ظلم رہے اور امن بھی ہو
لکھت:آصف عنایت
وزیراعظم دے مشیر زلفی بخاری نوں اینکر نے بڑی عاجزی نال سوال کیتا کہ وزیراعظم دے مشیر، وزیر دا عہدہ رکھنا بوہت اعزاز دی گل اے۔ کیوں ضروری اے کہ غیر ملکی شہریت وی رکھو۔ جواب وچ جس دھڑلے، دعوے تے رعونت نال زلفی بخاری نے کہیا، کیوں ضروری اے کہ میں نہ رکھا؟ زلفی بخاری نوں ایس نے کہیا کہ پاکستانی آئین دے مطابق۔۔۔ گل آئندہ پروگراماں اُتے چلی گئی پر اللہ گواہ زلفی بخاری داجواب سن کے تے رعونت ویکھ کے مینوں انج محسوس ہویا جویں ایس نال حکمراناں نے میری قیمت وی وصول کر رکھی اے۔ کیہ مردم زرخیز وطن سی ساڈا کدی۔ عبدالحفیظ پیرزادہ وزیر قانون، ڈاکٹر مبشر حسن وزیر خزانہ سن۔ اج وزارت خزانہ ای جتیاں وچ دال بٹ رہی اے۔ وزیر قانون الطاف حسین نوں نیلسن منڈیلا مندے نیں ٹوپیاں رکھدے نیں اک وزارت دی دوجی وکالت دی۔ 23 سالہ بندوبست وچ پی ٹی آئی نے کدی شہباز گل نوں نہیں ویکھیا سی۔ فیاض الحسن چوہان کیہ شے اے کون جان دا سی؟ کدی مفتی محمود، نواب زادہ خان نصر اللہ خان، پروفیسر غفور صاحبان مسند اپوزیشن اُتے سن۔ حکومتی بنچاں اُتے اپنے کماں تے کارنامیاں ملک و قوم دی خدمت تے قربانی دے حوالے نال زندہ رہن والے بھٹو صاحب سن۔ظاہر اے کہ دنیا وچ چل چلائو لگیا اے جیہڑا آیا اے اینوں جانا اے پر replacement(متبادل) جے بہتر نہیں تے بدتر وی نہ ہوئے۔ ساڈے مسئلے تے وسائل بدل گئے، ثقافت تے تمدن بدل گیا، غیر ملکی حکمران طبقیاں وچ سرکردہ ہو گئے۔ اللہ کریم کدی تے نجات دیوے گا۔
حکومت دے مشیراں نے جنے اثاثے تے فیر ایہناں دی جیہڑی مالیت دسی اے، لگدا اے 2020، نہیں 1820ء دی مالیت اے۔
بھٹو صاحب دے اک دوست نے کسے ایس پی دی تعیناتی دی سفارش دی بھٹو صاحب دا دوستاں وچ مزاح کافی مشہور سی۔ بھٹو صاحب نے گل ٹال دتی۔ 2 ہفتے بعد گورنر ہائوس آئین پاس ہون دی خوشی وچ بوہت وڈی تقریب سی۔ بھٹو صاحب آئے گڈی توں اترے ایسے دوست اُتے نظر پئی ایس ول گئے موہڈے اُتے ہتھ رکھ کے پنج منٹ لئی گل بات کیتی۔گل بات کیہ سی مذاق تے ہلکی پھلکی چھیڑ چھاڑ سی۔ اوہ دوست کہندے نیں کہ بھٹو صاحب نے میرے موہڈے توں ہتھ ہٹایا تے چیف سیکرٹری، ہوم سیکرٹری، آئی جی پنجاب سب دے سب میرے کول آ کے اپنے کارڈ جس اُتے دفتر، گھراں دے نمبر سن دین لگے کہ کوئی حکم ہوئے تے دسو۔ بہرحال اوہناں نے ایس پی دی تعینات کرالئی بعد وچ بھٹو صاحب نال ملے تے اوہناں نے کہیا کہ میں ایس لئی سفارش کردا تے ایس ایس پی نے آئی جی دے قابو نہیں آنا سی تے ڈسپلن برباد ہو جاندا جد کہ اج وزیراعظم ڈیوڈ وس وچ امریکی صدر توں اکرم سہگل تے اک دوست دا تعارف کرواندے نیں کہ ایہہ میرا خرچہ چک کے لیائے نیں۔کیہ ایہناں دا فون یا کوئی کم رک پائے گا تے فیر انج سکینڈلز جدوں جنم لین تے ایس نوں مافیا نہیں بولدے جد کہ احباب دا ناں دینا چاہیدا اے۔
موجودہ وزیراعظم جتھے وی گئے ملک لئی بھیڑی گل کیتی کہ کرپشن اے، منی لانڈرنگ اے، چوری اے، بندہ پچھے کہ جس گھر دا سربراہ کہے کہ میرے گھر وچ چور رہندے نیں کوئی ایس دے کول اک ویلے دا کھانا کھان نہیں آ سکدا کہ جیب نہ کٹی جائے تے ایہہ انویسٹمنٹ دے دعویدار نیں۔ عبدالقادر حسن فطری نہیں طبعاً بھٹو صاحب دے ناقدین وچوں سن، نے ضیاء الحق دے دور وچ اک کالم لکھیا کہ بھٹو صاحب مغربی جرمنی دے دورے اُتے گئے۔ مغربی جرمنی دے حکام نے کہیا کہ تسیں بوہت وڈے تے مقبول رہنما او پر ساڈے کول تہاڈے ملک دے لوکاں نے سیاسی پناہ لئی درخواست دے رکھی اے بھٹو صاحب بولے کہ جان توں اک گھنٹہ پہلے ایہناں سارایاں نوں بلا لوئو، تاں پاکستانیاں نوں اک کمیونٹی سنٹر وچ بلایا گیا۔ بھٹو صاحب نے 20/25 لوکاں توں واری واری پچھیا کسے نے کہا کہ میرے اُتے ناجائز مقدمہ اے۔ کوئی کہن لگا تہاڈا فلاں وزیر خلف اے غرض ایہہ کہ ہر اک نے کوئی نہ کوئی وجہ دس دتی۔ بھٹو صاحب نے اردو وچ کہیا ،اگر آپ کا کوئی حقیقت میں مسئلہ ہو تو مجھے بتائو۔ پاکستانی چپ ہو گئے فیر بھٹو صاحب نے پچھیا کہ مزے وچ او، عیش کر رہے او، کما رہے او پاکستانیاں نے ہاں وچ جواب دتا سی اللہ حافظ کہہ کے باہر آئے۔ اخباری رپورٹراں مغربی جرمنی دے حکام نے پچھیا کہ کیہ کرنا اے بھٹو صاحب بولے کہ ایہہ انتہائی مطلوب لوک نیں میں ایہناں نوں الٹا لٹکا دیاں گا۔ بھٹو صاحب ہجے پاکستان نہیں اپڑے سن کہ سب دی سیاسی پناہ کنفرم ہو گئی۔ بھٹو صاحب نے اپنی بدنامی کروالئی پر اپنے وطن دے بیروزگاراں نوں روزگار تے عیش دی حیاتی لئی الزام لے لیا پر اج وزیراعظم اپنے آپ نوں زم زم نہایا تے قوم نوں مافیا دس رہے نیں۔
پنجاب دے اک دورے اُتے پنجاب کابینہ توں فرداً فرداً ملاقات دے دوران بھٹو صاحب نے گوجرانوالہ توں اک وزیر نوں مخاطب کر کے غصے نال کہیا:
پاکستان کیہ تیرے پیو دا اے؟، ایس نے فوراً جواب دتا، نہیں سر، بھٹو صاحب بولے کیوں لٹ رہے او کہندے نیں کہ وزیر صاحب نے نیت سی وی تے ختم کر دتی۔
ضیاء الحق دے دور وچ لکھاں لوک قید ہوئے ہزاراں نوں سزا ہوئی پر کوئی بدعنوانی دا ملزم نہیں سی سب سیاسی قیدی سن۔ اج سیاسی قیدی بدعنوانی دے الزام دے نال نیں۔ 25 جولائی دے اخبار وچ شہ سرخی سی اج دا انتخاب دو پارٹیاں دی ملی بھگت سی۔ اپوزیشن دا بیانیہ سی تاریخ دا سب توں وڈا متنازع الیکشن سی۔ دونویں ای سچ کہندے نیں اولاذکر تے پی ٹی آئی سی دوجی پارٹی سب جاندے نیں۔ 25 جولائی 2018ء نوں ای میرا کالم سی 5 جولائی توں 25 جولائی تیکر اصل وچ ایہہ 5 جولائی دا انتخابات دے ذریعے تسلسل سی۔ نیب دا جس طرح استعمال کیتا گیا، احتساب نوں انتقام بنایا گیا کرپشن اقربا پروری دوست نوازیاں وطن عزیز دا مقدر ٹھہری الامان الحفیظ۔ اینٹی کرپشن دا محکمہ بنیا کرپشن ودھ گئی، اینٹی سمگلنگ نے سمگلنگ ودھا دتی۔ کسٹم انٹیلی جنس نے کرپشن عروج نوں اپڑائی۔ ایف آئی اے بنی کہ وفاقی اداریاں توں بے ضابطی تے کرپشن نوں روکے ایس نے سارے وفاقی ادارے اپنی چراہ گاہ بنا لئے۔ جناب بھٹو صاحب نے پولیٹیکل ونگ بنایا جس دے مقصد (احساس ادارے کتاب) بریگیڈیئر سید احمد ارشاد ترمذی لکھدے نیں: ملکی سیاست وچ دشمن دے بلاواسطہ یا براہ راست ملوث ہون اُتے نظر رکھنا پر جو ہویا اوہ سب دے ساہمنے اے۔
ضیاء دے دور وچ جناب معروج محمد خان تے جناب پرویز صالح دی میری دعوت اُتے گوجرانوالہ بارآمد اُتے زاہد حسن خان (ہیرو) جلوس تے تقریب وچ خوب ترنم نال گا رہے سن ظلم رہے اور امن بھی ہو، آہ! کئی دہائیاں لنگھ گئیاں اج سپریم کورٹ آف پاکستان نے وی فیصلہ لکھ دتا:
ظلم رہے اور امن بھی ہو
کیا ممکن ہے تم ہی کہو
