ساڈاتعلیمی نظام

علم حاصل کرو ماںدی گود توں لے کے گور تک علم حاصل کرو چاہے تہانوں اوہدے لئی چین جانا پووے

محمد افضل طاہر وزیرآبادی

علم حاصل کرو ماںدی گود توں لے کے گور تک علم حاصل کرو چاہے تہانوں اوہدے لئی چین جانا پووے۔ ایہہ قول تے تسیں لوکاں نے بڑی واری سنے ہون گے تے لوک کوشش وی کردے نیں کہ علم سکھیا جاوے تے لوک سکھدے وی نیں تے ہر انسان اتے فرض وی اے کہ اوہ علم حاصل کرے۔ جے کسی قوم دی ترقی دا راز جاننا ہووے تے لوک سب توں پہلاں ایہو ویکھدے نیں کہ اوس قوم وچ تعلیم کنی اے کیوں جے تعلیم دے بغیر کوئی وی قوم ترقی نہیں کرسکدی۔ ایس لئی جے تہانوں دنیا وچ کامیاب زندگی بسر کرنی اے جے تسیں ترقی کرنا چاہندے او تے تہانوں علم حاصل کرنا پووے گا۔ تہانوں ایجوکیٹ ہونا پووے گا۔ دنیا بھر دے سارے ملکاں دی ایہو کوشش ہوندی اے کہ ساڈا تعلیمی نظام بہتر ہووے تے بہت سارے ملکاں وچ تعلیمی نظام بہت بہتر وی اے۔ بہت سارے ملکاں وچ ایجوکیشن بالکل فری اے اوہ لوک تعلیم نوں عام کر رہے نیں تاں جے ہر بندا ایجوکیٹ ہووے۔ کوئی وی کسی دا محتاج نہ ہووے کیوں جے جو وی انسان تعلیم یافتہ ہووے گا اوہ کدی وی کسی دا محتاج نہیں ہو سکدا۔
تے ہن اسیں جے گل کریے اپنے ملک پاکستان دی تے ساڈے ملک وچ تعلیمی نظام جنا بہتر ہونا چاہیدا سی اوہنا بہتر نہیں اے کیوں جے اسیں ایجوکیشن ڈیپارٹمنٹ نوں وی کرپشن تے سفارشی نظام دے سپرد کردتا اے۔ ساڈے تعلیمی سرکاری ادارے مکمل طور تے کرپٹ ہوچکے نیں۔ سرکاری سکول شہراں وچ ہون یا پنڈاں وچ ہر تھاں ای کرپشن نظر آندی اے۔ سب توں پہلی گل تے ایہہ کہ جدوں سرکاری سکولاں وچ ان میرٹ استاداں نوں سفارش تے رشوت دی بنا تے بھرتی کیتا جاندا اے تے فیر اوتھے بالاں دی تعلیم دا کیہ حال ہووے گا فیر اوتھے بچے استاداں دے پرسنل کم ای کرن گے تے صرف کھیڈاں ای ہون گئیاں پڑھائی تے ہو ای نہیں سکدی کیوں جے جہڑا استاد خود کجھ نہیں جاندا اوہ بالاں نوں کیہ پڑھائے گا۔جے بچے پڑھنا وی چاہن تے اوہ پڑھ نہیں سکدے۔ سرکاری سکولاں تے کالجاں وچ استاداں دا رویہ سٹوڈنٹ دے نال تے سٹوڈنٹ دا استاداں دے نال بالکل غیر معیاری اے۔ اوہناں دی آپس دی گل بات توں لگدا ای نہیں کہ ایہہ کسی تعلیمی ادارے دے فرد نیں حالانکہ تعلیمی درسگاہ وچ بالاں نوں سب توں پہلاں ادب سکھایا جاندا اے تے ادب سکھن لئی علم حاصل کیتا جاندا اے تے ساڈے ایتھے سادی گورنمنٹ دی نااہلی دی وجہ نال تے بدقسمتی دی وجہ نال جو جنا علم والا اے اوہ اوہنا ای بدتمیز تے جاہل اے۔ پرائیویٹ تعلیمی اداریاں وچ پڑھائی دا نہیں بلکہ کمائی دا مقابلہ ہوندا اے۔ پرائیویٹ سکولاں تے کالجاں دے مالکاں دی صرف ایہو سوچ اے کہ پیسہ کیویں کمایا جاوے۔ بالاں دے مستقبل دا کیہ ہووے گا اوہدے نال اوہناں نوں کوئی مطلب نہیں۔ پرائیویٹ سکولاں نے صرف پیسہ اکٹھا کرن دے عجیب ڈھنگ بنا لیتے نیں۔ اک سال وچ 50,60واری فضول قسم دے ڈیز منائے جاندے نیں۔ اوہناں دناں وچ پڑھائی تے بالکل نہیں ہوندی بلکہ بالاں نوں مختلف قسم دی شیواں لیان نوں کہیا جاندا اے تے جو نہ لیا سکے اوس بچے نوں پورے سکول دے سامنے بے عزت کیتا جاندا اے۔ مڈل کلاس لوک جے مشکل نال اپنے بالاں نوں کسی پرائیویٹ سکول وچ داخل کروا دین تے مگروں اوہ لوک اوہناں سکولاں دی فضول رسماں وچ پس کے رہ جاندے نیں۔ تعلیمی ادارے اپنا معیار چنگا بناندے نہیں بلکہ چنگا وکھاندے نیں۔جو بچہ امتحان چنگا نہیں کر سکیا اوہنوں وی پورے نمبر دے کے پاس کر دیندے نیں تاں جے ساڈا معیار چنگا دکھے تے ایہہ اوس بچہ دے نال بہت وڈا ظلم اے کیوں جے جہڑا بچہ اپنی قابلیت دے نہیں بلکہ سکول والیاں دی قابلیت نال پاس ہووے گا اوہ فیر اگے جا کے کیہ پڑھ سکے گا تے ہن تے پرائیویٹ سکول والیاں نے ہندووانہ رسومات اپنا لیتیاں نیں۔ ہن ساڈے مسلماناں دے سکولاں تے کالجاں وچ ہولی جئی رسماں ادا کیتی جاندیاں نیں جہڑی کہ ساڈے لئی بہت شرم دی گل اے۔ سکول کالج وچ موبائلاں اتے پابندی ہونی چاہیدی اے مگر ساڈے ایتھے بچے سکول تے کالج وچ دو دو موبائل لے کے جاندے نیں تے اوہناں نوں روکن والا کوئی وی نہیں۔ا یسے طرحاں ساڈے ملک پاکستان دے بچیاں دا مستقبل ساڈے تعلیمی اداریاں نے تباہ کر کے رکھ دتا اے۔ ساڈے سارے سرکاری تے پرائیویٹ اداریاں وچ بھرتی ہون والے ملازماں تے افسراں وچ زیادہ تر ان میرٹ سفارش رشوت تے جعلی ڈگریاں والے نیں ایس لئی جے اسیں چاہنے آں کہ ساڈا ملک پاکستان ترقی کرے تے ساڈے بچیاں دا آن والی نسلاں دا مستقبل بہتر ہووے تے فیر سانوں اپنا تعلیمی نظام بلکہ پورا سسٹم بدلنا ہوویگا۔ اللہ پاک ساڈے حال اتے رحم فرماوے۔ آمین