یوم استحصال یا یوم بے بسی

لکھت:عتیق انور راجہ

5 اگست نوں کشمیریاں دے نال اظہار یکجہتی لئی یوم استحصال منان دا اعلان سنیا تے اک صاحب نے پچھیا ایہہ دسو کہ اک دن اپنے کاروبار بند کرن نال کشمیریاں نوں کیہ فائدہ حاصل ہوئے گا۔ میں عرض کیتا اصل وچ پنج اگست دے دیہاڑ سانوں یوم بے بسی دے عنوان نال منانا چاہیدا سی کیوں جے ایس دیہاڑ پاکستان جیہڑا مسئلہ کشمیر اُتے اک فریق سی اوہ صرف احتجاج ای کردہ رہ گیا، ایس دی کسے نے نہ سنی تے بھارت نے نہ صرف اپنے ملکی قوانین بلکے عالمی قوانین نال کھلواڑ کردے ہوئے کشمیر نوں اپنا حصہ بنا لیا سی۔ ایس لئی اسیں جے 5 اگست نوں یوم بے بسی مناندے تے دنیا نوں زیادہ شدت نال مسئلے دی اہمیت توں اآگاہ کر سکدے ۔ اوہ صاحب بولے کہ اسیں کنج دی عجیب قوم آں کہ دشمن نوں للکارن لئی کدی گانیاں دا سہارہ لینے آن تے کدی دششمن نوں دنیا دے اگے گندا کرن دی خاطر اپنے ملک دے بازار، مارکیٹاں تے سرکاری دفتر بند کر کے سڑکاں اُتے کھلو جاندے آں۔ جناب محترم عمران خان صاحب اینے بھولے نیں کہ اوہ سمجھدے نیں کہ جس طرح اوہناں نے احتجاجی سیاست نال اپنے مخالفین نوں میدان چھڈن اُتے مجبور کر دتا اے، ایسے طرح احتجاج کر کے اوہ اک دن بھارت نوں مقبوضہ کشمیر توں نکلن اُتے مجبور کر دین گے۔ ایس دے نال نال جناب عمران خان ملکی تاریخ دے پہلے حکمران ہون گے جنہاں نے احتجاج لئی عملی طور تے سرکاری ملازماں نوں سڑکاں اُتے کھڑا کرن دی سعادت حاصل کیتی ہوئے۔ بھارت ، جیہڑا کہ اسیں سارے جاندے آں کہ ساڈا ازلی دشمن اے تے انج دا دشمن اے جس نے لُک کے تے کھلے عام ساڈے اُتے جنگ مسلط کرن دا اک نہ ختم ہون والا سلسلا شروع کیتا ہویا اے۔ بھارتی میڈیا ویکھو تے لگدا اے کہ اگلے کجھ دناں وچ پاک بھارت جنگ ہون والی اے۔ بھارتی میڈیا پاکستان نوں بھارت دے مقابلے اک کمزور تر ملک ثابت کرن لئی گھنٹیاں پروگرام کردااے جس دا واضح مطلب اک پاسے اپنے عوام نوں پاکستان نال دشمنی لئی تیار کرنا تے دوجے ساڈے مورچیاں وچ بیٹھے کمزور سیاسی مہریاں نوں ایہہ دسنا کہ کسے وی حال وچ بھارت نال جنگ دی کوشش نہ کرنا۔
اک عجیب جہی صورتحال اے پاکستانی حکومت کشمیریاں دی اخلاقی تے سفارتی حمایت دا اعلان کردی اے تے سمجھدی اے کہ اسیں کشمیر دے متعلق اپنا کم کر لیا۔ ہن کوئی ایہناں سیانیاں توں پچھے کہ صرف بیاناں نال اک وحشی دشمن نوں کنج قابو کیتا جا سکدا اے۔ کشمیریاں اُتے ظلم و ستم دا ایہہ سلسلا نواں نہیں بلکے بھارت نے 1947ء وچ فوجی قبضہ جمان توں بعد دو لکھ 37 ہزار کشمیریاں نوں صرف ایس لئی قتل کر دتا سی کہ اوہ پاکستان دے نال شامل ہونا چاہندے سن۔ بھارت نے کشمیریاں دے دلاں توں پاکستان دی محبت کھرچن لئی ظلم تے لالچ دا ہر حربہ استعمال کیتا پر اوہ ایس وچ بھیڑی طرح ناکام ہویا۔ مقبوضہ کشمیر وچ ایس ویلے وی قربانیاں دا اک لازوال سلسلہ جاری اے تے کشمیری پوری جرات ، بہادری تے عزم دے نال بھارت دی نو لکھ فوج دا بے جگری نال مقابلا کر رہے نیں تے ایہناں دا ایہہ عزم اے کہ اوہ منزل دے حصول تیکر اپنی جدوجہد جاری رکھن گے۔ صاحبو! پاکستان دے ذمے کشمیر دی صرف اخلاقی و سفارتی مدد کرنا ای نہیں بلکے پاکستان کشمیر دا اک فریق اے۔ اج اک عام پاکستانی سوال کردا اے کہ جدوں ساڈی فوج دنیا دی بہترین فوج اے ساڈی فوج دنیا دی بہادر ترین فوج اے۔ ساڈے کول بہترین میزائل سسٹم اے ساڈی ایجنسیاں پوری دنیا وچ اپنی اک خاص پہچان رکھدیاں نیں تے پاکستانی حکومت بھارت دی طرفوں مسلسل اشتعال انگیزی تے کشمیر اُتے ناجائز قبضے نوں ختم کروان لئی بھارت نال جنگ دا اعلان کیوں نہیں کردی۔ لوک کہندے نیں جے بھارت بنگلہ دیشی عوام دی چیخوپکار دا سہارہ لے کے اوتھے اپنی فوجاں داخل کر سکدا اے تے ساڈی فوجاں کیوں بے بس و مجبور کشمیریاں دی آزادی لئی عملی طور تے میدان وچ نہیں آ رہیاں۔ عجیب گل اے اک پاسے اسیں کشمیر نوں اپنی شہ رگ قرار دینے آں تے دوجے پاسے لہولہان شہ رگ نوں مکمل کٹن توں بچان دی بجائے صرف بیاناں دا سہارہ لین اُتے اکتفا کرنے آں۔ میں ایہہ سمجھنا واں کہ اسیں کشمیریاں دی وکالت دا حق ادا ای نہیں کیتا جیہڑا سانوں کرنا چاہیدا سی۔
اسیں سال وچ اک دیہاڑ کشمیر ڈے منا کے تے بھارت دے جھنڈے ساڑ کے ایہہ سمجھ بیٹھے آں کہ جابر و غاصب بھارت کشمیر توں نکل جائے گا تے ایہہ ساڈی سیاسی شعور توں مکمل لاتعلقی نوں ظاہر کردا اے۔ یاد رکھو کہ دنیا وچ قبضے ہمیشہ طاقت نال ہوندے چلے آ رہے نیں تے قبضیاں نوں ختم کروان لئی جوابی تے کجھ زیادہ طاقت لانی پیندی اے۔ ساڈے ملک وچ کمزور حکومتاں دے چلدے تے سیاستداناں اُتے الزام دے نہ ختم ہون والے سلسلے نے ساڈے سیاسی میدان نوں اینا بنجر کر دتا اے کہ اک مدت توں ملک نوں کوئی انج دا راہنما میسر نہیں آیا اے جنہوں اسیں واقعی سیاستدان آکھ سکیے۔ ساڈے ساہمنے سیاست دے ناں اُتے جیہڑے لوک موجود نیں ایہہ اصل وچ اپنی نسلاں لئی مال جمع کرن والیاں مشیناں نیں۔ ایہہ جدوں تیکر حکومت وچ ہون بلکل ٹھیک رہندے نیں تے جویں ای ایہناں نوں اقتدار چھڈنا پوے ایہناں نوں دنیا جہاں دیاں بیماریاں لگ جاندیاں نیں۔ ہن ملک پاکستان وچ سیاسی شعور رکھن والے لوکاں دی کمی واجح ویکھی جا سکدی اے تے ایہہ صاف نظر آندا اے کہ ساڈے پالیسی سازاں وچ ٹھیک تے ویلے تے فیصلے کرن دی سمجھ بوجھ ختم ہو چکی اے۔ کدی اسیں کشمیریاں نال یکجہتی لئی دو منٹ خاموشی دی گل کرنے آں تے کدی اسیں کشمیریاں دے زخماں اُتے مرہم رکھن لئی یوم استحصال کشمیر ڈے منان دا اعلان کر رہے آں۔ تے پتہ نہیں کس سیانے دے مشورے اُتے کشمیر دی حمایت وچ کشمیر ہائی وے دا ناں بدل کے سری نگر ہائی وے رکھ دینے آں۔ افسوس دی گل اے کہ پاکستان وچ حکمران طبقیاں نے جی بھر کے دولت اکٹھی کیتی اے تے جدوں ایہناں دے ناں دے نال لفظ سابق آن دا ویلا ہویا تے سانوں خبر ملی کہ ساڈے مہربان کسے دوجے ملک وچ اپنے بالاں دے کول منتقل ہو رہے نیں۔ کسے نے جزیرے خرید لئے کسے نے یورپ دے بینکاں وچ پاکستانی پیسہ جمع کروایا تے کسے نے ارباں دی خدمت دا سلسلہ شروع کر دتا۔ ایہہ ھقیقت اے کہ کشمیری عوام تے پاکستانی عوام دے وچکار اک بوہت مضبوط رشتہ اے پر کشمیری عوام محکوم نیں تے پاکستانی عوام بے بس۔ ہن آزادی لئی جنہاں نے کوشش کرنی اے اوہ سانوں کشمیر دے مسئلے اُتے سخت بیان دین توں روک دیندے نیں تے بھارت توں ڈران دی کوشش وی شروع کر دیندے نیں۔ اصل وچ تے ریاست جموں و کشمیر نوں تقسیم ہند دے فارمولے تے عوامی منشا دے مطابق پاکستان دا حصہ بننا سی۔ پر بھارت پہلے سیاسی چالبازی نال تے فیر طاقت دے استعمال نال کشمیریاں نوں حق خودارادیت دین توں انکاری رہیا تے پچھلے ورہے بھارت نے اپنے ملکی قانون وچ ترمیم کر کے کشمیر نوں قانوناً بھارت دا حصہ بنا لیا۔ اسیں صرف احتجاج کردے رہے تے بھارت کشمیری نوجواناں نوں چن چن کے شہید کردا رہیا۔ جے ساڈی وزارت خارجہ وچ جان ہوندی تے ایس قدر ظلم و ستم دے بعد ساڈے وزیر خارجہ دنیا دے ہر ملک ہر پلیٹ فارم اُتے کشمیریاں دا مقدمہ پیش کر کے کدوں دا بھارت نوں مجبور کر چکے ہوندے کہ اوہ استصواب رائے دے بارے وچ سوچدا۔ پر ساڈے وزیر خارجہ تے سانوں ایہہ سمجھاندے وکھائی دیندے نیں کہ بھارت نال کسے اچھائی دی توقع نہ رکھی جائے تے جیہڑا کشمیر ساڈے کول اے اینوں بچان دی فکر کیتی جائے۔ ستر ورھیاں توں کشمیری نوجوان تے اپنا فرض بھرپور انداز وچ ادا کر رہے نیں ہن پاکستان دی ذمے داری اے کہ آزادی کشمیر لئی کجھ ہٹ کے اقدام کرن دی سوچ اپنائے۔ بقول وزیراعظم آزاد کشمیر پاکستانی حکومت دی موجودہ پالیسی اُتے چل کے 700 ورہے وی اسیں احتجاج اُتے لگے رہے تے مقبوضہ کشمیر آزاد نہیں ہو سکے گا۔ مقبوضہ کشمیر دے مظلوم مسلمان ساڈے منتظر نیں۔ ایس ویلے جے واقعی کشمیر نال محبت اے کشمیریاں دے دکھاں دا مداوا مطلوب اے تے حکومت پاکستان نوں اپنی وزارت خارجہ دی کمان ایس بندے دے ہتھ دینی ہوئے گی جیہڑے افہام تفہیم نال سیاسی شعور نال تے دلیری نال دنیا دے اگے کشمیر دا مقدمہ لڑ سکے۔ ساڈا وزیر خارجہ انج دا بندہ ہونا چاہیدا اے جس دی نظر وزارت اعلیٰ تے وزارت عظمیٰ اُتے نہ ہوئے بلکے ایس دی ساری توجہ دنیا دے نال مسلسل رابطے نال کشمیری قوم دا مقدمہ لڑن اُتے ہوئے۔ ایس ویلے ساڈی وزارت خارجہ دی ایہہ ذمے داری اے کہ اوہ مقبوضہ کشمیر دے عوام اُتے ہون والے ظلم و ستم تے اوتھے ہون والی انسانی حقوق دی پامالیاں دے خلاف بین الاقوامی سطح اُتے اپنی اواز بلند کرے۔ دنیا نوں دسیا جائے کہ بھارت پورے جنوبی ایشیا دے خطے دی سلامتی تے امن لئی اک وڈا خطرہ اے۔ ساڈے وزیر خارجہ بھارت دے خلاف اقتصادی پابندیاں تے تجارتی بائیکاٹ دی مہم شروع کرن تے ہندوستانی فوج دے انسانیت دے خلاف جرائم تے پوری دنیا دے ملکاں وچ کیس درج کرانے شروع کرے۔