”مڑکے کرداپھراں ٹکور“

لکھت:ایثار رانا

لو جی کپتان اک وار فیر چن لیا ”میں نے تمہیں سارا جہاں رہنے دیا، گاندے آئے تے ، میں تے میرا دلبر جانی “ گاندے واپس ٹُر گئے تے انج شیروانیاں سلوان والیاں دے دل دے ارماناں ہنجو ہوکاں وچ وگ گئے تے ایہناں دے حق وچ تبصرے تجزیے کرن والے وفا کر کے وی کلے رہ گئے اسیں تے اک سدھا جہیا فارمولا جان دے آں کہ دلہن اوہ ای جیہڑی پیامن بھائے تے ماشاء اللہ عثمان بزدار دے پیا جے رنگون وی گئے ہون تے اوتھوں فون ضرور کردے نیں۔ چندا میرے تہانوں دن وچ خاب ویکھن دی عادت ہو گئی اے۔ بھلا عثمان بزدار دا قصور کیہ اے؟ ماڑا بندہ ہوئے تے ہر کوئی ایس اُتے ہتھ صاف کرن دی کوشش کردا اے پر میں کہہ دینا واں بزدار اینے وی ماڑے نہیں جنہا تسیں ایہناں نوں سمجھدے او۔ جدوں ایہناں دے پیا وگدے کوتوال نیں تے ایہناں نوں ڈرن دی لوڑ نہیں۔ ہاں ایہہ ضرور اے کہ تسیں ایویں لوکاں نوں بلا کے کہو کہ شیروانیاں سلوا لوئو اپنے پسند دا چیف سیکرٹری دس دیو، ٹھیک اے اج کل کرن نوں کوئی کم نہیں، تھوڑا وگدا رونق میلا لگیا رہنا چاہیدا اے پر جدوں رہنا بزدار نے اے تے پٹواری دے منڈے وانگوں دوجے امیدواراں نوں دوروں دوروں اکھیاں مارن دی وی کیہ لوڑ۔ سنتا سنگھ منڈے دا رشتہ ویکھن آیا۔
منڈے دا پیو بولیا تسیں بے شک منڈے دے کریکٹر دی انکوائری کرا لوئو، سنتا سنگھ بولیا کوئی ہوڑ نہیں، بس تسی منڈے دے موبائل دا میموری کارڈ مینوں دے دیو۔ بھرا میرے اسیں تے سنتا توں وی گئے گزرے آں۔ سانوں میموری کارڈ منگن دا وی حق نہیں، نہیں تے کراچی دی جے آئی ٹی اُتے ای کھرے کھوتے معاف کرو، کھرے کھوٹے دا فیصلا ہو جاندا۔ خیر کراچی والے بوہت سکھی نیں۔ اک ویلے وچ دو دو سمندراں دا مزا لے رہے نیں تے سندھ وچ بہترین کارکردگی دی دعویٰ دار پیپلز پارٹی سڑکاں اُتے عوام نوں ڈبکیاں لاندے ویکھ کے جئے بھٹو دے نعرے لا رہی اے۔ بیچارے بھٹو صاحب وی سوچدے ہون گے ضیاء الحق نے ایہناں نوں جتے جی ماریا تے پیپلز پارٹی ایہناں نوں روز دفناندی اے۔ گل ہو رہی سی عثمان بزدار دی تے نکل آئی ملیر، گولیمار، شارع فیصل دیاں سڑکاں اُتے، ساڈی سوچ وی بارش دے پانی وانگوں سنبھالے نہیں سنبھل رہی۔ مینوں دسو کہ عثمان بزدار دا قصور کیہ اے۔ کارکردگی؟ تے میری جان دے ٹوٹے جے کارکردگی نوں میرٹ بنائو تے پاکستان وچ قیادت چین یا امریکہ توں امپورٹ کرنی پئے گی۔
بنتا سنگھ پتر نال بولیا کیہ بنیا تیرے امتحان دے رزلٹ دا، اوہ بولیا باپو، ڈاکٹر دا منڈا فیل ہو گیا اے۔ بنتا بولیا تے تو، پتر بولیا تحصیلدار دا پتر وی فیل ہو گیا اے۔ بنتا سنگھ غصے نال بولیا تے اپنی دس، اوہ بولیا میں کیہڑا ڈپٹی کمشنر دا پتر واں، میں وی فیل ہو گیا۔ جان من آٹے چینی گھیو پٹرول لئی ہر حکومت وچ ذلیل ہون والے معزز شہری، وڈے سائیں دا پتر فیل ہو سکدا اے، بلوچستان وچ وڈے بھرا دا لے پالک فیل ہو سکدا اے ۔ کے پی کے وچ چاکلیٹی ہیرو دا من پسند کمپارٹ لے سکدا اے تے پنجاب وچ کیہڑے سرخاب دے پر لگے نیں، ویکھ میرے پیارے جمہوریت دے راج دلارے ایہہ ایلیٹ کلاس دے چونچلے عرف رج کھان دیاں مستیاں نیں۔ ساڈی طرفوں سنتا آئے یا بنتا اسیں دانے وی بھُننے نیں۔
بس تھوڑا انتظار کر لوئو انٹرول دے بعد فلم وچ ٹرننگ پوائنٹ آن والا اے۔ عمران خان وزیراعظم دی دستار توں زیادہ صدارتی ٹوپی وچ پھبن گے۔ تسیں آپ کہو گے میرا ماہی چھیل چھبیلا، میرا یقین اے تسیں بس ایہو جملہ کہو گے ایس توں اگے والا نہیں۔ جمہوریت دی فلم اب آٹ ڈیٹڈ ہو گئی اے۔ 20 کروڑ عوام نوں ہن اک شرطیہ پرنٹ دی لوڑ اے۔ ایہہ فلم نہ صرف ابتدا وچ بالغاں لئی ہوئے گی بلکے اک ٹکٹ وچ دو مزے دیوے گی۔بندہ تھاں تھاں سجدہ کرن دے بجائے اک ای تھاں متھا ٹیک دیوے بہتر اے۔ جمہوریت تھاں تھاں ٹکے ٹکے دے بندیاں نوں سجدہ کرن دا ناں اے۔ سنتا سنگھ نے بیوی نوں فون کیتا۔ بولیا بیگم ٹی وی اُتے آ رہیا اے کہ کوئی پاگل موٹروے اُتے ون وے گڈی چلا رہیا اے تسیں کتھے او۔ اوہ بولی سردار جی تسیں اک پاگل دی گل کردے او ایتھے سارے پاگل سڑک اُتے اگوں ون وے آ رہے نیں۔ بندے وچ اعتماد ہونا چاہیدا اے۔ اینوں اگوں توں ٹھیک آن والا وی ون وے لگے گا۔ تے میرے بھرائو، ایس ون وے نظام دی بہتری لئی صدارتی نظام توں بہتر کجھ نہیں جتھے کلابندہ ون وے آئے وی تے ستے خیراں ہوندیاں نیں۔
بلاول بھٹو زرداری جس شدو مد توں لہور آ کے جاتی عمرہ ول منہ کر کے گا رہے نیں من جامن جا بالم من جا، نہ ٹھکرا میرا پیار، چاہے ایہناں دے لہجے وچ نور جہاں جنی نغمگی ہوئے، نکے بھرانہیں منن گے۔ ایہناں نوں پتہ اے کہ مڑ کے کردا پھراں ٹکور تے فیدہ کیہ۔ ایس لئی بلاول توں لے کے مولانا فضل الرحمن تیکر اپنی چوٹی ایڑی دا زور لا لوئو، شہباز شریف ایہناں دیاں گلاں وچ آن والے نہیں۔ فقیر سنتا سنگھ نال بولیا بابا داہ روپئے دا سوال اے۔ سنتا بولیا ہاں ہاں پچھو ہو سکدا اے مینوں جواب آندا ہوئے پر ایہہ ساڈے خادم اعلیٰ سابق نیں یقین کرو ایہناں نوں سارے سوالاں دے جواب آندے نیں پر اوہ دروٹ دتے بیٹھے رہن گے کیوں جے ایہناں نوں پتہ اے جیہڑا بولے گا ایس دا کنڈہ نیب یا کوئی ہور ای کھولے گا۔