بھاشا ڈیم قومی لوڑ !
تحریر :شاہد ندیم احمد
پوری دنیا دے ملکاں وچ موجود سیاسی پارٹیاں اپنی ذات دی بجائے ملکی مفاد لئی کم کردیاں نیں، اوتھے اقتدار وچ آن توں بعد عوامی فلاح دے منصوبیاں دی فنڈنگ روکی جاندی اے نہ ای قومی اہمیت دے حامل منصوبیاں نوں التوا وچ پایا جاندا اے جد کہ ساڈے کول ہر آن والی حکومت پہلی حکومت دے چنگے منصوبیاں وچ کیڑے کڈ کے اینوں روک دیندی اے۔ 2006ء وچ پرویز مشرف نے بھاشا ڈیم دا افتتاح کیتا سی، جے ایس ڈیم اُتے اودوں توں سست رفتار نال وی کم جاری رہندا تے اج اسیں پانی دی کمی دا شکار نہ ہوندے، پر پیپلز پارٹی نے اقتدار وچ آن توں بعد بھاشا ڈیم منصوبے اُتے کم بند کر دتا حالاں کے پیپلز پارٹی دے دور حکومت وچ لوڈ شیڈنگ نے عوام دیاں زندگیاں اجیرن بنا رکھیاں سن۔ 2013ء وچ جدوں مسلم لیگ ن اقتدار وچ آئی تے ایس نے وی ڈیم بنان دے بوہت اُچے دعوے کیتے، پر فیر فنڈاں دا رونا رویا گیا، پچھلے وزیراعظم میاں نواز شریف دی نااہلی توں بعد شاہد خاقان عباسی نے اپنی جیب توں ڈیم بنان دا اعلان کیتا پر ایہناں دا نعرہ وی سیاسی شعبدہ بازی تے مذدب دی بڑ توں علاوہ کجھ نہیں سی، انج سیاستداناں نے ملکی مفاد دے ایس قومی منصوبے نوں اپنی غلطیاں تے کوتاہیاں دی وجہ نال التوا وچ پائے رکھیا اے۔
ایہہ حقیقت اے کہ نویں ڈیم تعمیر کیتے بغیر کوئی حکومت عوام نوں سستی بجلی فراہم کر سکدی اے ، نہ ملک نوں توانائی تے پانی دی قلت دے بحراناں توں باہر کڈ سکدی اے ایس حقیقت دا ادراک اکردے ہوئے ای سابق چیف جسٹس سپریم کورٹ میاں ثاقب نثار نے آپ نوٹس لے کے ملک وچ نویں ڈیماں دی تعمیر دا آپ بیڑہ چکیا سی جس لئی اوہناں نے مہمند تے بھاشا ڈیماں دی تعمیر لئی سپریم کورٹ وچ فنڈ وی قائم کیتا جس وچ اندرون تے بیرون ملک توں 12، ارب روپئے توں ودھ رقم جمع ہوئی سی۔ایس توں بعد ڈیماں دی تعمیر دے حوالے نال خاموشی طاری رہی، ہن حکومت نے بھاشا ڈیم دے تعمیری کم دا آغاز کر کے عوام نوں سرپرائز دتا اے۔ جے اسیں بھاشا ڈیم دے نال لوڑ دے دیگر ڈیم خاص طور کالا باغ ڈیم تعمیر کرن وچ وی کامیاب ہو جاندے نیں تے ایس نال نہ صرف اسیں توانائی دے بحران توں باہر نکل آواں گے بلکے ایس نال اسیں اپنے دشمن بھارت دے آبی دہشت گردی دے سازشی منصوبے نوں وی ناکام بنا سکدے نیں۔
سانوں پچھلی دو دہائیاں توں توانائی دے سنگین بحران دا ساہمنا اے تے پانی دی قلت دا مسئلا وی گھمبیر صورتحال پیدا کر رہیا اے۔ ایس تناظر وچ ورھیاں توں مسلسل تاخیر دے شکار دیامر بھاشا ڈیم دی تعمیر دے فوری آغاز دا حکومتی فیصلا بلاشبہ انج دا قدم اے جس وچ مزید لیت و لعل دا ملک متحمل نہیں ہو سکدا سی۔ بھاشا ڈیم وطن عزیز دا سب توں وڈا ڈیم اے تے ایس دا محل وقوع انج دا اے کہ اینوں قدرتی ڈیم کہیا جا رہیا اے ایس منصوبے اُتے مجموعی لاگت دا تخمینہ 14 ارب ڈالر اے تے ایہہ منصوبہ اٹھ ورہے وچ مکمل ہوئے گا۔ بھاشا ڈیم وچ 81 لکھ ایکڑ فٹ پانی ذخیرہ کیتا جائے گا جس نال 12 لکھ 30 ہزار ایکڑ زمین سیراب ہو سکے گی۔ ایس توں علاوہ ساڑھے چار ہزار میگاواٹ بجلی پیدا کرن دی صلاحیت ہوئے گی۔ ایس ڈیم دی تعمیر نال نہ صرف پانی دی ضرورت پوری ہوئے گی بلکے ہر ورھے مون سون دے موسم وچ آن والے سیلاب توں وی بچیا جا سکے گا انج نہ صرف ملک وچ خوشحالی آئے گی بلکے عوام دا معیار زندگی وی بہتر ہوئے گا۔
عمران خان نے آرمی چیف جنرل قمر جاوید باجوہ، وفاقی وزرا تے دیگر اہم عہدیداراں دے نال دیا مر بھاشا ڈیم دے تعمیراتی کم دا باقاعدہ افتتاح کردے ہوئے ٹھیک نشاندہی کیتی اے کہ اوہ ای قوماں ترقی کردیاں نیں جیہڑی اگے ودھن دی باقاعدہ منصوبہ بندی کردیاں، مشکل فیصلے کردیاں تے انسانی وسائل دی ترقی اُتے سرمایہ کاری کردیاں نیں اوہناں نے منصوبہ بندی وچ دور اندیشی دی اہمیت اجاگر کردے ہوئے دوست ملک چین دی مثال دتی کہ جس نے 30 سالہ منصوبے بنائے نیں جد کہ ساڈے کول منصوبہ سازی دا فقدان اے چین دے کول 5 ہزار وڈے ڈیم تے سارے ڈیماں دی تعداد 80 ہزار اے ایس دے مقابلے وچ ساڈے کول صرف دو ڈیم نیں، تیجا وڈا ڈیم ہن بنن جا رہیا اے۔ ایس توں اندازہ لایا جا سکدا اے کہ اسیں کنی وڈی تاریخی غلطیاں کیتیاں نیں۔وزیراعظم دا کہنا اپنے تہی ٹھیک اے پر ساڈے کول منصوبہ سازی نہ ہون دی اک وجہ حکومتاں دا غیر مستحکم ہونا وی رہیا اے ایتھے کسے حکومت نوں ایس گل دا یقین ای نہیں ہوندا کہ اوہ کنا عرصہ چلے گی، دوجا پچھلی حکومتاں دی ترجیحات قومی منصوبیاں دی بجائے انج دے منصوبے رہے جیہڑے ایہناں دے ووٹ دلوا سکن، ایسے لئی وڈے شہراں وچ سڑکاں، پلاں دی تعمیر دے نال بس تے ٹرین پروجیکٹ نوں اہمیت دتی گئی۔ ایہہ تحریک انصاف حکومت دا بوہت وڈا حوصلہ اے کہ ذاتی مفادات دی بجائے پہلی وار قومی مفاد نوں ترجیح دتی جا رہی اے۔ بھاشا ڈیم منصوبے نال عوام بوہت ساری توقعات وابستہ کیتے ہوئے نیں ایس لئی اینوں ہر قسم دے کرپشن تے غیر ذمے داری توں بچان دی لوڑ اے تاں جے زیادہ اعتماد دے نال اگلے منصوبیاں دا وی خیر مقدم ممکن ہو سکے۔
ایس وچ شک نہیں کہ جدوں تحریک انصاف نے اقتدار سنبھالیا تے ایس دے ساہمنے مسئلیاں دے انبار لگے ہوئے سن۔ ملکی تاریخ دا سب توں وڈا کرنٹ اکائونٹ خسارہ 20 ارب ڈالر دا سی۔ ایس توں علاوہ کرپشن لٹ مار تے اقربا پروری دیاں داستاں کسے توں لُکیاں نہیں۔ حکومت نے سب توں پہلے ماضی دا گند صاف کرن دے نال معاشی حالات بہتر بنان ول توجہ دتی تے ہن عوام دی فلاح و بہبود دے منصوبے شروع کرن جا رہی اے۔ ساڈے معاشرے وچ وڈے منصوبیاں دی تکمیل حکومت دے تسلسل نال ای کامیابی نال ہمکنار ہو سکدی اے۔ ایس لئی ہن ماضی دی غلطیاں نوں دہران دی بجائے سانوں مستقبل دے بارے سوچنا ہوئے گا تے جمہوریت نوں مستحکم کر کے قومی تے ملکی مفاد دے منصوبیاں نوں پایہ تکمیل تیکر اپڑانا ہوئے گا۔ اپوزیشن لکھ اپنے آپ نوں بچان تے اقتدار دا حصول ممکن بنان لئی سازشاں کردی رہے، پر سیاسی تے عسکری قیادت نوں مل کے انج دے منصوبے شروع کرنے چاہیدے نیں جیہڑے عوام دے روشن مستقبل دی ضمانت ہون۔ ملک دا سیاستداناں دے غلط فیصلیاں تے آپسی دی لڑائی پاروں بوہت نقصان ہو چکیا، مزید سیاسی رسہ کشی جمہوریت لئی وی خطرہ بن سکدی اے۔ ایس لئی جوڑ توڑ دی سیاست وچ ویلا ضائع کرن دی بجائے بھاشا تے مہمند ڈیم تعمیر کر کے ملک نوں ترقی تے خوشحالی ول ودھائو کیوں جے نویں ڈیماں دی تعمیر ای روشن مستقبل دا حقیقی راہ اے۔
