کرونا دا خطرہ ٹلیا نہیں، محتاط رہو!

تحریر :شاہد ندیم احمد

کرونا پاروںپوری دنیا وچ لاک ڈائون سنے دیگر سخت حفاظتی اقدامات کیتے گئے پر بھارت سنے بوہت سارے ملکاں وچ کرفیو دے باوجود موذی مرض نوں ودھن نال نہ روکیا جا سکیا، جد کہ پاکستانی حکومت دے کرونا دے انسداد لئی اقدامات کامیاب رہے تے پوری دنیا وچ پاکستان دی حکمت عملی نوں ستائش بھری اکھاں نال ویکھیا جا رہیا اے، ایہہ حکومتی اقدامات تے موثر حکمت عملی دا ای ثمر اے کہ پاکستان وچ نہ صرف جانی نقصان گھٹ رہیا، بلکے دنیا وچ چین دے بعد پاکستان ای گھٹ توں گھٹ نقصان دے بعد وی کرونا نوں مزید ودھن توں روکن وچ کامیاب ہویا، جیہڑا بلاشبہ اللہ تعالیٰ دے کرم بعد حکومت دی موثر حکمت عملی دا ثمر اے ، پر ایہہ وی حقیقت اے کہ ایران، اٹلی، جرمنی تے ہالینڈ وچ کرونا دی دوجی لہر شروع ہو چکی اے۔پاکستان وچ طبی ماہرین سیکنڈ ویوز دا اندیشہ ظاہر کر رہے نیں، ایہناں حالات وچ عوام دی لاپرواہی تے حکومتی اقدامات وچ ذرا جہی چوک وی ایس جان لیوا وائرس دے ودھن دی وجہ بن سکدی اے۔
ایس وچ شک نہیں کہ کرونا وائرس پاروں پورے ملک وچ لاک ڈائون دی مختلف حکمت عملی اُتے عملدرآمد کیتا جا رہیا سی، حکومت تے عوام لئی بوہت کڑی آزمائش سی، جس وچ دونویں بڑی حد تیکر سرخرو ہوئے نیں۔ حکومت نے لمبے ورہے بعد لاک ڈائون دے تحت عائد شدہ پابندیاں ختم کرن دا فیصلہ کیتا اے پر ایس دے نال ایہہ وی کہیا جا رہیا اے کہ عوام نوں احتیاطی تدبیراں دے نال ای معاشی تے سماجی سرگرمیاں دی اجازت ہوئے گی۔ ایس موقعے اُتے وزیراعظم عمران خان نے وی عوام نوں متنبہ کیتا اے کہ کرونا دا خطرہ ہجے ٹلیا نہیں، ایس لئی احتیاط بوہت ضروری اے، خاص طور تے محرم الحرام دے دوران ایس او پیز اُتے عمل کرن دی بوہت زیادہ لوڑ اے۔ وزیراعظم دے ایس صائب مشورے اُتے عمل کرنا، ایس لئی وی ضروری اے کہ پاکستان وچ کرونا کیس تیزی نال گھٹ ہو رہے نیں پر عالمی صورتحال دے تناظر وچ ویکھیا تے ماہرین دی پیش گوئیاں توں صرف نظر نہ کیتا جائے تے کرونا وائرس دی اک نویں لہر دے خدشے نوں نظر انداز نہیں کیتا جا سکدا، عوام دے کول احتیاطی تدبیراں اُتے عمل کرن توں علاوہ کوئی چارہ نہیں کیوں جے کرونا وائرس دی ویکسین ہجے تیکر تیار نہیں کیتی جا سکی جیہڑا لمحہ فکریہ اے۔ ایہہ امر خوش آئند اے کہ ویکسین دے بغیر احتیاطی تدبیراں توں برطانیہ سنے یورپی ملکاں وچ کرونا دے پرانے مریضاں دے وارڈ خالی ہو رہے نیں پر کجھ ملکاں وچ کرونا مریضاں دی آمد وچ وادھا وی ویکھیا جا رہیا اے، صرف امریکہ تے برازیل وچ کرونا تقریباً پونے تن لکھ بندیاں دی جان لے چکیا اے۔ گوانڈھی ملک بھارت وچ کرونا نال مرن والیاں دی مصدقہ تعداد 45 ہزار توں ودھ گئی اے۔ ایس ویلے پوری دنیا وچ کرونا دے دو کروڑ مریض زیر علاج نیں، ایہناں وچوں 50 لکھ صرف امریکہ وچ نیں، مجموعی طور تے ساڑھے ست لکھ توں زیادہ بندے کرونا پاروں موت دے مونہہ وچ جا چکے نیں۔ مروجہ حقائق تے اعداد و شمار دی روشنی وچ ویکھیا جائے تے صاف نظر آندا اے کہ کرونا وبا اُتے قابو پانا 2021 توں پہلاں ممکن نہیں، پاکستان ایس لحاظ نال خوش قسمت رہیا اے کہ ایتھے صرف 6 ہزار 94 مرض نال جاں بحق ہوئے نیں۔ پر جے حکومت نے مزید احتیاطی اقدامات نہ کیتے تے ایس گل دی کوئی ضمانت نہیں کہ دنیا دے دوجے ملکاں توں شروع ہون والی کرونا وائرس دی نویں لہر پاکستان دا رخ نہیں کرے گی۔ایس حوالے نال بوہت سارے قابل ڈاکٹراں دی رائے غور طلب سی کہ کرونا کنٹرول ہون دے نال کاروبار مرحلہ وار کھولنا چاہیدا سی، تاں حکومت نے لاک ڈائون ختم کرن دا اینا وڈا فیصلہ سوچ سمجھ کے ای کیتا ہوئے گا۔ کرونا دے حوالے نال سب اندیشہ ہائے اپنی تھاں، پر لاک ڈائون ختم کرن دا فیصلہ معیشت دے مفاد دے نال عام بندے دے حق وچ بوہت بہتر اے۔
بلاشبہ ملک تے عوام دے مفاد وچ لاک ڈائون مزید لمبے عرصے تیکر جاری نہیں رکھیا جا سکدا، حکومتی ایس او پیز اُتے عمل درآمد ای کرونا توں خلاصی دا مجرب نسخہ اے پر جے حکومت نے لاک ڈائون ختم کرن دا فیصلہ کیتا اے تے فیر ایس او پیز اُتے عملدرآمد دا کوئی سنجیدہ نظام وی بنانا چاہیداسی، محض کاغذاں اُتے ایس او پیز بنا کے کبوتر وانگوں اکھاں بند کرن نال تے گل نہیں بنے گی، ایہناں نوں سختی نال نافذ وی کرنا پئے گا جد کہ انتظامیہ ایس او پیز اُتے عملدرآمد کروان وچ ناکام نظر آئی اے۔ جے حکومت نے نازک موقعے اُتے ابہام توں نکل کے دو ٹوک سنجیدہ پالیسی اختیار نہ کیتی تے خدانخواستہ اک وڈی تباہی ساڈا مقدر بن سکدی اے۔ ایس ویلے کرونا وائرس دے خلاف حکومتی حکمتِ عملی سون دا نوالہ کھواندے ہوئے شیر دی نظر نال ویکھن دے مترادف نظر آندی اے۔ اک پاسے حکومت نے لاک ڈائون دی ساری تر پابندیاں ختم کرن دا اعلان کر دتا اے، جد کہ دوجے پاسے ایس او پیز تے سماجی فاصلے دی پابندی زبانی کلامی لازمی قرار دیندے ہوئے عوام اُتے ذمے داری پائی جا رہی اے۔ کرونا دے خلاف حکومت تے عوام مل کے ای کامیاب ہو سکدے نیں، پاکستان وچ جدوں تیکر کرونا وائرس دا اک وی مریض موجود اے، پاکستان نوں وائرس توں پاک قرار نہیں دتا جا سکدا، ایس لئی عوام نوں چاہیدا اے کہ کرونا وائرس دے مسئلے نوں سنجیدگی نال لیندے ہوئے ایس او پیز، سماجی فاصلے تے بار بار ہتھ دھون دی طبی ہدایات اُتے ایس ویلے تیکر عمل جاری رکھن کہ جدوں تیکر وطن عزیز کرونا وائرس توں پاک قرار نہیں دتا جاندا، عوام لاک ڈائون ختم ہون دے باوجود احتیاط دا دامن ہتھ توں نہ چھڈن، کیوں جے کرونا دا خطرہ ہجے ٹلیا نہیں، گھٹ ضرور ہویا، ختم نہیں ہویا۔