بھارت صرف طاقت دی زبان سمجھدا اے

لکھت:عتیق انور را جہ

اونج تے انج دیاں بوہت ساریاں خبراں نظراں دے اگوں لنگھدیاں نیں کہ ساڈے وزیراعظم نوں نہ صرف کشمیری مسلماناں دی فکر اے بلکے اوہ بھارتی مسلماناں تے ہون والے تشدد دے واقعیاں نوں لے کے بوہت پریشان رہندے نیں۔ساڈے آرمی چیف دی طرفوں وی کشمیری مسلماناں دے نال اظہار یکجہتی دے بیاناں دا آنا معمول اے۔ تے دنیا دے اگے پاکستانی موقف بیان کرن والے ساڈے وزیر خارجہ شاہ محمود قریشی دی طرفوں وی ہر دن مقبوضہ کشمیر وچ مسلماناں تے ظلم و ستم تے بھارتی حکمراناں نوں بددعاواں دین دا سلسلا چلدا رہندا اے۔ پتہ نہیں مینوں کیوں انج محسوس ہوندا اے کہ محترم جناب شاہ محمود قریشی دی شکل وچ اک انج دا وزیر خارجہ ساڈی حکومت دے سر تھپ دتا گیا اے جیہڑا ہر حال وچ اوہ ای گل کردا اے جیہڑا طاقتور ملکاں دے مفادات دے مطابق ہوئے۔ بھارت نے جدوں کشمیر دی حیثیت تبدیل کیتی تے محترم شاہ محمود نے شروع وچ دس دتا سی کہ پاکستان سرکار ایس مسئلے تے کس طرح دا رویہ اختیار کرے گی۔ چلو چھڈو انج دیاں خبراں تے سانوں صبح و شام پڑھن تے ویکھن نوں ملدے رہندیاں نیں تے پتہ نہیں کدوں تیکر ملدیاں رہن گیاں پر اک انج دی خبر نظراں توں لنگھی کہ نہ صرف دل خوش ہویا بلکے دل وچ ایہہ خیال آیا کہ اسیں صرف نعرے لان دی حد تیکر زندہ قوم رہ گئے آں۔ خبر کجھ انج سی کہ بھارت دے گوانڈھی نیپال نے پہلے تے اپنے اوہ علاقے جنہاں تے بھارت قابض اے ایہناں تے اپنی پارلیمنٹ وچ قانون سازی کیتی تے وی ایہناں علاقیاں نوں نیپال دا علاقہ قرار دے کے ایہناں دی واپسی دا مطالبہ شروع کر دتا فیر کجھ دن بعد ای چھوٹے ملک نیپال دی فوج نے سرحدی خلاف ورزی تے بھارتی فوج دے پندرہ سورماواں نوں گرفتار کر کے سانوں وی دس دتا کہ بھارت دی بزدلی فوج صرف نہتے مسلماناں تے ای ظلم کر سکدی اے۔ نیپال توں پہلے چین دی فوج بھارتی فوج دی چنگی خاصی ٹھکائی کر چکی اے۔ پر حرام اے کہ بھارتی حکومت یا ایہناں دے میڈیا طرفوں چین دے خلاف کسے قسم دے اپریشن دی گل کیتی گئی ہوئے۔ ہمیشہ بھارت پاکستان دے خلاف ای کیوں محاذ کھولن نوں تیار رہندا اے۔ ایس دا جواب اک سیانے نے کجھ انج دتا کہ چین تے نیپالی فوج نے جیڑی بھارتی فوج نوں رگڑ ا لایا اے ایس دی وجہ ایہہ اے کہ ایہناں دونواں ملکاں وچ حکومتاں، مضبوط نیں تے اوتھے دے لوگ بھارتی ہندوواں دے مزاج نوں سمجھدے نیں۔ ایس لئی اوہناں نے اگے ودھ دے بھارتیاں نوں نہ صرف ماریا اے بلکے ایہناں دے کئی فوجی گرفتار وی کر لئے نیں جد کہ پاکستان دے بوہت سارے وزیر ، مشیر انج دے نیں جیہڑے انج دے نیں جیہڑا اک ورھے توں ہر حکومت دے نال جیہڑے نکاں وانگوں چمڑے ہوئے نیں انج محسوس ہوندا اے جویں ایہناں دی کسے نے برین واشنگ کیتی ہوئے ایس لئی ایہہ بھارت دے خلاف کسے فوجی اقدام دی گل تے کہیا بھارت دے خلاف کوئی سخت بیان دین توں وی گھبراندے نیں۔ ہن بھارت سرکار چین تے نیپال نال تے گل بات نال مسئلے حل کرن دی خواہشمند اے جد کہ ساڈے وزیراعظم دا اوہ ٹیلی فون تیکر سننا گوارا نہیں کردا اے۔اسیں ایہہ سمجھنے آں کہ ساڈی فوج بہترین صلاحیتاں دی حامل اے۔ بہادر اے تے پیشہ ور صلاحیتاں نال مالا مال فوج اے۔ ساڈے لوگ اپنی خفیہ ایجنسی دے کارنامیاں دے وی انج انج دے گانے سناندے نیں کہ دل خوش ہو جاندا اے پر یاد رکھو صاحبو! جنگاں فوجاں نہیں بلکے قوماں جتیا کردیاں نیں۔فوج جنی مرضی بہادر ہوئے جدوں ملکی عوام فوج دے شانہ بشانہ کھلوتی نہ ہوئے فوج کامیابی حاصل نہیں کر سکدی۔مشرقی پاکستان وچ ساڈے فوجیاں نے بہادری دے اوہ کارنامے سرانجام دتے کہ دشمن وی ایہناں دا معترف ہویا۔ 65ئ دی پاک بھارت جنگ وچ ساڈی فوج نے اسلحے دی کمی دے باوجود بھارت دے بوہت وڈے علاقے تے قبضہ کر لیا سی۔ کارگل وچ وی ساڈی فوج دا پلڑا بھاری دسیا جاندا اے پر اسیں ویکھیا اے کہ ہر وار ساڈی قیادتاں دے کمزور فیصلیاں نے جتی جنگ دشمن دی جھولی وچ پا دتی۔ ہن چین تے نیپال نال تے بھارت پنگا نہیں لے رہیا پر پاکستانی سرحدی علاقیاں وچ خلاف ورزیاں دا سلسلا رکن دا ناں نہیں لے رہیا تے مقبوضہ کشمیر وچ بدترین انداز وچ بھارتی ریاستی دہشت گردی جاری اے۔ اک خبر دے مطابق بھارتی فوج نے سرچ اپریشن دے بہانے اک ای دن 13گناہ کشمیریاں نوں شہید کر دتا۔ دنیا دی دو درجن توں ودھ انسانی حقوق دی علمبردار تنظیمیاں نے بھارتی وزیر داخلہ امیت شاہ دے ناں اک خط وچ، ایہناں مسلم طلبہ دی فوری طور تے رہائی دا مطالبہ کیتا اے جنہاں نوں حکومت ہند نے انسداد دہشتگردی جہے سیاہ ترین قوانین دے تحت جیلاں وچ قید کر رکھیا اے۔ایس دے بعد یورپی پارلیمنٹ دے 15 ارکان نے یورپی کمیشن نوں کشمیر دی صورتحال تے خط لکھیا اے کہ بھارت جمہوری روایات نوں سبوتاژ کر رہیا اے۔ بھارت اپنے معاشرے وچ ہندو قومیت دی اجارہ داری ودھا رہیا اے۔ صاحبو! بھارت چین تے نیپال دا تے کجھ نہیں کر سکیا پر اپنی مخف منان لئی تے اپنے لوگاں نوں خوش کرن لئی بھارت وچ متعین پاکستانی سفارتی عملے دے کجھ لوگاں نوں ناپسندیدہ قرار دے کے ملک بدری دے احکامات جاری کر دتے۔ ایہناں نوں پتہ اے کہ پاکستانی حکومت نے جواب وچ صلح تے امن دی اآشا دے کجھ بیانات ای دینے نیں۔ تے انج ای ہویا کہ ایس واقعے دے بعد ساڈے وفاقی وزیر اطلاعات سینیٹر شبلی فراز دی طرفوں بیان آ گیا کہ بھارت وچ پاکستانی سفارتی عملے دی گرفتاری تے تشدد بدترین حرکت اے تے بین الاقوامی قوانین دے تحت پاکستانی ہائی کمیشن نوں سفارتی ذمے داریاں توں روکنا قابل مذمت اے۔ ہن اک پاسے بھارت دا جارحانہ رویہ اے تے دوجے پاسے ساڈے وزیراں مشیراں دے پھس پھسے بیان۔ بھارت دے اندرونی حالات نوں سمجھن دی کوشش کرو تے ایہہ صاف نظر آندا اے کہ اوتھے لوگ بوہت پریشان نیں۔ نہ صرف مسلم سکھ بلکے بوہت وڈی تعداد وچ دلت ہندو وی بھارتی حکومت دے فیصلیاں توں بے چین نیں۔ بوہت ساری بھارتی ریاستاں اپنے وکھرے وطن لئی مسلح کوشش کر رہیاں نیں۔ ایس لئی بھارت سرکار اندرونی اپنے حالات تے قابو پان لئی پاکستان دے خلاف ہر صورت محاذ آرائی دی فضا بنائے رکھنا چاہے گی۔ایس لئی ایل او سی تے آئے دن فائرنگ نال نہتے شہریاں دی شہادت، شہریاں دا زخمی ہونا تے املاک دا نقصان معمول بن چکیا اے تے پاکستان ایس تے جارحیت تے صرف احتجاج ریکارڈ کروان تے کجھ بیان دین تے لگیا ہویا اے۔ ساڈی سرکاری جنگ توں بچن دی کوشش کر رہی اے پر تاریخ گواہ اے جنگاں توں بچن نال نہیں بلکے جنگاں دی تیاری کرن تے دشمن نوں للکارن نال گوانڈھی ملک امن دی راہ تے آیا کردے نیں۔ سانوں یاد اے کہ ساڈے وزیراعظم عمران خان نے اقوام متحدہ دی جنرل اسمبلی وچ بھارت دی طرفوں مقبوضہ کشمیر وچ مسلماناں دے نال سلوک تے بوہت سخت تقریر کیتی سی پر بھارت نوں نہ تے عالمی برادری دی طرفوں کسے سخت رد عمل دا سامنا کرنا پیا تے نہ ساڈی دبنگ تقریر نال کشمیریاں تے ظلم کرن توں روک سکی۔ ایہوں وجہ اے کہ ایس دیاں فوجاں اج وی کشمیر وچ زنانیاں دی عزتاں لٹ رہی اے ۔ جواناں نوں تشدد کر کے ماریا جا رہیا اے۔
حالیہ نیپال، چین واقعے نے واضح کر دتا اے کہ بھارتی حکومت، میڈیا تے ایہناں دی فوج صرف اک ای زبان سمجھدے نیں تے اوہ اے طاقت دی زبان۔ ویلا آ گیا اے کہ پاکستانی حکومت بھارت سرکار نوں ایسے دی زبان وچ جواب دین دی کوشش کرے۔ جے کشمیری مسلماناں نال ہمدردی اے جے سرحدی علاقیاں وچ وسن والے اپنے ملک دے معصوم شہریاں دے جان و مال دی فکر اے تے ہر صورت بھارت نوں ایسے دی زبان وچ جواب دینا ہوئے گا۔ اج دی دنیا ایسے نوں حق تے من دی اے جیہڑا اپنی طاقت وکھاوے۔ بھارت ہر طرح دے ظلم و ستم توں بعد وی نہ صرف امریکا تے یورپ بلکے ساڈے عرب ملکاں نوں ساڈے توں زیادہ محبوب اے۔ اسیں صرف ایہو کہندے رہ جاندے آں کہ عالمی برادری نوٹس لوے۔ سفارتی تے عالمی قانون دے منافی رویے تے بھارت دا محاسبہ کرے پر عالمی برادری اقلیتاں خاص طور تے مسلماناں دے نال متعصبانہ رعیے تے پرتشدد اقدامات نال بھارتی بلکل وی نہیں روک رہی انج لگدا اے سارے تماشہ ویکھ رہے نیں۔ پاکستانی حکومت نوں اپنے میڈیا نوں بھارتی دے خلاف مضبوط پلان تیار کر کے دینا ہوئے گا تے فوج نوں بھارت دے خلاف مورچہ بند کر کے بھارت نوں آخری وارننگ دینی اے۔ سانوں پتہ اے کہ ساڈے وزیراعظم اج کل ترک ڈرامہ ارطغرل غازی ویکھ رہے نیں ایس نال ایہناں نوں بخوبی ایہہ نقطہ سمجھ آرہیا ہوئے گا کہ اللہ دی مدد بہادراں دے نال ہوندی اے ۔جذبہ جہاد نال کنج ایوان لرزدے نیں تے نعرہ تکبیر نال کنج دشمن تے مسلم شکر دی ہیبت طاری ہوندی اے ایہناں نوں بخوبی اندازہ ہو رہیا ہوئے گا۔ ہن کوئی ایہناں نوں ایہہ وی دس دیوے کہ بھارت دے اندر داہ توں پندرہ وکھریاں تحریکاں چل رہیاں نیں بس اک تھوڑی جہی ہمت دی گل اے فیر اللہ نے چاہیا تے بھارت دیاں ریاستاں اک اک کر کے ایس توں وکھری ہون لگن گیاں۔