صوبائی ہم آہنگی وچ پنجاب دا کردار

لکھت:ڈاکٹر صغرا صدف

ستر ورھیاں دے دوران پاکستان دی صوبائی اکائیاں دے وچکار ہم آہنگی دی کوئی سنجیدہ حکومتی کاوش نہیں لبھدی بلکے ویلا لنگھن دے نال نال فاصلے ودھدے رہے، تجارت ہوندی رہی، نعرے لگدے رہے پر عوام دا عوام نال رابطہ قائم نہیں ہو سکیا۔ ایہو وجہ اے کہ ہولی ہولی ساری وڈی سیاسی پارٹیاں صوبیاں تیکر سکڑ کے رہ گئیاں نیں۔ پیپلز پارٹی تے نون لیگ ، جیہڑی کدی عملی طور تے وفاقی جماعتاں سن ہن سندھ تے پنجاب دیاں پارٹیاں بن چکیاں نیں تے دیگر صوبیاں وچ ایہناں نوں برائے نام نمائندگی حاصل اے۔ مرکزی حیثیت لئی ضروری سی کہ دور توں بہہ کے معاملیاں دا جائزہ لین دی بجائے نظر انداز علاقیاں دا دورہ کیتا جائے تے رُسے ہوئے لوکاں دے کول جا کے گلے شکوے سنے جان تے رابطے استوار کیتے جان پر مصروف حکومتاں نوں ایس وڈے مقصد ول ویکھن دی فرصت نہیں ملی۔
وزیر اعلیٰ پنجاب عثمان بزدار دی تعیناتی دے عوامل وچ سب توں وڈی نیک نیتی ایہہ سی کہ اوہ چوں کے بلوچ سردار نیں تے بلوچاں وچ سردار دی خصوصی اہمیت ہوندی اے۔ ایس لئی بلوچستان س دے عوام تے سیاستدان جمہوری تے آمرانہ حکومتاں دے غلط روایاں دی وجہ نال کافی دل برداشتہ ہو چکے سن۔ دیگر صوبیاں خاص طور تے پنجاب توں ایہناں نوں بے پناہ شکایتاں سن کیوں جے مختلف اداریاں وچ بیورو کریسی وچ پنجاب دی اکثریت ہوندی اے ایس لئی اوہ سارے مسئلیاں دی ذمے دار پنجاب دی اشرافیہ نوں قرار دیندے نیں۔ ایس نفرت، دوری تے بے گانگی نوں ختم کرن لئی بلوچ وزیراعلیٰ دا تقرر دور اندیشی اُتے مبنی سی۔ جس دا واضح طور تے مثبت اثر ہویا۔ میرے کئی بلوچ ادیب و شاعر، فنکار دوست جیہڑے پہلے پنجاب دے بارے وچ ناپسندیدگی دا اظہار کردے سن۔ عثمان بزدار دے آن توں بعد ایہناں دا رویہ تبدیل ہو گیا ایہناں نوں پنجابی قوم دی ایہہ ادا وی پسند آئی کہ اکثریت وچ ہون دے باوجود پنجاب دے لوکاں نے وفاقی حکومت دے مقرر کردہ وزیراعلیٰ نوں قبول کیتا ۔ کدی ایہناں دے خلاف کوئی جلوس کڈیا نہ ایہناں نوں بلوچ ہون دی وجہ نال ہٹان دا مطالبہ کیتا۔ ایہہ خاموش پیغام محبت دیر پا اثر دا حامل اے۔پنجاب جے بندیاں دی وجہ توں وڈا صوبہ اے تے بلوچستان رقبے دے حوالے نال عظیم اے۔ وزیراعلیٰ دونواں وڈے صوبیاں دے وچکار ٹٹے ہوئے رابطے دا جوڑ ثابت ہو رہے نیں۔ ایہناں دی دعوت اُتے وزیراعلیٰ بلوچستان نے پچھلے ورہے ستمبر وچ لہور دا دو روزہ دورہ کیتا جس وچ اوہناں نے مختلف سیاسی شخصیات نال ملاقات کیتی۔بلوچستان صوبائی حکومت دے مختلف محکمیاں دے وزیراں توں علاوہ بلوچستان نیشنل پارٹی دے سربراہ سردار اختر مینگل دا اپنے ساتھیاں دے نال بزدار حکومت نوں شرفِ میزبانی بخشیا بوہت خوش آئند سی۔ مطلب ایہہ کہ صرف حکومت نہیں بلکہ بلوچستان دی ساری سیاسی جماعتاں، تنظیماں، طلبا تے عوام لئی عثمان بزدار نے پنجاب دے بوہے کھول کے بھروسے تے اعتماد دی اک نویں کہانی دا آغاز کیتا اے۔ اعتماد دی بحالی دا ایہہ سلسلہ جاری اے۔ پچھلے ورہے جولائی وچ دورہ کوئٹہ دے دوران وزیراعلیٰ پنجاب نے گورنر بلوچستان امان اللہ خاں یاسین زئی تے وزیر صحت نصیب اللہ مری نال ملاقات کیتی ایس ورہے جنوری وچ تربت دا دورہ کیتا تے وزیراعلیٰ جام کمال دی ہمراہی وچ میرانی ڈیم، گوادر تے دیگر علاقہ جات دے دوریاں دے دوران حکومتی ارکان تے عوام دی طرفوں بے پناہ محبت دا مظاہرہ ایس گل دا شاہد سی کہ محبت تے عزت دا ایہہ سلسلا یک طرفہ نہیں بلکے وزیر اعلیٰ پنجاب دی خلوص نیت تے دل نال کیتی جان والی ہم آہنگی دیاں کوششاں نے بلوچستان دے لوکاں دے دلاں تیکر رسائی حاصل کیتی تے اوہ فاصلے مٹدے جا رہے نیں جیہڑی نظر نہیں آندے پر کئی ورھیاں توں خطرناک حد تیکر ودھدے جا رہے سن تے جنہاں دی روک تھام اُتے کسے دی نظر نہیں سی۔
پاکستان رنگا رنگ ثقافتاں دا ملک اے۔ فنکار بے لوث تے درویش لوک ہوندے نیں۔ ایہہ فن دے ذریعے خیر دا پیغام ودھاندے نیں تے لوکاں نوں اک مرکز اُتے جمع کردے نیں۔ محخمہ اطلاعات و ثقافت پنجاب دے زیر سایہ کم کرن والے سارے اداریاں نے پچھلے دو ورھیاں دے دوران سارے صوبیاں دے فنکاراں نوں لہور وچ دعوت دتی جتھے اہل لہور دی کثیر تعداد نے ایہناں رنگا رنگ سرگرمیاں وچ شرکت کر کے فنکاراں نوں خراج تحسین پیش کیتا تے باہمی روابطیاں نوں مضبوط کیتا ۔شنید اے کہ کجھ انج دے اقدامات زیر غور نیں جیہڑے مستقبل وچ وڈے نتیجے دے حامل ہون گے۔ تونسہ توں لورالائی دور ایہہ سڑک دی تعمیر معاشی ترقی دے نویں امکانات دا آغا ز ثابت ہوئے گی۔ ڈیرہ غازی خاں وچ رودکوہی توں متاثرہ علاقیاں وچ مرحلہ وار 13نکے ڈیم بنائے جان گے جنہاں نال نہ صرف کوہ سلیمان دے رہن والے فائدہ مند ہون گے بلکے بلوچستان دے سرحدی علاقیاں دے رہن والے وی فائدہ چک سکن گے۔ کوہ سلیمان دے سرحدی علاقیاں توں بلوچستان دے مریضاں دی ڈیرہ غازی خان منتقلی لئی ریسکیو 1122 شروع کیتی جائے گی۔ ایس توں علاوہ دونواں صوبیاں نوں ملان والے علاقیاں دے نیڑے کئی منصوبے شروع کیتے جا رہے نیں۔ جنہاں دے دورس نتیجے برآمد ہون گے۔ بلوچستان تے پنجاب دے وچکار غلط فہمیاں دے ازالے دا مقصد ریاست دے استحکام دے مترادف اے جس وچ عثمان بزدار دیاں کوششاں یقینا قابل تحسین نیں ۔ پنجاب ایثار تے محبتاں دی زمین اے۔ کجھ لوکاں نے ایس دا تاثر معدوم کر کے پورے پنجاب نوں کٹہرے وچ کھڑا کر رکھیا اے لوکاں نوں درست تصویر وکھان دی لوڑ سی جس دا آغاز ہو چکیا۔