کرونا داپھیلائو تے حکومتی طرزعمل
تحریر حمیداللہ بھٹی
انسانی جان توں ودھ معیشت اہم نیہں پر ساڈے ایتھے معیشت نوں انسان جان توں مقدم سمجھ لیا گیا اے جس دے نتیجے وچ کرونا وائرس وڈے پیمانے تے نہ صرف انسانی جاناں نگلن لگیا بلکے متاثرہ لوگاں دی تعداد وچ وی خوفناک وادھا ہوندا جا رہیا اے اج ایہہ حالت ہو گئی اے کہ پاکستان وچ کرونا دے مریض چین توں ودھ ہو گئے نیں پر لگدا اے حکمراناں نوں رتی بھر احساس نہیں عین ممکن اے ایہناں دا خیال ہوئے کہ اپنے ای کیتے فیصلے تبدیل کرن نال عوام وچ غلط تاثر جائے گا جس توں ساکھ متاثر ہو سکتی اے پر کیہ ساکھ انسان جان توں ودھ قیمتی اے؟پہلے وی تے اک توں ودھ وار فیصلے کرن توں بعد وی یوٹرن لیا گیا مزید اک پیر پچھے ہٹن نال کیہ فرق پئے گا تے ساکھ رہ وی کنی گئی اے جیہڑی مزید مجروح ہوئے گی کرونا نوں محدود کرن دی ساری تر حکومتی اقدامات دے نتیجے وچ بہتری نہیں آئی ہن تے ہر پاسے کرونا دا راج وکھائی دیندا اے تے موتاں دی شرح جنوبی ایشیا دے سارے ملکاں توں ودھ ہو گئی اے۔ ایہہ خطرے دی انج دی گھنٹی اے جنہوں ویلے تے نہ سنیا گیا تے ناقابل تلافی نقصان ہو سکدا اے۔ ماہرین دا اندازہ اے کہ وبا دا عروج پندرہ جولائی تیکر رہوے گا پر حکمران گلاں توں اگے ودھن نوں تیار نہیں نہ تے خطرے دا ادراک کیتا جا رہیا اے تے نہ ای ماہرین دیاں گلاں نوں اہمیت دتی جا رہی اے ملک وچ وی انج دے عناصر دی کمی نہیں جواب وی وبا نوں جھٹلان وچ مصروف نیں جے اسیںرویہ نہ بدلیا تے یاد رکھو ایہہ غیر سنجیدگی سانوں لے ڈبے گی۔
چین توں لے کے یورپ تیکر نے لاک ڈائون دے ذریعے وبا تے قابو پایا اے نیوزی لینڈ دا آخری مریض وی صحت یاب ہو کے گھر جا چکیا اے پر اسیں آں کہ پہلے تے بیماری دی سنگینی دا احساس نہ کیتا تے سنجیدہ اقدامات نہ کیتے ایسے دا شاخسانہ اے کہ پاکستان وچ کرونا دا جن بے قابو ہون لگیا اے جویں جویں تشخیص وچ بہتری آ رہی اے نویں مریضاں وچ خوفناک وادھا ویکھن وچ آ رہیا اے ہن تے بیرون ملک توں آن والے مریضاں دی تعداد بوہت گھٹ اے بلکہ اکثریت نوں ایہہ مرض مقامی طور تے لگیا اے ہن وی حکومت تے عوام نادانی چھڈن تے تیار نہیں حکومت نے تے اپنے حصے دا کم وی عوام تے چھڈ دتا اے ایہہ پالیسی کرونا دے پھیلائو وچ بے پناہ وادھے دا کارن بن رہی اے سنگین حالات دے باوجود کوئی اپنے فیصلیاں تے نظر ثانی تے آمادہ نہیں حکومت نے کاروبار لئی ڈھیلے ڈھالے کجھ قواعد و ضوابط بنائے ایہناں تے وی کدھرے عملدرآمد نہیں ہو رہیا جے حکومت بے حسی دا مظاہرہ کر رہی اے تے عوام وی غیر سنجیدگی چھڈن تے تیار نہیں ایسے پاروں کرونا دا عفریت ہر شہر ہر پنڈ تے علاقے وچ پنجے جمان لگیا اے۔
حکومت دی ناقص حکمت عملی نتیجہ اے کہ پاکستان وچ کرونا دے مریض چین توں ودھ ہو گئے نیں مریضاں وچ ہون والے وادھے وچ کدوں کمی آنا شروع ہوئے گی کوئی وی یقین نال کجھ کہن دی پوزیشن وچ نہیں کیوں جے ساڈے ایتھے وبا نوں محدود کرن دی پالیسی بنان وچ کافی دیر کر دتی گئی حکمران شیخ چلی وانگوں سوچدے ہوئے فیر تصور کر لیندے نیں کہ حکومت جو آکھے گی لوگ من وعن عمل کرن گے حالانکے وبا کنٹرول کرن لئی حکومتی فیصلیاں دے نتیجے دے بارے ماہرین آپ تذبذب دا شکار نیں تے فکر مندی دا اظہار کردے نیں تے فیر عام لوگ کیوں کن دھرن گے اصل وچ حکومت جو سوچدی اے اوہ فیصلیاں دی صورت وچ لکھ کے اعلان کرن توں اگے نہیں ودھدی انج دی غیر سنجیدگی تے کوئی سنجیدہ نہیں ہو سکدا حکومت نے کاروبار کھولدے ہوئے کجھ ایس او پیز بنائے پر ایہناں تے عملدرآمد دی کوشش ای نہیں کیتی ٹرانسپورٹ دی اجازت دیندے ہوئے حکومت نے جو کہیا کدھرے وی عمل نہیں ہو رہیا اج جدوں وگاڑ قابو توں باہر ہو گیا اے تے حکومت نوں بڑی مارکیٹاں نوں بند کرن تے طے شدہ ایس او پیز تے عمل کران دا خیال آیا اے زمینی حقائق ایہہ نیں کہ حکومتی رٹ بوہت کمزور اے اسلام آباد وچ وی ہدایات تے بوہت گھٹ عمل ہو رہیا اے۔ ستم ظریفی تے ایہہ اے کہ اک پاسے حکومتی رٹ نہیں مستزادیہ کہ وزرا دی سوچ وی منقسم اے جیہڑا کم دی بجائے اپوزیشن نال لڑنا تے کوسنا ای فرض سمجھ بیٹھے نیں جس نال قومی یکجہتی وی متاثر ہو رہی اے جانے کہڑے کوڑھ مغز مشیر نیں۔
جیہڑے لڑن دے مشورے دیندے نیں تے سوچے سمجھے بنا عمل وی کر لیا جاندا اے تسلیم کہ حکومت دے کول انے وسائل نہیں کہ پورے ملک نوں فوری طور تے صحت دی سہولتاں فراہم کر سکے اج وی ملک وچ سینکڑے انج دے ہسپتال نیں جتھے وینٹی لیٹر نہیں پر احتیاطی تدبیراں تے عملدرآمد کران تے کجھ خرچ نہیں ہوندا بس انتظامیہ نوں متحرک کرنا اے جے انتظامیہ توں کم لین دا سلیقہ وی نہیں تے برسر اقتدار گروہ دی کس شعبے وچ مہارت اے؟ لوگ جاننا چاہندے نیں۔
کرونا دے پھیلائو نے خطرے دی گھنٹی وجا دتی اے ہزاراں شہریاں دے نال سندھ، پنجاب تے کے پی کے توں ممبران اسمبلی مر چکے نیں ایسے لئی لڑن دی بجائے وبا توں بچن ول دھیان دتا جائے پر حکومت دی ترجیحات ویکھ کے خوش فہمی دی گنجائش نہیں حکمران اٹھدے بیٹھدے عوامی مشکلاں دا تذکرہ کردے نیں پر ایہہ مشکلاں ختم یا گھٹ کنج کرنیاں نیں کوئی مناسب لائحہ عمل نظر نہیں آندا حکومتی طرز عمل وچ حکمت و تدبر عنقا اے ایہہ انج ای اے کہ شوگر دے مریض نوں ہر ویلے مٹھا کھوا کے خوش رکھن دی کوشش کیتی جائے یا کسے زخمی نوں دوائیاں کھان تے مرہم پٹی روں روک کے اُچھل کود دے مشورے دتے جان یا فیر سڑک کنارے پئے زخمی نوں ہسپتال اپڑان وچ مدد دین دی بجائے اوتھے آرام سکون نال لیٹے رہن دا مشورہ دتا جائے انج دا اخلاص کسے کوڑھ مغز دا ای ہو سکدا اے۔ کاروبار تے ٹرانسپورٹ دی اجازت دین دے پسِ پردہ کجھ انج دی ای سوچ کار فرما لگدی اے ہن پانی سر توں اُچا ہویا اے تے حکومت نوں وی سختی دا خیال آ گیا اے پر اک سوال تے بن دا اے کہ پہلے جان بوجھ کے غیر سنجیدگی دا مظاہرہ کیتا گیا یا فیر واقعی فہم و فراست دی کمی اے۔
