شفافیت دے دعوے تے دہری شہریت شفافیت دے دعویداراں نوں دوہری شہریت دے حوالے نال قوم نوں دلیل نال جواب دینا ہوئے گا
لکھت:حمیداللہ بھٹی
آمریت ہوئے یا جمہوریت، وطنِ عزیز دی ایہہ بدقسمتی اے کہ انج دے لوکاں نوں اہم منصب تفویض کیتے جاندے نیں جنہاں دے کول ملک دی شہریت وی نہیں ہوندی تے ایہہ لوک صرف دہری شہریت ای نہیں رکھدے بلکے ایہناں دے کاروبار، جائیداداں تے خاندان وی ملک توں باہر ہوندے نیں جنہاں دے مفادات ملک توں باہر ہون اوہ ملک دے طرفدار نہں ہو سکدے ظاہر اے ایہہ اغیار دے مفادات دے نگہبانی کردے نیں مسئلیاں دی گرداب وچ پھسے ملک دی ہر جماعت وچ دہری شہریت رکھن والے لوک موجود نیں تے ایہہ موجودگی کابینہ اپڑ گئی اے۔ ایہہ لوک مرضی دا فیصلہ کران اُتے وی قادر نیں کیوں جے دہری شہریت رکھن والے کابینہ وچ طاقتور حیثیت دے حامل نیں ساڈے ملک نے تاں انج دا دور وی ویکھیا اے کہ نواز شریف تے بینظیر بھٹو دی رضا مندی نال بیرون ملک توں معین قریشی جہے بندے نوں بلا کے وزیراعظم دا حلف پہلے لیا جاندا اے تے پاکستانی شناختی کارڈ بعد وچ بن دا اے جیہڑا نگران دور مکمل کردے ای دوبارہ دیارِ غیر وچ جا کے آباد ہو جاندا اے پرویز مشرف وی بغیر سوچے سمجھے شوکت عزیز نوں وزارت عظمیٰ دے دتی جیہڑا اقتدار توں باہر ہوندے ای ملک توں وی باہر ہو گئے تے اج کل سنیا اے عالمی مالیاتی اداریاں دے کول پرانی تنخواہ اُتے کم کر کے خوش نیں حیران کن امیر تاں ایہہ وے کہ اغیار دے طرفداراں دے کول ہن وی اہم تے احساس عہدے نیں شفافیت دے دعویداراں دے آلے دوالے دہری شہریت دے لوک ویکھ کے کوئی وی ایہناں دے دعویاں اُتے یقین کرن نوں آمادہ نہیں جانے کیوں کسے نوں عوام دا اعتماد بحال کرن دا خیال نہیں شفافیت دے دعویاں دی زمینی حقائق نفی کردے نیں پر حکمران مسلسل دیانتداری دا راگ گاندے رہندے نیں ایہہ خود فریبی نہیں تے ہور کیہ اے؟
نواز شریف خاندان تے آصف علی زرداری کنبے دے کول غیر ملکی اقامے ہون اُتے عمران خان نے مسلسل تنقید دے نشتر چلائے تے اپنی ہر تقریر وچ دہراندے کہ جنہاں دا ملک وچ کجھ نہیں جائیداداں تے کاروبار بیرون ملک نیں اوہ ساڈے ملک دے فیصلے کرن دے مجاز نہیں ہن سابق حکمران دونویں خاندان اپوزیشن وچ نیں تے اقتدار عمران خان دے کول اے ہن اوہ دہری شہریت اُتے تنقید کرن دی بجائے دفاع کرن اُتے آ گئے نیں جس اُتے پورا ملک بھونچکا اے خدا لگدی کریے تے لوکاں نوں قیادت دے قول و فعل دا تضاد ہضم نہیں ہو رہیا ممکن اے قیادت نوں وی ایس نکتے دا ادارک ہوئے جے نہیں وی تے ہن ہو جانا چاہیدا اے ، نہیں ہوندا تے کیہڑا انتخاب دور اے ادھی مدت لنگھ چکی اک ڈیڑھ ورہے تیکر انتخابی سرگرمیاں دا آاز ہو جائے گا تے خلقِ خدا ضرور دریافت کرے گی کہ اے صاحب عقل و دانش، جیہڑا دوجی جماعتاں توں سرزد ہوئے تے لائق تنقید، اوہ ای کجھ تسیں کرو تے لائق تحسین کنج ہو جاندا اے؟
پارلیمنٹ دا ممبر بنن لئی لازمی اے کہ غیر ملکی شہریت ہوئے پر موجودہ حکمراناں نے کابینہ دے چنائو وچ کسے اصول، ضابطے یا قاعدے دا خیال نہیں رکھیا حالاں کے ممبر پارلیمنٹ توں زیادہ اختیار کابینہ دے کول ہوندے نیں کابینہ پالیسی بناندی اے تے اک ممبر پارلیمنٹ توں زیادہ حساس معلومات تیکر رسائی رکھدی اے فیر وی پارلیمنٹ دے رُکن جنی احتیاط کابینہ دا رکن بناندے ہوئے نہیں ہو رہی؟ ایہہ غیر دانستگی وچ ہر گز نہیں ہو رہیا فیر اینا تے صاحبان اختیار نال دریافت کرنا بن دا اے کہ جنہاں دا سب کجھ ای بیرون ملک اے اوہ پاکستان دے خیر خواہ کیوں کر تصور کر لئے گئے نیں؟ جنہاں نے شہریت لیندے ہوئے غیر ملک دے مفاد دے تحفظ دا حلف چک رکھیا اے اوہ بھلا کنج وطن عزیز دے مفاد دا تحفظ کرن گے؟کیہ بہتر نہیں کہ غیر ملکاں دی شہریت رکھن والیاں نوں کابینہ توں کڈ دتا جائے تے انج دے لوکاں نوں فیصلہ سازی لئی کابینہ دا حصہ بنایا جائے جنہاں دا مفاد ملک نال جڑیا ہوئے۔ انج ہون نال ای قومی مفاد دی نگہبانی ممکن اے غیراں دے حاشیہ برداراں نوں کیہ پئی اے کہ اوہ مسلیاں دی دلدل وچ کمی لیان لئی محنت مشقت نال کم کرن۔
ملک نوں اندرونی بیرونی خطریاں دا ساہمنا اے جنہاں دا عہدہ برآء ہون لئی ضروری اے کہ سوچ، سمجھ کے تے احتیاط نال فیصلے کیتے جان پر ہو کیہ رہیا اے اہم عہدیاں اُتے امریکہ تے برطانیہ شہری براجمان نیں شفافیت دے دعویداراں دی دہری شہریت رکھن والیاں نال اینی الفت خالی از علت نہیں واقفانِ راز دا کہنا اے کہ سابق دونواں دوراں وچ پاکستان نوں چین دے زیادہ نیڑے کیتا گیا تے امریکہ دی وعدہ خلافیاں دی بنا اُتے دوری اختیار کیتی گئی جس اُتے نواز شریف تے آصف زرداری زیر عتاب آئے اونج تے عمران خان وی چین دوستی دا دم بھردے نیں تے امریکہ و یورپ دی بجائے متبادل دی گل کردے نیں پر کابینہ اجلاس دیاں تصویراں کجھ ہور ای کہانی سناندیاں نیں پچھنا تے محض اینا اے کہ اقاماں دی بنا تے جے سابق حکمران قومی سلامتی لئی خطرہ ہو سکدے نیں تے دوہری شہریت رکھن والے انج دے لوک جنہاں نے شہریت لین توں پہلاں کسے ہور ملک دی وفاداری دا حلف چکن وچ قباحت محسوس نہیں کیتی تے کیہ ایہہ لوک حساس معلومات افشا کر کے قومی سلامتی لئی خطرے دا کارن نہیں بن سکدے؟
چین لئی مضبوط تے خوشحال پاکستان بوہت ضروری اے کیوں جے کمزور پاکستان بھارت دی ریشہ دوانیاں دا مقابلہ نہیں کر سکدا، امریکہ تے چین وچ ٹھنی ہوئی اے ایس لئی پاکستان اہم حیثیت اختیار کر گیا اے جد کہ برطانیہ تے امریکہ دے مفاد اکوں نیں تے اوہ ہر صورت خطے وچ بھارت دی بالادستی دے خواہاں نیں پاکستان دی مضبوطی و خوشحالی لئی چین جس قدر پُر جوش اے اونج پاکستان دی طرفوں جذبہ وی وکھائی نہیں آندا بلکے انج نظر آندا اے کہ پاکستان وچ اقتدار دی موجودہ تبدیلی چین توں دوری دا کارن بن سکدی اے کیوں جے برطانوی شہری زلفی بخاری اختیار دے حوالے نال نائب وزیراعظم توں گھٹ نہیں تے کابینہ اجلاس دے دوران ایہناں دی نشست وزیراعظم دے سجے پاسے رکھی جاندی اے جیہڑی بااعتماد ہون دی نشانی اے ایسے طرح جے اجلاس دے دوران وزیراعظم دے کھبے پاسے ویکھیا جائے تے امریکی رہائشی ندیم بابر بیٹھے وکھائی دیندے نیں آئی ایم ایف توں قرض نہ لین دے دعوے کرن والیاں نے اقتدار ملدے ای ملک دے معاشی معاملے آئی ایم ایف دے ملازم حفیظ شیخ دے حوالے کر دتے جنہاں نے ذہانت دا انج دا مظاہرہ کیتا اے کہ ڈالر نوں پر لگ گئے نیں تے روپیہ مسلسل زوال پذیر اے ایسے طرح ترجمانی اُتے شہباز گل نوں مامور کر رکھیا اے جنہاں دے کول امریکا دا گرین کارڈ اے اقامہ رکھن والے اقتدار وچ آن تے ملک لئی خطرے پیدا ہو سکدے نیں غیر ملکی شہریت رکھن والے اقتداروچ ہون تے ملک محفوظ کنج ہو گیا؟ شفافیت دے دعویداراں نوں دہری شہریت دے حوالے نال قوم نوں دلیل نال جواب دینا ہوئے گا الزام تراشی کردے ہوئے یاد رکھو اوہ اپوزیشن وچ نہیں پر ایہناں دے وعدے تے دعوے عوام نوں بخوبی یاد نیں۔
