حکومت نوں اپنی حکمرانی توں خطرہ اے !

لکھت:شاہد ندیم احمد

اپوزیشن لکھ اعتراض کرے جنہا مرضی واویلا بجائے عمران خان دے وزیراعظم بنن دے بعد عوام نے سکون دا ساہ لیا سی کہ بار بار آزمائے ہوئواں نال بڑی مشکل نال جان چھٹی اے۔ تحریک انصاف دے اقتدار وچ آن دے بعد عوامی حلقیاں وچ ایہہ گل روز توں زیر بحث رہی کہ ہن لوٹ مار، کرپشن تے خود ساختہ مہنگائی دا خاتمہ ہوئے گا جے کسے طبقے نے انج دے مکروہ عزائم ظاہر کیتے تے فیر ایس دے خلاف فی الفور قانون حرکت وچ آئے گا، پر دو ورھے توں زیادہ عرصہ لنگھن دے باوجود کرپٹ مافیا دے دوالے حقیقی شکنجہ کسا گیا نہ ای خود ساختہ مہنگائی کرن والیاں دا حقیقی محاسبہ ہویا اے۔ حکومت بحران در بحران تے کمیشن بناندی اے، رپورٹ وی شائع کیتی جاندی اے پر سزا و جزا دے عمل دے آڑے مجبوریاں آ جاندیاں نیں۔ حکومتی سارے دعوئواں دے باوجود آٹے چینی دیاں قیمتاں واپس نہیں آئیاں، کھان پین دیاں دی شیواں دیاں قیمتاں وچ مسلسل وادھا ہو رہیا اے پر انتظامیہ چپ کے تماشا ویکھ رہی اے۔ واق نے عوام نوں ریلیف فراہم کرن لئی پٹرولیم مصنوعات دیاں قیمتاں وچ 40 توں 56 فیصد کمی کیتی سی جس تے عوام نے سکھ دا ساہ لیا، پر ایس دے بعد توں پٹرول نایاب اے۔ صوبائی دارالحکومت لہور تے کراچی وچ عوام پٹرول دے حصول لئی گھنٹیاں لمبی لائناں وچ انتظار دے بعد سو روپئے دا پٹرول لین تے مجبور نیں۔ ایس توں صاف ظاہر ہوندا اے کہ موجودہ حکومت اپنے وعدے دے مطابق کرپٹ مافیا تے قابو نہیں پا سکی، ایس دی مین وجہ ساڈی انتظامیہ دی نااہلی تے نالائقی اے۔ حکومت جدوں تیکر ایڈمنسٹریشن نوں بہتر نہیں کرے گی، اودوں تیکر عوام دی دہلیز تیکر حکومتی اقدامات دے ثمرات اپڑانا ناممکن نیں۔
ایس وچ شک نہیں کہ وزیراعظم درد دل رکھدے ہوئے محروم پسماندہ طبقات نوں ہر قیمت ہر ریلیف اپڑانا چاہندے نیں پر کابینہ ارکان تے انتظامیہ ایہناں دا ساتھ نہیں دے رہے ۔ وزیراعظم دے زیر صدارت اجلاس وچ عوامی مفاد دے فیصلیاں تے صرف منظوری کافی نہیں، بلکے ایہناں تے عملدرآمد کرونا وی ضروری اے۔ ایس حوالے نال وزراء دی کارکردگی نہ ہون دے برابر اے حکومتی وزرا اپنی دی کارکردگی نوں بہتر بنان دی بجائے اپوزیشن تے الزام تراشی وچ ویلا ضائع کر رہے نیں۔وزیراعظم بار ہا تنبیہ دے نال وزارت وچ تبدیلیاں وی کر چکے نیں، پر نویں آن والے وزیر وی پرانی ڈگر تے چلن نوں ترجیح دیندے نیں۔ عوام کرونا وبا دی زد وچ ودھدی مہنگائی، بے روز گاری دے ہتھوں پریشان حال اے جد کہ عوام دے منتخب نمائندیاں نوں عوامی مسئائل دے تدارک دی بجائے ذاتی تشہیر دی زیادہ فکر اے۔ مراد سعید، شیخ رشید توں لے کے شہباز گل تے فیا ض الحسن چوہان تیکر ، سارے اپنی وزارت دی کارکردگی نوں بہتر بنان دی بجائے اپوزیشن نوں لتاڑن وچ لگے نیں، حالاں کے موجودہ حکومت نوں اپوزیشن توں نہیں، اپنی حکمرانی توں خطرہ اے۔ حکومت گڈ گورنس نوں بہتر بنان دی بجائے عوام نوں نااہل انتظامیہ تے کرپٹ کاروباری مافیا دے رحم و کرم تے چھڈ رکھیا اے۔
عوام اک پاسے کرونا وبا پاروں مر رہے نیں تے دوجے پاسے ودھدی مہنگائی، بے روز گاری دے ہتھوں خود کشیاں کرن تے مجبور نظر آندے نیں۔ ملک دے دن بدن معاشی حالات خراب ہو رہے نیں، حکومت کدوں تیکر انج ای ہتھ تے ہتھ دھر کے بیٹھی رہے گی، جے حکومت کرپٹ مافیاز دی لٹ مار تے انج ای چپ بیٹھی رہی تے فیر ایس دی رٹ تے سوال اٹھن لگن گے کہ آخر کرپٹ مافیاز دے نال اینی نرمی کیوں کیتی جا رہی اے تے کون کر رہیا اے؟ وزیراعظم عمران خان اک پاسے کمیشن تے کمیشن بنوا کے ماضی دی لٹ مار عوام دے سامنے لیا رہے نیں تے دوجے پاسے لٹ مار کرن والیاں تے چپ سادھ رکھی اے۔ ایس دہری پالیسی نوں عوام ناپسنددگی نال ویکھدے نیں۔ عوام نے ماضی دے کرپٹ حکمراناں توں چھٹکارا حاصل کرن لئی عمران خان دے وعدیاں تے دعویاں دی بنیاد تے موقع دتا سی پر لنگھدے ویلے دے نال عوام اپنے فیصلیاں تے پریشان نظر آن لگے نیں۔ حکومت نوں چاہیدا اے کہ عوام نوں میوس نہ کرے تے کرپٹ مافیا دے دوالے شکنجہ کسن لئی نالائق انتظامیہ نوں متحرک کرے، تاں جے عوام نوں جیہڑی تبدیلی دا خاب وکھایا گیا سی، ایس دی تعبیر مل سکے۔
عوام اج وی تبدیلی دے خواہاں نیں پر ایہہ تبدیلی محض اپوزیشن تے الزام تراشی توں نہیں آ ئے گی۔ ایس لئی وزیراعظم دے نال ایہناں دے وزراء تے مشیراں دی فوج ظفر موجھ نوں وی کارکردگی تے فوکس کرنا ہوئے گا تے کابینہ وچ کیتے گئے فیصلیاں تے عملدرآمد نوں یقینی بنانا ہوئے گا۔ اودھوں حکومت دے عوامی فیصلیاں دے ثمرات عام عوام تیکر اپڑ سکن گے ایہہ کنی عجیب گل اے کہ وفاقی حکومت پٹرولیم مصنوعات دیاں قیمتاں وچ کمی یا پنجاب حکومت کنک دی قیمت مقرر کر کے آپ خریدن دا فیصلہ کردی اے پر ایس دا عام بندے تے کسان نوں کوئی فیدا نہیں ہو رہیا ۔
ایس وچ حکومتی منصوبہ بندی دا فقدان نظر آندا اے، جے حکومت بہتر منصوبہ بندی دے نال فوڈ انسپکٹراں تے پرائس کنٹرول کمیٹیاں نوں متحرک کردی تے لازمی طور تے ایس دے اثرات عام عوام تیکر اپڑنے سن، چوں کے حکومتی احکامات تے عملدرآمد دی ذمے داری انتظامیہ دی ہوندی اے جے اوہ ای کرپٹ عناصر دی سہولت کار بن جائے تے فیر حکومتی مشینری نوں ناکامی توں کوئی نہیں بچا سکدا۔ ایس ویلے ساڈی انتظامیہ نہ جانے کنہاں دے اشاریاں تے حکومتی احکامات نوں نظر انداز کر کے اینوں ناکام بنان تے تلی ہوئی اے۔
تحریک انصاف حکومت نوں اپوزیشن توں نہیں، اپنی حکمرانی توں خطرہ اے، ایس صورت حال وچ وزیراعظم عمران خان نوں اپنے وزراء نوں بیدار کر کے حکومتی مشینری نوں متحرک کرنا ہوئے گا، انتظامیہ وچ سفارشی تعینات آفیسرز توں چھٹکارہ حاصل کر کے میرٹ تے اہلیت دے حامل لوکاں نوں اگے لیانا ہوئے گا۔ وفاقی دے نال جدوں تیکر صوبائی وزراء اعلیٰ مشترکہ اپنے صوبیاں وچ سرکاری مشینری نوں متحرک نہیں کرن گے اودوں تیکر حوصلہ افزا نتیجے نہیں آن گے۔ وزیراعظم عمران خان عوام نال بوہت سارے دعوے تے وعدے کر کے اقتدار وچ آئے سن، دو ورھے توں زیادہ عرصہ لنگھ چکیا اے، عوام امید بھری اکھاں نال حکومت ول ویکھ رہے نیں۔ وزیراعظم دی ذمے داری اے کہ اوہ اپنے وعدے پورے کر کے عوامی اعتماد نوں بحال کرن۔ عوام دے اعتماد دی بحالی ضروری شیواں دی دستیابی تے ایس دیاں قیمتاں وچ کمی نال ای ہوئے گی، حکومت نوں اپنی ساری توانائیاں عوام نوں ریلیف فراہم کرن تے صرف کردے ہوئے اپنی رٹ نوں بحال کرنا ہوئے گا۔ ایس نال ای خوشحالی آئے گی تے عام بندا حکومتی اقدامات توں مطمئن ہو سکے گا۔