پلاک دے پربندھ ہیٹھ معروف کہانی کار، شاعر تے کالم نگار امین ملک ہوراں دا ہرکھ اکٹھ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت، پنجاب دے زیر اہتمام معروف افسانہ نگار، ناول نگار، شاعر تے کالم نگار امین ملک دی یاد وچ اک آن لائن تعزیتی ریفرنس دا انعقاد کیتا گیا جس وچ پوری دنیا توں پنجابی زبان دے دانشوراں تے ادیباں نے ایہناں دی شخصیت تے فن دے حوالے نال بھرپور گل بات کیتی۔

تقریب وچ میزبانی دے فرائض سرانجام دیندے ہوئے پلاک دی ڈائریکٹر جنرل ڈاکٹر صغرا صدف نے کہیا کہ امین ملک اک ملنسار، راست گو تے روایات دے امین شخص سن، اوہناں نے ماں بولی لئی گراں قدر خدمات سرانجام دتیاں۔ اوہناں نے کہیا کہ پلاک اپنے پنجابی میگزین ’’ترنجن‘‘ دا اگلا شمارہ ’’امین ملک نمبر‘‘ دے طور تے شائع کرے گا۔ جیہڑا امین ملک دی دی حیات و خدمات اُتے تحقیق کرن والے طلباء لئی مددگار ثابت ہوئے گا۔ امین ملک دی بیوی محترمہ رانی ملک نے منظوم خراج عقیدت پیش کیتا تےا یہناں دی شخصی تے ادبی خدمات، پنجابی زبان لئی ایہناں دی کمٹ منٹ دے بارے وچ تفصیلی گل بات کیتی۔ اوہناں نے کہیا کہ امین ملک اپنی ماں دی وفات اُتے بوہت دکھی سن میں ایہناں نوں کہیا تسیں ایس دکھ دا مداوا ماں نال گلاں کر کے کرو تے ایہہ گلاں مادری زبان وچ کہانیاں دی صورت وچ موجود نیں۔ بھلیکھا اخبار دے سرپرست معروف صحافی و پنجابی دانشور مدثر اقبال بٹ نے کہیا کہ امین ملک دا کہانی لکھن دا اسلوب نہایت ای دلکش تے منفرد سی۔ میں پہلے وی ایہناں دی کئی کتاباں شائع کیتیاں نیں۔

انشاء اللہ آئندہ وی ایہناں دیاں کتاباں شائع کراں گے تے امین ملک دا پیغام اگے ودھان وچ اپنا کردار ادا کراں گے۔مشرقی پنجابی توں معروف شاعر گربھجن گل نے کہیا کہ امین ملک کہانی لکھن وچ لفظاں دا چنائو بوہت خوبصورتی نال کردے سن تے پنجابی زبان دے اندر سنسکرت، عربی تے فارسی لفظاں دے استعمال اُتے پریشانی دا اظہار کردے رہندے سن۔ ایہناں دا لہجہ خالص پنجابی سی ایہناں دی لفظالی توں اج دی نسل نوں آگاہ کرنا ضروری اے۔ اوہناں نے کہیا کہ بھارتی پنجاب وچ لوک امین ملک دیاں کہانیاں، اندازِ بیاں تے لفظالی دے دیوانے نیں۔ اکمل شہزاد گھمن نے کہیا کہ امن ملک نے اپنی کہانیاں دے اندر کوئی وی پہلو تشنہ نہیں رہن دتا ۔ اوہناں نے اوہ واقعہ وی بیان کیتا جدوں اک محفل وچ اوہناں نے امین ملک نوں نثر لکھن دا مشورہ دتا سی تے فیر ایس دے بعد امین ملک نثر ول متوجہ ہوئے تے اوہناں نے خوبصورت کہانیاں لکھیاں۔ معروف دانشور اندر جیت گگنانی نے کہیا کہ ایہناں دے بولن دا انداز اینا خوبصورت ہوندا سی جویں کہانی سنا رہے ہون تے سنن والا ہمہ تن گوش ہو جاندا۔ ایہو رنگ ایہناں دیاں کہانیاں وچ وی وکھائی دیندا۔ کلیان سنگھ کلیان نے کہیا کہ امین ملک نوں جدید مصنفین نال شکوہ سی کہ اوہ اپنی اصل زبان توں ہٹدے جا رہے نیں۔ ڈائریکٹر پلاک محمد عاصم چوہدری نے کہیا کہ امین ملک کہیا کردے سن کہ دھرتی ایہناں دی ماں اے تے ایس لحاظ نال پنجابی ایہناں دی ماں بولی اے جس دی خدمت ایہناں دا اولین فرض اے۔اوہ اک فطری ناول نگار تے افسانہ نگار سن، ایہناں دی تحریراں فطرت تے انسانی حیاتی دے بوہت نیڑے نیں۔ حکیم ارشد شہزاد نے کہیا کہ ایہناں دیاں کہانیاں اینیاں دردناک نیں کہ قاری اپنے جذبات اُتے قابو نہیں رکھ سکدا۔ اوہناں نے شکر گڑھ وچ امین ملک دے قیام دا وی تذکرہ کیتا۔ شہزادہ علی ذوالقرنین نے کہیا کہ گلے شکوویاں دے باوجود امین ملک پنجابیاں نال بے حد محبت کردے سن۔ انج دے لوک مردے نہیں اپنیاں تحریراں وچ ہمیشہ زندہ رہندے نیں۔ ذوالقرنین نے ایہناں اُتے تحقیق کرن والیاں دی حوصلہ افزائی تے امین ملک ایوارڈ دے سلسلے دا اعلان کیتا۔ برطانیہ وچ مقیم امین ملک دے دوست ہریش رائے ڈھانڈہ نے کہیا کہ میں شاعر ادیب نہیں واں پر مینوں پنجابی زبان تے ادب نال خصوصی لگائو اے تے امین ملک دیاں کہانیاں مینوں بوہت پسند نیں۔ خاقان حیدر غازی نے کہیا کہ ایہناں دی تحریر پڑھدے ہوئے انج محسوس ہوندا اے جویں دریا روانی دے نال وگدا ہویا اپنا راہ آپ بنائے جا رہیا ہوئے۔ امین ملک دے بھتیجے ذکاء ملک نے اپنے چاچے نال گہری محبت تے عقیدت دا اظہار کیتا تے کہیا ایہناں دی کہانی پڑھن والے نوں انج لگدا اے جویں اوہ آپ کہانی دا کردار ہوئے۔ معروف کمپیئر ممتاز ملک نے کہیا کہ ایہناں نوں امین ملک لئی سجائی کئی تقریباں وچ کمپیئرنگ دا شرف حاصل ہویا۔ امین ملک دا جانا پنجابی ادب دا بوہت وڈا نقصان اے۔ تقریب دے اختتام اُتے ڈائریکٹر جنرل پلاک ڈاکٹر صغرا صدف نے سارے شرکاء دا شکریہ ادا کیتا تے ایس گل دا وعدہ کیتا کہ پلاک ہر طرح دے حالات وچ پنجابی زبان، فن تے ثقافت دے فروغ لئی اپنا مثبت کردار ادا کردا رہوے گا۔