پلاک دے پربندھ ہیٹھ آن لائن “آزادی مشاعرہ”
رپورٹ : رضوان اصغر بٹ
پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت، پنجاب دے زیر اہتمام جشنِ آزادی دے حوالے نال ’’آزادی مشاعرہ‘‘ دے عنوان توں آن لائن مشاعرے دا انعقاد کیتا گیا جس دی صدارت رائے محمد خان ناصر، مہمان خصوصی اقتدار جاوید جد کہ حکیم ارشد شہزاد تے احسان رانا نے مہمانانِ اعزاز دی حیثیت نال شرکت فرمائی۔ ایس مشاعرے وچ پنجاب دے نمائندہ شعراء نے شرکت کیتی جنہاں وچ صوفیہ بیدار (لہور)، احمد نعیم ارشد، (گجرانوالہ)، منصور سحر (فیصل آباد)، انجم قریشی (لہور)، راشد امام (گجرانوالہ)، پروین سجل(لہور)، تنویر سیٹھی (وہاڑی)، صغیر تبسّم (بہاولنگر)، کنیز فاطمہ سیماب (جھنگ) تے خاقان حیدر غازی ڈپٹی ڈائریکٹر پِلاک شامل سن۔
شعراء حضرات نے قائد اعظم تے ایہناں دے رفقاء دی انتھک محنت نوں خراج تحسین و عقیدت پیش کر کے وطن عزیز نال اپنی والہانہ محبت دا اظہار اپنے شعراں دے ذریعے بھرپور انداز وچ کیتا اوہناں نے ایس گل دا اعادہ وی کیتا کہ اپنے ملک دی ترقی تے خوشحالی لئی پوری قوم نوں انتھک محنت تے اخلاص دے نال کم کرن دی اشد لوڑ اے جس دا درس ساڈے قائد نے اپنے خطبات وچ دتا تاں جے ساڈی آن والی نسلاں ایس دنیا وچ سر چک کے جین تے پاکستانی ہون اُتے فخر کر سکن۔
ڈائریکٹر جنرل ، ڈاکٹر صغرا صدف تے ڈائریکٹر پِلاک، محمد عاصم چودھری نے سارے شعراء دا شکریہ ادا کردے ہوئے کہیا کہ جویں ای ملکی حالات معمول اُتے آندے نیں تے اسیں مختلف شہراں وچ اوتھے دے شعراء دے نال مشاعریاں دا اہتمام وی کراں گے ۔
