بندہ ظرف دا طاہر ٹھیک ہووے کردار نوں داغ نہیں لگدا

رپورٹ:ریاض ارمان

حافظ آباد وچ دل دریا پاکستان رجسٹرڈ دی چھتر چھاویں پنجابی سیوک،پنجابی سپُتر،شہیدِ پنجابی ڈاکٹر طاہر تنہا(سیکرٹری جنرل دل دریا پاک) ہوراں دی پہلی برسی دے موقع اُتے تعزیتی کٹھ دا پربند کیتا گیا۔ شاہ دل شمس تے سیف اللہ باجوہ ہوراں برسی دے اکٹھ دا آہر کیتا۔معروف شاعر آصف جاوید ہوراں اکٹھ دی پردھانی کیتی۔علی احمد گجراتی ہوراں پروگرام دی نقابت دا ذمہ چایا۔اچیچے پروہنیاں وچ سیدمحمود بسمل حافظ آباد، مقصود یاور گجرانوالا، محمد شوکت ڈار قلعہ دیدار سنگھ رانا طارق جاوید حافظ آباد اسد عباس راز گجرات تے مرزا سیف اللہ ساجد کوٹ قاضی ہوراں دے ناں شامل سن۔اس توں وکھ اکٹھ دے مان جوگ شعراء وچ ریاض ارمان،حافظ شفیق شاہد، امتیاز قیس چٹھہ، پروفیسر طاہر محمود ہاشمی، ساجد لطیف،سیف اللہ باجوہ، شاہ دل شمس،حاجی طارق صاحب،ناصر حیات صحرائی، اذان علی حسرت تے زوہیب افضل ہوراں دے ناں شامل سن۔پروگرام دا آہر معروف شاعر شاہ دل شمس ہوراں دے ڈیرے تے حافظ آباد وچ کیتا گیا اس موقع تے شہیدِ پنجابی ڈاکٹر طاہر تنہا ہوراں دی مغفرت تے درجات دی بلندی لئی دعا کیتی گئی۔ مان جوگ شعراء نے منظوم کلام راہیں خراج پیش کیتا۔اس موقع تے اچیچے پروہنیاں ولوں آکھیا گیا کہ ڈاکٹر طاہر تنہا اک فرد نہیں اک تحریک دا ناں سی۔ جنہاں نے حافظ آباد وچ پنجابی زبان تے ادب دی سیوا تے راکھی بڑے جُہد نال کیتی۔ ڈاکٹر طاہر تنہا ہوراں دی شاعری دے کئی پکھاں تے گل بات ہوئی۔ ایہناں دی شاعری نوں اجوکے سمے دی نمائندہ شاعری آکھیا گیا۔ایہناں نے اپنی شاعری راہیں مزدور، مہاتڑ تے مظلوم دی نمائندگی کیتی اے۔ جابر تے ظالم نوں للکر ماری اے۔ اپنے قلم دی نوک راہیں جبر نوں بے نقاب کیتا اے۔خاتم النبیین حضرت محمدؐ و آلِؑ محمدؐ نال مودّت دا وکھالا اِنہاں دی شاعری دا اُگڑواں پکھ سی۔ پنجابی زبان ادب تے رہتل لئی ایہناں دیاں کوششاں تے آہر ہمیشاں یاد رکھے جان گے۔ آپ دل دریاپاکستان رجسٹرڈ دے اک آہری کامے سن۔ انکھ، جی داری، اخلاص، مجمانی، محبت تے سنگتاں دی پالنا ایہناں دی شخصیت دی وڈیائی سی۔پنجابی کامیاں وچ آپ دا نام ہمیش زندہ رہوےگا۔ اللہ کریم آپ دی روح نوں سُرگ وچ تھاں بخشے الہٰی آمین۔