پاکستان وچ زنانیاں دے حق بدلدے رنگ

تحریر : اظہراقبال مغل

زنانیاں دے حقوق دی جدوں وی گل ہوندی اے تے زنانی نوں ہمیشہ توں ای مظلوم تصور کیتا جاندا اے۔ ایس دی وجہ ایہہ اے کہ ارتقا وچ واقعی عورت نوں برابر دے حقوق نہیں دتے گئے پر ایہہ زمانہ جہالت دی گل اے۔ جدوں انسان وچ اینا شعور نہیں سی ایس ویلے عورت نوں برابر دے حقوق حاصل نہیں سن بلکے عورت نوں حقیر جانیا جاندا سی پر ایس غلط روایت اسلام نے ہمیشہ لئی دفن کردے ہوئے عورت نوں معاشرے وچ اوہ مقام دتا جیہڑا کہ کسے وی معاشرے دی عورت نوں حاصل نہیں سی۔ اسلام نے ہر پہلو نوں مدنظر رکھدے ہوئے عورت نوں مرد دے برابر حقوق دتے تے مرد نوں شریعت دی رسی وچ بنھ دتا دونواں وچوں جیہڑا وی ایس رسی نوں توڑے گا ایس لئی اسلام نے سزا مقرر کیتی اے پر اج دورِ حاضر دی خواتین جس حق دی گل کردیاں نیں جس آزادی دی گل کردیاں نیں ایس دا اسلام نال دور دور تیکر کوئی تعلق نہیں، ایہہ نعرہ مغرب توں اُچا ہویا اے تے مغرب نے جیہڑا عورت نوں ایس حق نال نوازیا اے کہ حقوق دیاں دھجیاں اُڑا کے رکھ دتی اے اج دی عورت دے حقوق ویکھ کے تے بوہت ای حیرت ہوندی اے کہ جے اک عورت انج دے حقوق انج دی آزادی چاہندی اے تے ایس توں چنگی غلامی اے۔ کیوں جے جنہاں حقاں دی گل مغرب نے کیتی اے ایس وچ عورت نوں تذلیل کیتا جا رہیا اے جیہڑا کہ بوہت زیادہ غلط اے ۔ دنیا دا کوئی وی مذہب ایس دی اجازت نہیں دیندا جس دا اثر ساڈے معاشرے اُتے ایہہ ہویا اے کہ اک عورت مرد دی عزت کرنا بھُل گئی اے ہر عورت مرد نوں کسے خاطر وچ نہیں لیاندی اج دی عورت بے لگام گھوڑے وانگوں اے ایس دا جو دل چاہندا اے اوہ کردی اے۔ ماں پیو بھین بھرا سب ایس دے لئی اوہ کردار رہے جنہاں دی کوئی خاص اہمیت نہیں رہ گئی جس دی وجہ ایہہ اے کہ اج عورت مغربی کلچر نوں اپناندی جا رہی اے جس دا اثر ہویا کہ کجھ دن پہلے اک واقعہ ویکھن نوں ملیا جنہوں ویکھ کے بوہت ای حیرت ہوئی، ہویا کجھ انج کہ میں کدھروں لنگھ رہیا سی تے کیہ ویکھیا کہ اک تھاں بوہت ساری بھیڑ جمع سی اگے ودھ کے کیہ ویکھیا کہ دو زنانیاں نے اک بندے نوں گریبان توں پھڑیا ہویا اے تے اک نوجوان بندے نوں گندی گندی ماں بھین دیاں گالیاں دے رہیا اے جیہڑا کہ ایہناں زنانیاں دا ای کوئی رشتہ دار سی۔ لوکاں توں پچھن اُتے پتہ چلیا کہ جس صاحب دا گریبان پھڑیا اے عورتاں نے ایہہ ایہناں دے گھر شکایت لے کے آئے کہ ایہناں دے پتر نوں ایہناں دے بالاں نے ماریا اے ایہناں نوں سمجھائو پر ایہہ لوک بالاں نوں سمجھان دے بجائے ایس بندے نال الجھن لگ گئے جس اُتے غصے وچ آ گیا کہ اک تے میرے بال دے نک توں لہو وگ رہیا اے دوجا تسیں لوک میرے نال ای بحث کر رہے او کوئی بندا اے تے گھلو ایس نال گل کیتی جائے۔ ایس اُتے زنانیاں نے ایس نوں آ کے گریبان توں پھڑ لیا تے چھڈ نہیں رہیاں کافی لوک چھڑان دی کوشش کر رہے سن پر اوہ لوک مزید ایس بندے اُتے وگڑ رہے سن۔ اینی دیر وچ پلس آ گئی تے ایہناں زنیاں نے رو رو کے ظلم دی داستان سنانا شروع کردتی کہ ایہہ بندہ گھر وچ وڑ آیا تے ایس نے بوہت گالیاں دتیاں نیں تے ساڈی عزت اُتے وی ہتھ پایا اے جدوں ایس بندے توں پچھیا تے ایس نے دسیا کہ ایہناں دے بال محلے وچ لڑائی کردے نیں ہر اک نال مار کُٹ کردے نیں ایسے طرح ایہناں دے بالاں نے ایس دے بال دے نال کیتا ایس دے نک توں لہو وگ رہیا سی میں شکایت لے کے آیا پر ایہناں لوکاں نے بجائے بالاں نوں سمجھان دے ایہہ ڈرامہ کر دتا۔ پر پلس نے ایس بندے دی اک نہیں سنی تھانے ٹُرن نوں کہیا جدوں ایس نے تھوڑی مزمت کیتی تے فیر ایہہ دسن دی لوڑ نہیں کہ پلس والیاں نے کیہ کیتا تے اینوں تھانے لے گئے۔ محلے دیاں کجھ زنانیاں گلاں کرن لگیاں کہ ایہہ انج ای کردیاں نیں ایہناں زنانیاں وچ شرم حیا مُک گئی اے محلے دا شریف بندا اے جس دی کدی کوئی شکایت نہیں آئی ایہہ سب میڈیا دے اثرات دی وجہ نال اے تے عورت دی آزادی دا جیہڑا نعرہ اُچا ہو رہیا اے ایس دی وجہ نال زنانیاں بے لگام ہو گئیاں نیں۔ ایہہ تے اک واقعہ اے پتہ نہیں کنے ای مرد ہون گے جیہڑے ایس طرح دیاں زنانیاں دا شکار ہون گے ایہناں سارے واقعیاں دے باوجود عورتاں نوں حقوق دلوان دے انج انج دے قانون بن چکے نیں جس وچ زنانی جدوں چاہے جس مرد نوں چاہے جیہڑا مرضی الزام لا دیوے پر بندے لئی کوئی انج دا قانون نہیں زنانی دی شکایت کر سکے جے زنانیاں دی آزادی دا ایہو عالم رہیا تے آن والے وقتاں وچ بادشاہی اک زنانی دی ہوئے گی اوہ جدوں مرضی جس نوں وی چاہے گی جو مرضی کر سکے گی جس دی مثال میرا جسم میری مرضی تے بوہت ساریاں گلاں نیں جیہڑی کہ 2020 وچ ہون والے عورت مارچ وچ ساہمنے آئیاں۔ پاکستان اک اسلامی ملک اے۔ ایس وچ زنانیاں نوں اسلام دے مطابق ای آزادی دتی جائے نہ کہ پاکستان وچ اک زنانی نوں مغربی سوچ دے مطابق آزادی دتی جائے ہر زنانی نوں علم حاصل کرن دی آزادی سیاسی آزادی، اقتصادی آزادی تے لازمی ہونی چاہیدی اے پر ایس طرح دی آزادی ہر گز نہیں ہونی چاہیدی اے کہ اوہ ایس نوں دتی گئی آزادی توں ناجائز فائدہ چکن، پاکستان دا اپنا کلچر اے ایس خطے دی زنانی وچ شرم و حیا مرد دا احترام پایا جاندا سی پر مغرب دے فضول تے گھٹیا قسم دے کھوکھلے نعریاں نے پاکستانی زنانی دی سوچ نوں بدل کے رکھ دتا اے۔
اج دی زنانی بندے نوں نیچا وکھا کے خوش ہوندی اے جس دی اصل وجہ ایہہ وے کہ کجھ لبرل زنانیاں نے ساڈے پاکستانی معاشرے دیاں زنانیاں دی سوچ بدل کے رکھ دتی اے کہ اک زنانی نوں بندے دے برابر حقوق حاصل ہونے چاہیدے نیں پر اوہ ایہہ نہیں جاندی کہ ایہہ حقوق اسلام نے ایہناں زنانیاں نوں چودہ سو سال پہلے ای دے دتے سن۔ زنانی نوں معاشرے وچ اوہ مقام دتا جیہڑا ایس توں پہلے اک زنانی نوں حاصل نہیں سی۔ اسلام نے عورت مرد دونواں لئی اک حد مقرر کر دتی کہ ایس حد وچ رہ کے عورت ہر اوہ کم کر سکدی اے جس دی اسلام اجازت دیندا اے پر مغرب دے کھوکھلے نعریاں نے پاکستانی عورت دا مقام تے وقار ایس قدر ڈیگ دتا اے کہ اوہ اسلامی حداں پار کر کے میرا جسم میری مرضی جہے نعرے لا کے اسلام ولوں طے کردہ ساریاں حداں نوں پار کر چکی اے، زنانی اپنی آزادی دی جنگ ضرور لڑے پر اسلامی حداں نوں پار نہ کرے۔