے وچ بہہ جان گے۔ جتھے اقوام متحدہ اپنے ایجنڈیاں وچ نکام ہو رہی اے اوتھے دوجے ملک کیہ کارنامہ ہائے انجام دے سکدے نیں۔ بہیمانہ ظلم دے شکار یمن‘ برما‘ فلسطین‘ شام‘ عراق تے کشمیر دے مسلماناں دی پکار کون سنے گا؟عدل دی گھنٹی وجان والے منافق لوکاں دے گریبان اتے ہتھ کون پاوے گا؟ جے انج ہوندا تے اوس دن ہو جاندا جہڑے دن کشمیر نوں متنازعہ بنا دتا گیا۔ جہڑے دن مسلم ملکاں وچ پہلی لاش سٹی گئی۔ جدوں امریکہ نے اسامہ بن لادن اتے ڈرون حملہ کیتا تے جدوں ات گرداں نے معصوم بچیاں دے چیتھڑے اُڈا دتے۔ ایہہ جہڑے انسانی جسماں اتے زخماں دی ملمع کاری اے ایہہ پوری امت مسلمہ دے بدن داغے جا رہے نیں۔ آسیہ اندرابی تے مشعال دی آوازاں کناں وچ گونجدیاں نیں۔اوہناں دی پکار فریاد دا روپ دھار چکی اے کشمیر دی وادیاں توں خشبوئے بغاوت نکل کے کدوں دی دنیا وچ پھیل چکی اے مگر امن دے سنگدل تاجر مذاکرات اتے وی نہیں آندے۔ بندبوہیاں وچ قفل لائے ‘کواڑیاں وچ ہسی ٹھٹھہ کردے تے جام وسبو دی محفلاں سجاندے ایہہ لوک گھراں نوں لوٹ جاندے نیں۔ سیاست دے گندے کھیڈ وچ اک دوجے اتے چکڑ اچھالن والیو ایہہ تماشہ بند کرو تے من حیث القوم اک نواں فیصلہ کرو۔ امت مسلمہ نوں بچائو ایس طرح تسیں وی بچ جائو گے اسیں وی بچ جاواں گے۔ دنیا بھر دے مسلمان جہڑے شب و روز اندوہناک موت دے منہ وچ جان دے خوف نال بلک بلک کے پکار رہے نیں اوہ وی بچ جان گے۔ جے تسیں انج نہیں کردے تے یقینا تسی وی بڑی اذیت ناک موت مرنا اے۔
دلی پلس تے دوجے قنون نافذ کرن والے اداریاں نے چھان بین شروع کیتی تے پتہ چلیا کہ اندور وچ اوم ٹھاکر نامی شخص ایس سلسلے دا ماسٹر مائنڈ اے۔ ایس توں پہلاں کہ پلس اوہدے تک پہنچدی بلی بائی (Bulli Bai) دے نام نال ایس گھنائونے سلسلے دی اگلی کڑی یکم جنوری 2022نوں منظر عام اتے آ گئی جہدے وچ ہور بیسیاں مسلم کڑیاں تے زنانیاں دی تصویراں ایڈٹ کر کے فحش تبصریاں دے نال انٹرنیٹ اتے چڑھا دتی گئیاں تے اک واری فیر ایہناں بچیاں تے زنانیاں دی بولی لان دا آکھیا گیا۔ پلس نے تفتیش دا دائرہ ودھایا تے اوم ٹھاکر نوں گرفتار کر لیتا گیا تے اگلی قسط دے ماسٹر مائنڈ نیرج بشتنوئی نوں گرفتار کر لیتا گیا لیکن جدوں ایہہ مقدمہ عدالت وچ پہنچیا تے اوہناں دونواں نوں ضمانت اتے رہا کر دتا گیا۔ ایہہ پہلا موقع نہیں کہ بھارت دی کسے عدالت ولوں اقلیتاں دے خلاف گھنائونی کارروائیاں وچ ملوث افراد نوں ریلیف فراہم کیتا گیا۔ ایس توں پہلاں وی کئی ایسے واقعات پیش آ چکے نیں جہناں وچ واضح طور تے ایہہ وکھائی دیندا اے کہ عدالتاں انتہا پسنداں نوں تحفظ فراہم کرن تے اقلیتاں دی آواز دبان لئی کم کر رہیاں نیں۔
مسلم بچیاں تے زنانیاں دے خلاف انتہا پسنداں ولوں جہڑے قبیح سلسلے شروع کیتے گئے اوہناں دی گونج بین الاقوامی ذرائع ابلاغ وچ وی سنائی دتی تے عالمی اداریاں تک وی ایہہ آواز پہنچی لیکن ایس حوالے نال وی محض بیانات ای جاری ہوئے تے ایس توں اگے کجھ وی نہیں کیتا گیا۔ ایہہ صورتحال صرف بھارت دے اندر ای اقلیتاں لئی تکلیف تے اذیت دا کارن نہیں اے بلکہ بھارت دے ہمسایہ ملک وی ایس صورتحال توں متاثر ہو رہے نیں۔ دنیا بھر وچ عالمی اداریاں تے بین الاقوامی برادری ولوں ذرا ذرا جئی گل اتے کدی حقوق نسواں دی دہائی دتی جاندی اے تے کدی انسانی حقوق دے نام اتے واویلا کیتا جاندا اے لیکن ایہناں دو واقعیاں دے تناظر وچ ایسے کوئی ٹھوس اقدامات نہیں کیتے گئے جہناں توں پتہ چل سکے کہ عالمی برادری واقعی انسانی تے نسوانی حقوق بارے سنجیدہ اے تے اوہناں نوں جے کوئی حقیقی خطرہ لاحق ہووے تے اوہنوں دور کرن لئی ایسے اقدامات کرن دا ارادہ تے حوصلہ رکھدی اے جہڑا اک صحت مند تے آزاد ماحول دی ضمانت فراہم کر سکے۔