عثمان بزدار نیب دے ریڈار اُتے

تحریر حمیداللہ بھٹی

ہر حکمران نوں زعم ہوندا اے کہ اوہ عقلِ کُل نیں ایس لئی ایس دا کوئی فیصلہ غلط ہو ای نہیں سکدا اوہ ہر فیصلہ ٹھیک کردا اے ایسے لئی مشورے وغیرہ نوں فضول تصور کردے ہوئے کسے قسم دی مشاورت یا تجویز نوں اہمیت نہیں دیندا ایہہ زعم ایس ویلے تیکر قائم رہندا اے جدوں تیکر اقتدار توں رخصت نہیں ہوندا پر اقتدار توں بے دخل ہون اُتے پتا چلدا اے کہ اقتدار دے چلے جان وچ غلط فیصلیاں دا اہم کردار اے تے انج دا مشاورت دے فقدان دی بنا اُتے ہویا فیر وی کوئی راہ تبدیل کرن اُتے آمادہ نہیں ، غلط فیصلیاں نال لوک پریشان نیں، یا غلط فیصلے مسئلے ودھان دا باعث نیں، کسے نوں پرکاہ برابر احساس نہیں، غلطیاں و خامیاں ماہرین دی مشاورت نال ٹھیک کیتی جا سکدیاں نیں پر کسے نوں کسے ماہر توں مشورہ کرن دی فرصت نہیں ہوندی کیوں جے کوئی مشاورت کر لوے تے عقل کل ہون دا زعم ختم ہو سکدا اے۔
عثمان بزدار دی سوچ دے مطابق لہور وچ راوی کنارے اک نویں شہر دا سنگ بنیاد رکھن دیاں تیاریاں جاری نیں وزیراعظم نال تقریب وچ شرکت تے مہمان خصوصی بنن لئی ویلا وی لیا جا چکیا اے پر واقفانِ حال کجھ ہور ای کہانی سنا رہے نیں تے آکھدے نیں کہ پنجاب دے وزیراعلیٰ دے بارے وچ کسے شکایت اُتے دند پیسن والے خان ہن گلاں چپ ہو کے سن لیندے نیں ایس دوران جبین شکن آلود نہیں ہوندی جیہڑا ایس امر دا اغماض اے کہ تبدیلی دا امکان اے، متبادل دے طور تے علیم خان، میاں اسلم اقبال تے ندیم قریشی دے ناں لئے جا رہے نیں تے سیاسی نبض شناس دا تے ایہہ دعویٰ وی اے کہ تبدیلی لمبا عرصہ نہیں ایس مہینے اگست یا فیر ستمبر وچ ای متوقع اے کیوں جے آبادی دے لحاظ نال ملک دا سب توں وڈا صوبہ بے پناہ مسلیاں دا شکار اے جس نال لوک تبدیلی سرکار توں متنفر ہوندے جا رہے نیں اونج تے اپوزیشن روز اقتدار دی تبدیلی دی گل کردی اے پر اپوزیشن وچ کوئی دم خم نہیں پر حکومتی حلقیاں وچ کجھ بدلن دیاں گلاں کرنا خاصا معنی خیز اے جنہاں نال انج محسوس ہوندا اے کہ واقعی کدھرے ہلچل اے کجھ اصحاب ایس ورہے دے اختتام توں پہلاں پنجاب دی وزارتِ اعلیٰ کسے انج دے بندے دے کول ہون دا یقین دلواندے نیں جیہڑا محض اقتدار توں لطف اندوز ہون دی بجائے مسئلیاں دے گرداب وچ پھسے عوام دی دلجوئی اُتے دھیان دیوے۔
پنجاب دی قیادت دے بارے وچ اُتے تیکر ہن سب چنگا نہیں رہیا بلکے بوہت ساریاں خرابیاں تسلیم کیتی جان لگیاں نیں ایہہ تے حکمراناں دی خوش قسمتی اے کہ باہم دست و گریباں اپوزیشن جماعتاں دا کسے نکتے اُتے اتفاق نہیں۔ نیب پیشیاں توں بچن لئی شہباز شریف سیاسی سرگرمیاں تقریباً ختم کر چکے نیں حمزہ شہباز اونج ای جیل وچ نیں پیپلز پارٹی دی اسمبلی وچ عددی تعداد آٹے وچ لون دے برابر وی نہیں پر سوال ایہہ وے کہ نیب کدوں تیکر اپوزیشن نوں سیاسی سرگرمیاں محدود رکھن اُتے مجبور کر سکے گا؟ کیوں جے نیب دی جانبداری وچ کسے نوں شک و شبہ نہیں رہیا اتحادی تیکر کہن لگے نیں کہ نیب سیاسی معاملیاں وچ مداخلت کردا اے انج دے حالات وچ احتساب دے عمل دی کون تائید کرے گا؟ ایسے لئی تبدیلی حکمران جماعت دے ذریعے ای ممکن اے۔
راوی کنارے نواں شہر آباد کرن لئی کاغذاں وچ کھرباں روپئے مختص کیتا جا چکیا اے اک ارب ڈالر دی لاگت نال 35 ہزار اپارٹمنٹس بنان دا منصوبہ اے ایہہ انج دے حالات وچ ہو رہیا اے جدوں ملک نوں اندرونی تے بیرونی قرضیاں دیاں قسطاں دی ادائیگی وچ مشکل دا ساہمنا اے پر انج محسوس ہوندا اے پنجاب وچ روپئے پیسے دی ریل پیل اے حالاں کے تعلیم و صحت دی صورت حال بہتر بنان لئی بوہت کجھ ہونا باقی اے جیہڑا ظاہر اے اخراجات دے بغیر ممکن نہیں انج لہور دے کول نواں شہر بسا کے سینکڑوں ایکڑ زرعی رقبہ برباد کرن دی سمجھ نہیں آندی پہلے ای لہور وچ زرعی رقبے اُتے رہائشی کالونیاں بنا کے زراعت محدود کر دتی گئی اے جس دی وجہ نال تازہ سبزیاں و دیگر زرعی اجناس دی پیداوار نہ ہون دے برابر اے فیر وی شیخ چلی جہے منصوبیاں دی تکمیل باعثِ حیرت اے ۔ پرانا لہور بے پناہ مسائل دا شکار اے صاف پانی دی فراہمی ہنوز ممکن نہیں بنائی جا سکی نکاسی آب دی صورتحال وی خراب اے پر کیہ کدھرے حکمران اپنے آپ نوں عقل کل سمجھدے نیں ایس لئی کنہوں سمجھائیے یا سنائیے کوئی سمجھن یا سنن اُتے تیار نہیں ممکن اے دیہی وزیراعلیٰ لہور جہے وڈے شہر وچ کجھ نوا کرن دا اعزاز حاصل کرنا چاہندے ہون پر کجھ نواں کرن دی جستجو وچ وگاڑ وچ وادھا کرنا کوئی دانشمندی نہیں۔
شراب دے غیر قانونی لائسنس دے اجرا دی پاداش وچ نیب نے عثمان بزدار نوں 12اگست نوںطلب کر لیا اے۔ ایس حوالے نال اطلاعات نیں کہ شراب لائسنس جاری کرن توں بعد 5 کروڑ رشوت توں علاوہ کجھ تحفے وصول کیتے گئے نیں حالاں کے لائسنس حاصل کرن والے نجی ہوٹل نے پنجاب ٹورسٹ ڈیپارٹمنٹ توں پاکستان ہوٹل ایکٹ 1976 توں اجازت نامہ وی نہیں لیا محکمہ ایکسائز نے جدوں قواعد و ضوابط توں آگاہ کیتا تے کسے نے وی توجہ نہیں دتی پر انج نہ کیتا جاندا تے حکمراناں دے عقل کل ہون دا تاثر زائل ہون دا احتمال سی، ایسے لئی مشاورت کرن دی کسے نے لوڑ ای محسوس نہیں کیتی پر عوامی نمائندے دی شراب فروشی دے طور تے شہرت بنا کے تبدیلی دا اسٹیج تیار کرنا وی چنگی گل نہیں۔ حکمران جماعت نوں اتحادیاں دے نال اسمبلی وچ اکثریت حاصل اے جد کہ نیب توں ڈری تے سہمی اپوزیشن کسے خطرے دا باعث بنن دی پوزیشن وچ نہیں۔ ایہناں حالات وچ وزارتِ اعلیٰ دی تبدیلی کوئی مشکل نہیں فیر کیوں تبدیلی توں پہلاں بدنام کرن لئی نیب دا سہارہ لیا جا رہیا اے؟ عثمان بزدار دو ورہے دی حکومت دے دوران اپنا کوئی گروپ تیکر تشکیل نہیں دے سکے انج بے ضرر بندے توں مستقبل وچ وی کسے خطرے دا امکان نہیں تے جان چھڑان لئی ادارے دا استعمال خاصہ حیران کن اے۔
نیب وچ ممکن اے کجھ خوبیاں وی ہون بادی النظر وچ خرابیاں نمایاں نیں ہن تیکر ہون والی زیادہ تر گرفتاریاں بلاجواز ہوئیاں نیں جیہڑا اختیارات توں تجاوز اے سپریم کورٹ دے خواجہ سعد رفیق تے خواجہ سلمان رفیق دے بارے وچ حالیہ فیصلے دے بعد نیب اُتے تنقید وچ وادھا ہو گیا اے نیب دی شفاف ٹرائل تے کسے معقول وجہ دے بغیر حراستاں دا غصہ لوک ہن حکومت اُتے کڈن لگے نیں جس دی بنا اُتے نیب دے نال حکومت وی دبائو دا شکار اے ہیومن رائٹس واچ نے وی حکومت اُتے تنقید کرن والیاں دے خلاف نیب دا استعمال بند کرن دا مطالبہ کیتا اے ایس لئی نیب دی ساکھ اُتے کوئی اعتبار نہیں کر سکدا جے دل دی گل کہواں تے جے نیب اختیارات وچ کاروائیاں دے حوالے نال جلدی بہتری نہ لیائی گئی تے مینوں جلدی ای حکمران جماعت پی ٹی آئی وی نیب دے شکنے وچ جکڑی وکھائی دیندی اے کیوں جے جیہڑا حکومت دے خلاف گل کردا اے اوہ نیب دے ریڈار اُتے آندا اے جے موجودہ حکمران کل نوں اپوزیشن وچ آ گئے تے شفاف ٹرائل دا مطالبہ کرن دی پوزیشن وچ نہیں ہون گے ایسے تناظر وچ عثمان بزدار نوں ہٹان لئی نیب ریڈار اُتے ہون دا بہانہ خاصہ بودا اے کوئی معقول بہانہ لبھنا پئے گا۔