مستقبل دا سیاسی نقشہ

مظہر برلاس

اج کل طرح طرح دیاں گلاں سنن نوں مل رہیاں نیں۔ کوئی کہندا اے الیکشن ہووے گا‘ کوئی کہندا اے نہیں ہووے گا۔ کسے دے نیڑے بلاول بھٹو وزیراعظم بن رہیا اے تے کسے دے نیڑے کوئی ہور۔ کوئی سیٹ ایڈجسٹمنٹ دیاں گلاں کردا اے تے کوئی کہندا اے اسیں سیٹ ایڈجسٹمنٹ نہیں کراں گے۔ کجھ دا دعویٰ اے کہ قاسم دے ابو نوں نہیں آن دتا جاوے گا۔ کجھ دیاں نظراں صدارت تے لگیاں ہوئیاں نیں۔ ایس عجیب و غریب منظر وچ اسیں وی مستقبل دا سیاسی نقشہ پیش کردے نیں۔ پیپلزپارٹی تے ن لیگ وچ اندرونی لڑائی جاری اے۔ ہن ایہدے وچ شدت آ گئی اے کجھ دیہاڑیاں وچ اک دوجے نوں اکھاں وکھائیاں جان گئیاں۔ آزادکشمیر وچ ہون والے اک ضمنی الیکشن نے لڑائی نوں ننگا کر دتا اے۔ ایتھوں پیپلزپارٹی دے ضیاقمر‘ ن لیگ دے مشتاق منہاس تے پی ٹی آئی دے کرنل ضمیر ضمنی الیکشن لڑ رہے سن۔ ایتھے بلاول بھٹو زرداری تے مریم نواز نے وکھرے وکھرے جلسے کیتے۔ پی ٹی آئی دا کوئی جلسہ نہ ہو سکیا کیوں جے پی ٹی آئی زیرعتاب اے۔ مبینہ طور تے مقامی طاقتور نے طاقت دا وزن پیپلزپارٹی دے پلڑے وچ پایا تے ن لیگ پریشان ہو گئی۔ الیکشن توں اک دن پہلاں نوازشریف نے اک اہم طاقتور نوں فون کیتا تے کہیا کہ ایہ کیہ ہو رہیا اے؟ ساڈا امیدوار جتنا چاہیدا اے۔ اوہ طاقتور متحرک ہویا‘ آخری رات پاسہ پرتن دی کوشش کیتی گئی‘ جماعت اسلامی دے اہم رہنما نوں کدھرے لے جایا گیا۔ حلقے دیاں دوجیاں مقبول شخصیات تے وی دباء پایا گیا۔ اجہے وچ پی ٹی آئی دے امیدوار کرنل ضمیر دے بریگیڈیئر بھائی نے دباء قبول نہ کردے ہوئے اپنے ووٹ پیپلزپارٹی دے امیدوار ضیاقمر نوں پوا دتے۔
جدوں ایہ گل اک انتہائی اہم ترین طاقتور شخصیت دے علم وچ لیاندی گئی تے اوہنے کہیا بس جو جتدا اے اوہنوں جتن دیو۔ الیکشن دی شام ن لیگ نے دھاندلی دی آواز بلند کیتی تے فیر دو دن بعد ضیاقمر دے والد سردار قمر زمان نے سب کجھ دس دتا۔ اوہناں دی گل بات وائرل ہو چکی اے۔ پی پی تے ن دی دوجی لڑائی پی سی بی دی چیئرمین شپ تے ہو رہی اے جد کہ تریجی لڑائی روہنگیا مسلماناں دے چار لکھ ووٹاں اُتے اے۔ اک لڑائی منصب صدارت تے وی ہون والی اے۔ اک ہور لڑائی پی ڈی ایم دے اندر ہو رہی اے۔ مولانا رنج وکھائی دیندے نیں۔ پنجاب تے سندھ وچ سیٹ ایڈجسٹمنٹ دے سلسلے وچ کیتے گئے وعدیاں تے عہد شکنی ہو رہی اے۔ اوہناں نال تے صدارت دا وعدہ سی‘ اک صوبے دی وزارت اعلیٰ دا وی‘ پر جدوں توں پرویز خٹک پی ٹی آئی چھڈ کے سرگرم ہوئے نیں تے مولانا نے اہم ترین شخصیات دے سامنے شکویاں دے ڈھیر لا دتے نیں۔ پنجاب وچ الیکٹ ایبلز مضبوط امیدواراں تے لڑائی ہو رہی اے۔ ایہناں وچوں کجھ آصف علی زرداری نے ہتھیا لئے نیں باقی جہانگیر ترین دی بیڑی وچ بہہ گئے نیں پر ایہ بیڑی دریا وچ اتردے ای ہچکولے کھانے شروع ہو گئی اے سگوں بھنور وچ پھس گئی اے۔ ایس بیڑی چوں لوک چھالاں لانا شروع ہو گئے نیں۔ ایس دوران پی ٹی آئی دی ٹٹ بھج دا عمل جاری اے پر ووٹر نہیں ٹُٹ رہیا۔ قاسم دے ابو دے ووٹ پہلے توں ودھ گئے نیں ایس صورتحال نے حکمراناں دیاں نیندراں خراب کر دتیاں نیں۔ کوئی اگست وچ تے کوئی اکتوبر وچ الیکشن دی گل کردا اے۔ کوئی 13 اگست توں دو چار دن پہلے اسمبلی برخاست کر کے تن مہینے لئی الیکشن ٹالنا چاہندا اے کوئی چھ مہینے تے کوئی اک سال مدت ودھان دی گل کردا اے۔ کوئی معاشی ایمرجنسی دیاں گلاں کردا اے پر مستقبل دے سیاسی آئینے وچ ایہ صاف وکھائی دے رہیا اے کہ جے الیکشن ہوئے تے قاسم دا ابو جت جاوے گا۔ پی ٹی آئی دے نوجوان امیدوار وڈے وڈے سیاستداناں نوں ہراواں گے تے جے الیکشن نہ ہوئے تے فیر چھ مہینے ورھے دی گل نہیں‘ ڈھائی تن ورھے لئی تے لوک اقتدار وچ آ جاواں گے کیوں جے موجودہ حکمران معاشی میدان وچ شاندار نتیجے وکھان وچ نکام ثابت ہوئے نیں تے لیان والیاں لئی وی بدنامی دا کارن بنے نیں۔ یاد رہوے کہ کجھ بین الاقوامی ادارے معاشی امداد نوں انتخابات نال مشروط کر رہے نیں۔ حالیہ بجٹ وچ جو اعلانات کیتے گئے نیں ملکی خزانہ اوہناں نوں پورا کرن توں قاصر اے۔ بقول فرحت عباس شاہ
ہر لحظہ سر عام ترا پیچھا کریں گے
ترے ہی کئے کام ترا پیچھا کریں گے
تو مجھ کو ڈراتا تھا تو اب خوف کے سائے
ہر روز صبح و شام ترا پیچھا کریں گے
پچھتاوے ڈسیں گے تجھے تنہائی میں آ کر
اور گلیوں میں الزام ترا پیچھا کریں گے