عثمان بزدار، پی ٹی وی تے نیب

لکھت:منصور آفاق

ہر پاسے شور مچایا گیا کہ بزدار گیا، بس ہجے گیا، عمران خان نے علیم خان نوں بلا لیا اے۔ راجہ بشارت نال میٹنگ کر لئی اے۔ سبطین خان دے نال لمبی ملاقات کیتی اے۔ سچ ایہہ وے کہ سبطین خان دی اپنے حلقے دے ترقیاتی کماں توں علاوہ عمران خان دے نال کسے موضوع اُتے گل نہیں ہوئی۔ پنجاب کابینہ دے حالیہ اجلاس وچ وزیراعلیٰ عثمان بزدار دی قیادت اُتے بھرپور اعتماد دی قرار داد منظور ہوئی، جس وچ علیم خان تے راجہ بشارت نے بڑھ چڑھ کے حصہ لیا۔ ایہہ قرار داد جھوٹی خبراں ودھان والیاں دا منہ بند کرن لئی پاس کیتی گئی۔ عثمان بزدار نوں کمزور وزیراعلیٰ سمجھن والے کسے بھل وچ نیں۔ اوہ کدھرے نہیں جا رہے۔ پنجاب دا سیاسی ماحول ایہناں دی گرفت وچ اے۔ اتحادی ایہناں توں خوش نیں، اپوزیشن دے ممبران اسمبلی ایہناں نال ملاقات لئی کوشاں رہندےنیں ایہہ پہلے وزیراعلیٰ نیں جیہڑے منظم نیں تے رسک اسسمنٹ نوں ویکھ کے کم کر رہے نیں جتھے پچھلی 7 دہائیاں وچ کوئی کم نہیں ہویا سی ایہناں علاقیاں وچ ایہناں دے کم اپنی افادیت دی وجہ نال ایہناں دی حکومت دی پہچان بن رہے نیں۔
عمران خان نے محسوس کیتا کہ کرونا دی تباہ کاریاں توں بعد جے کوئی شعبہ معیشت نوں بحال کر سکدا اے تے اوہ کنسٹرکشن سیکٹر اے۔ عثمان بزدار نے ایہناں دے نقش قدم اُتے چلدے ہوئے تعمیراتی شعبے وچ انقلابی اقدامات دا آغاز کیتا۔ ایس گل دا تخمینہ لوایا کہ پنج مرلے دے اک گھر دی تعمیر نال کنے لوکاں نوں روزی مل سکدی اے۔ پتہ چلیا کہ پنج مرلے دا اک گھر 50 توں 100 خانداناں لئی امید دی کرن بن دا اے۔ہن اندازہ لائو کہ لکھاں لوکاں دا اپنا ذاتی مکان بنان دا خاب، جے حقیقت بن جائے تے کنے بندیاں لئی روزگار فراہم ہوئے گا۔ وزیراعلیٰ نے ایس سلسلے وچ اپروولز رجیم پنجاب، دا اجرا کیتا اے۔ ایس سسٹم نال جتھے کمرشل تے انڈسٹریل ڈویلپمنٹ دے شعبے وچ کاروبار کرن والیاں نوں سہولتاں ملدیاں نیں اوتھے عام شہریاں لئی گھراں دی تعمیر وی آسان ہوئی اے۔ حکومت پنجاب نے صوبے دے 9 ڈویژنل ہیڈ کوارٹر اں وچ قائم ای خدمت مراکز وچ تعمیراتی شعبے لئی ون ونڈو سینٹر قائم کر دتے نیں۔ ہن ایہناں سینٹراں اُتے کاروباری حضرات یا عام بندا نجی منصوبیاں نال متعلقہ اجازت نامے تے این او سیز اک ای چھت دے تھلے حاصل کر سکدے نیں۔ ہن درخواست گزار نوں فائلاں چک کے دفتر دفتر نہیں پھرنا پئے گا، واسا، انوائرمینٹل پروٹیکشن ایجنسی، ایل ڈی اے تے دیگر ڈویلپمنٹ ایجنسیاں دے چکر نہیں لانے پین گے۔ متعلقہ اجازت نامیاں لئی ہن اک ای تھاں دا تعین کر دتا گیا اے۔ تعمیراتی شعبے وچ ہر قسم دے این او سی لئی مدت متعین کر دتی گئی اے۔ افسران مقررہ مدت وچ این او سیز تے اجازت نامیاں دی فراہمی دے پابند ہون گے۔ تاخیر کرن والیاں دے خلاف سخت کاروائی کیتی جائے گی۔ اپروولز رجیم پنجاب دے تحت تعمیرات لئی نقشیاں دی منظوری 30 کاروباری دناں وچ ہوئے گی۔ تعمیر دی تکمیل دا سرٹیفکیٹ وی 30 دناں وچ، تھاں دے استعمال وچ تبدیلی دا اجازت نامہ 45 دناں وچ تے نجی رہائشی سکیماں لئی این او سی 60 توں 75 دناں وچ حاصل کیتا جا سکے گا۔ اگست وچ ایس دا دائرہ کار ضلعیاں تیکر ودھایا جائے گا۔ ہن تیکر تقریباً 1400 درخواستاں موصول ہو چکیاں نیں جنہاں وچوں تقریباً 500 اُتے اجازت نامے تے این او سیز جاری کیتے جا چکے نیں۔ ایس کم دا کریڈٹ وزیراعلیٰ عثمان بزدار نوں نہ دینا زیادتی ہوئے گی۔
ہن اک ہور چنگے کم ول آنے آں جنہوں مسلسل بھیڑا کہیا جا رہیا اے اوہ اے ٹی وی لائسنس فیس وچ وادھا۔ یقینا ایس عمل نال پی ٹی وی دے مردہ گھوڑے دیاں شریاناں وچ لہو دوڑ گیا اے۔ جتھوں تیکر غریباں اُتے بوجھ ودھ جان دی گل اے تے اوہ بالکل غلط اے۔ غریب ایس فیس توں مستثنیٰ نیں۔ ماہانہ بجلی دی کھپت دے 100 یونٹ توں گھٹ صارفین نے ایہہ فیس ادا نہیں کرنی۔ مسیتاں تے سکولاں نوں وی معاف اے۔ برطانیہ وچ ماہانہ ٹی وی فیس تیرہ پونڈ یعنی 26 سو روپئے اے۔ پاکستان توں 26 گنا زیادہ ہور کوئی وی مستثنیٰ نہیں۔ یورپ دے باقی ملکاں وچ ایہہ فیس ایس توں وی ودھ اے۔ ایہہ فیس تاں لئی جاندی اے کہ سرکاری نشریاتی ادارے کاروباری ادارے نہیں ہوندے۔ ایہناں دا کم اپنی تہذیب و ثقافت دا فروغ ہوندا اے۔ اوہ ریاست دے بیانیہ دے علمبردار ہوندے نیں۔ افسوس کہ پاکستان وچ ایہناں اداریاں توںسیاسی پروپیگنڈا دا کم لیا جاندا رہیا اے۔ عمران خان دی حکومت آئی سی تے اعلان کیتا گیا سی کہ پی ٹی وی نوں بی بی سی وانگوں خود مختار ادارہ بنایا جائے گا پر ہجے تیکر پی ٹی وی وزارت اطلاعات و نشریات تے پرائم منسٹر سیکرٹریٹ دے وچکار لٹکیا ہویا اے۔
اک ہور معاملے اُتے وی تھوڑی جہی گل کر لواں۔ چیف جسٹس نے کہیا اے کہ نیب احتساب وچ تاخیر دا ذمہ دار اے۔ نیب نے ایس دا تے کوئی جواب نہیں دتا پر خواجہ سعد رفیق تے خواجہ سلمان رفیق دے حوالے نال کہیا اے کہ اوہ رہا نہیں ہوئے ایہناں دی ضمانت ہوئی اے۔ دونواں ملزماں اک غیر قانونی ہائوسنگ سوسائٹی وچ عوام نوں مالی نقصان اپڑان وچ رلت نیں۔ 68 متاثرین نوں نہ تے پلاٹ فراہم کیتے گئے نہ رقماں واپس کیتیاں گئیاں۔ ہائوسنگ پروجیکٹ نوں ایل ڈی اے دی طرفوں غیر منظور شدہ ڈیکلیئر کیتے جان دے باوجود لوکاں توں سرمایہ اکٹھا کیتا گیا۔ ملزمان، اپنے اکائونٹس وچ جمع ہون والی رقماں دی وصولی دی خاطر خواہ وضاحت پیش نہیں کر سکے۔ نیب نے ایہناں دے جرماں دی اک لمبی لسٹ جاری کیتی اے پر فیصلہ تے عدالت نے کرنا اے۔ سو ایہہ کہنا ٹھیک نہیں ہوئے گا کہ خواجہ برادران مجرم نیں، ملزم ایہناں نوں ضرور کہیا جا سکدا اے۔