عاصم باجوہ، سیف نیازی تے کرکٹ وچ ایم کیو ایم دے نمائندے !!!

لکھت:محمد اکرم چودھری

تسیں سن رہے او بلکے سندے رہندے او کہ سی پیک اُتے کم ہو رہیا اے، بوہت تیزی نال ہو رہیا اے ایہہ وی سندے رہندے او کہ سی پیک اُتے کم رک گیا اے ۔ حکومت ایس حوالے نال تحفظات رکھدی اے، حکومت ایس منصوبے اُتے کم نہیں کر رہی، حکومت سی پیک اُتے اپنی پالیسی بدل رہی اے۔ حکومت سی پیک اُتے سنجیدہ نہیں۔ ایہناں سب گلاں، انج دے بیان تے غلط معلومات وچ چنگی خبر ایہہ وے کہ چین دے سفیر یائو جنگ چین پاکستان اقتصادی ، راہداری دے کم اُتے رفتار تیز تے منصوبیاں اُتے توجہ دین پاکستان دا شکریہ ادا کیتا اے۔ پچھلے دن نوائے وقت دے صفحہ اول اُتے چین دے سفیر یاوجنگ دی عاصم سلیم باجوہ نال ہون والی ملاقات نے سی پیک دے حوالے نال پیدا ہون والی ساری افواہاں نوں دفن کر دتا اے۔ساڈی بدقسمتی اے کہ اک انج دا منصوبہ جس نال ملک دا مستقبل جڑیا ہویا اے مختلف سیاسی جماعتاں ایس منصوبے نوں وی متنازع بنا رہیاں نیں۔ کاص طور تے پاکستان مسلم لیگ ن دے میڈیا سیل توں یاں ایہناں دی انھی حمایت کرن والے سوچے سمجھے بغیر سی پیک دی مخالفت کردے رہندے نیں۔ بہرحال ایہہ پاکستان دی سیاست دا سب توں تکلیف دہ پہلو اے کہ ساڈے سیاستدان ہمیشہ ذاتی یا سیاسی مفادات حاصل کرن لئی ملک و قوم دے مفادات نوں نظر انداز کردے نیں۔ چین دے سفیر ہائوسنگ کہندے نیں کہ اقتصادی راہداری دے تحت روز گار دے موقعے ودھان تے ایس دے ثمرات دونواں ملکاں دے عوام تیکر اپڑان گے۔یائو جنگ نے سی پیک نوں مزید بہتر تے سفید بنان دے عزم اُتے گل کردے ہوئے کہیا کہ ایس منصوبے نال دونواں ملکاں دے عوام مستفید ہون گے۔
چیئر مین اتھارٹی عاصم سلیم باجوہ کہندے نیں کہ سی پیک متعلق جھوٹی خبراں ودھا کے ایس منصوبے نوں سبوتاژ کرن دی کوشش کیتی جا رہی اے۔ عوام ملازمتاں تے اقدامات متعلق جھوٹی خبراں اُتے کن نہ دھرن۔ سی پیک وچ ملازمتاں تے پروجیکٹس متعلق ویب سائٹ اُتے جاری کیتا جائے گا۔ ایس منصوبے اُتے ملک دشمناں دیاں اکھاں نیں تے ایہہ ایہناں دیاں اکھاں وچ کھٹکھدا اے۔ پاکستان نوں غیر مستحکم کرن لئی بیرونی طاقتاں ہر ویلے سرگرم رہندیاں نیں۔ پاکستان دی ترقی دے بیرونی مخالفین سی پیک منصوبے نوں سبوتاژ کرن لئی مختلف حربے استعمال کردے رہندے نیں۔ملک وچ امن و امان نوں خراب کرن دیاں کوششاں وچ وی ایہناں بیرونی دشمناں دا ہتھ اے۔ پاکستان دے دشمن چاہندے نیں کہ کسے صورت سی پیک مکمل نہ ہوئے، پاکستان معاشی تے اقتصادی طور اُتے مضبوط نہ ہوئے جس طرح قانون نافذ کرن والے اداریاں خاص طور تے پاکستان فوج نے دہشت گرداں دا قلع قمع کیتا اے بالکل ایسے طرح سی پیک دے دشمناں دیاں کوششاں نوں وی ناکام بنایا جائے گا۔ اندرونی طور تے سی پیک دے حوالے نال غلط معلومات ودھان دا سلسلہ نہیں روکیا جا سکدا کیوں جے آزادی اظہار دا سہارا لے کے جس دا جو دل کردا اے اوہ کہندا پھردا اے پر ایس منفی سرگرمیاں دا توڑ موجود اے۔ چیئر مین سی پیک اتھارٹی لیفٹیننٹ جنرل ریٹائرڈ عاصم سلیم باجوہ صرف ٹوئٹر اُتے بیان جاری کرن دے بجائے صحافیاں نوں نال ملان ایہناں دے نال گھٹ توں گھٹ ہر ہفتے معلومات دا تبادلہ کرن۔ حقائق پاکستان دے میڈیا تے عوام دے اگے رکھن لوکاں تیکر ٹھیک معلومات اپڑان دا ایس توں بہتر ذریعہ ہور کیہ ہو سکدا اے۔ جدوں غلط معلومات تیزی تے تسلسل دے نال ودھائی جا سکدی اے تے ٹھیک معلومات عوام تیکر اپڑان دے راہ وچ کیہ رکاوٹ اے۔ افواہواں دا توڑ تے عوام تیکر درست معلومات اپڑا کے ای سی پیک دے دشمناں دا مونہہ کالا کیتا جا سکدا اے۔ عوام نوں وی ایس منصوبے نوں اگے رکھدے ہوئے ذمے داری دا مظاہرہ کرنا چاہیدا اے سی پیک دے دشمناں نوں بے نقاب کرنا ضروری اے۔
پچھلے کجھ دن توں کرکٹ دے حلقیاں وچ سلیم ملک تے راشد لطیف دے بیاناں اُتے خاصی گل ہو رہی اے۔ سلیم ملک نے راشد لطیف اُتے ایم کیو ایم دے پرتشدد تاثر دا فائدہ چکن جد کہ فاسٹ بائولر عطاء الرحمن نے سابق وکٹ کیپر اُتے میچ فکسنگ وچ رلت ہون دا الزام عائد کیتا اے۔ تاحال راشد لطیف ایہناں دونواں الزاماں دا جواب نہیں دے سکے۔ شعیب اختر نے اک ویڈیو پیغام دے ذریعے معاملہ ٹھنڈا کرن دی کوشش کیتی جیہڑی کامیاب نہیں ہو سکی۔ اک مخصوص طبقہ سلیم ملک نوں ہمیشہ ہدف بناندا آیا اے اوہ اک وار فیر متحرک اے۔ ایس طبقے نے سلیم ملک نوں ہمیشہ پنجابی ہون دی وجہ نال نشانے اُتے رکھیا اے۔ ایہہ طرز عمل غیر سنجیدہ وی اے تے کسے وی کھلاڑی نال زیادتی دے مترادف اے۔ کاش کہ ایہہ سب توں پہلے پاکستانی بن کے سوچدے لکھدے یا گل کردے اک وار فیر سلیم ملک نوں نشانہ بنایا جا رہیا اے حالاں کے اوہناں نے راشد لطیف نال صرف عطاء الرحمن دے الزامات دا جواب منگیا اے تے راشد لطیف دی سیاسی جماعت ایم کیو ایم دے حوالے نال حقیقت بیان کیتی اے۔ کیہ راشد لطیف نوں ایس دا جواب نہیں دینا چاہیدا۔ کیہ ایہناں دی حمایت وچ لکھن والیاں نوں راشد توں ایس الزام دا جواب نہیں لینا چاہیدا؟ کون نہیں جان دا کہ ترانوے چورانوے دے مختلف دوراں دے بعد کس کس کھلاڑی نے کیہ کجھ خریدیا تے کراچی وچ کیہڑا کھلاڑی ایہناں دوراں دے بعد مالدار ہویا۔ جنہاں نوں ایس حوالے نال کوئی شک اے اوہ راشد لطیف تے باسط علی نال ضرور سوال کرن۔ پاکستان ٹی وی انتظامیہ نوں وی راشد لطیف دے سوشل میڈیا اُتے صحافیاں دے بارے نامناسب لفظاں اُتے کاروائی کرنی چاہیدی سی حیران کن طور اُتے سرکاری ٹی وی دی انتظامیہ ہجے تیکر چپ اے۔
اک متنازع کرکٹر، اک پرتشدد جماعت دے نال تعلق رکھن تے ٹیم وچ نفرت ودھان والے کھلاڑی نوں اینی آزادی کیوں دتی گئی اے کہ جیہڑا ایس دا دل کرے اوہ بولدا رہوے۔کیہ نیب صرف سیاست داناں تے بیورو کریٹس نوں پھڑن لئی قائم اے کرکٹر اں دے آمدن توں ودھ اثاثیاں اُتے سوال کیوں نہیں ہو سکدا۔ وسیم اکرم دے اثاثیاں دی جانچ پڑتال کیوں نہیں ہو سکدی۔ پاکستان کرکٹ بورڈ حکام تے ایہناں دے معاہدیاں اُتے نیب حرکت وچ کیوں نہیں آندا۔ حالاں کے کرکٹرز تے ملک تے قوم دے سفیر سمجھے جاندے نیں ایہناں اُتے ایس حوالے نال زیادہ سختی ہونی چاہیدی اے۔ ترانوے چورانوے دے دوران کراچی وچ کس کس کھلاڑی نے فلیٹ خریدے ایس دا حساب وی تے کسے نوں دینا چاہیدا اے۔
وفاقی وزیر اطلاعات شبلی فراز نے قومی احتساب بیورو قوانین وچ ترامیم لئی پاکستان مسلم لیگ ن دا مجوزہ مسودہ سوشل میڈیا اُتے شیئر کر دتا اے۔مودہ شیئر کردے ہوئے شبلی فراز نے لکھیا کہ کئی دناں توں ن لیگ مطالبہ کر رہی سی کہ این آر او کس نے منگیا، تے ایہہ اوہ ذرائع تے دستاویزات جنہاں دی وساطت نال این آر او منگیا گیا۔ پہلی گل ایہہ وے کہ قوم عمران خان توں روایتی الزام تراشی تے صرف بیانات دی سیاست دی توقع نہیں کردی۔ عام بندا روایتی سیاست توں تنگ آ چکیا اے تے ن لیگ پیپلز پارٹی تے دیگر سیاسی جماعتاں دے مسائل ملک دے دیگر مسئلیاں توں وکھرے نہیں ایہہ کدی حل نہیں ہو سکدے۔
عام بندے نے اپنے مسائل حل کرن لئی پاکستان تحریک انصاف نوں ووٹ دتا سی۔ ہن میاں نواز شریف نوں واپس لیان دے مسئلے ہر شروع ہون والی بحث توں حاصل کجھ نہیں ہونا کیہ حکومت سلمان شہباز نوں واپس لیان وچ کامیاب ہوئی اے۔ کیہ حکومت اسحاق ڈار نوں واپس لیان وچ کامیاب ہو سکی اے ہور تے ہور پاکستان دے سب توں وڈے غدار الطاف حسین نوں واپس لیایا جا سکیا اے یقینا نہیں فیر میاں نواز شریف تے ہجے گئے نیں۔ نومبر وچ ایہناں نوں گھل کے اسیں اگلے نومبر ول ودھ رہے پر ہجے تیکر اسیں پچھلے نومبر وچ پھسے ہوئے نیں۔ میاں نواز شریف دی رپورٹاں نوں ڈاکٹر یاسمین راشد ویکھدی رہیاں، سرکار دے ڈاکٹرز ایہناں دا علاج تے نمونے لیندے رہے، حکومت دے اپنے ڈاکٹر نیں کیہ سب نے مل کے غلط نمونے لئے تے جھوٹی ریفرنس تیار کیتی۔ صوبائی وزیر صحت نوں کنج دھوکا دتا جا سکدا سی جے سب نے مل کے میاں نواز شریف نوں باہر کڈیا اے تے پہلے حکومت ایہناں ساریاں نوں کٹہرے وچ لیائے۔ جتھوں تیکر میاں نواز شریف نوں باہر گھلن دی گل اے تے اوہ باہر ایس لئی نیں کہ پاکستان تحریک انصاف آرام نال حکومت کرے تے میاں نواز شریف آرام نال بیرون ملک وقت لنگھان۔ پاکستان مسلم لیگ ن دی اعلیٰ قیادت دی مشرف دور وچ ملک بدری تے فیر واپسی نوں اج تیکر ن لیگ نے این آر او تسلیم نہیں کیتا اوہ کہندے نیں کہ ایہناں دا جانا تے آنا پرویز مشرف دی سہولت لئی سی ایہو کجھ اوہ پاکستان تحریک انصاف دی حکومت لئی کہندے نیں۔ ایس لئی زمین اُتے آن جس کم لئی ووٹ لئے نیں اوہ کم کرن عوام دے مسائل حل کرن۔ جے ایہناں دی بیرون ملک روانگی اینا وڈا تے اہم مسئلہ سی تے فیر جان دی اجازت دین دی کوئی لوڑ نہیں سی۔
سیف اللہ نیازی پاکستان تحریک انصاف دے چیف آرگنائزر نیں ایہناں اُتے وزیراعظم عمران خان بوہت اعتماد کردے نیں ،2018 دے انتخابات توں کجھ عرصہ قبل عمران خان تے سیف اللہ نیازی دے وچکار کجھ اختلاف ہوئے۔ ایہہ اختلافات کجھ حقائق تے غلط فہمی دی بنیاد اُتے سن۔ ہن ایہناں دی واپسی ہوئی اے غلط فہمیاں دور ہو گئیاں نیں تے حقائق نوں انظر انداز کر دتا گیا اے ایہناں دی ذمے داری اے کہ پاکستان تحریک انصاف دے نظریاتی کارکناں دی عزت وچ وادھے لئی کم کرن تے انج دے بندے جیہڑے نا صرف نظریاتی نیں بلکے مختلف شعبیاں تے اداریاں وچ کم کرن دے قابل ہون تے اپنے سیاسی تجربے تے مہارت نال ملک و قوم دی تعمیر وچ اپنا کردار ادا کر سکن ایہناں نوں اگے لیایا جائے۔ مختلف بورڈز تے اداریاں وچ جماعت دے مخلص تے قابل بندیاں دے انتخاب دی ذمے داری سیف اللہ نیازی نوں دے دتی گئی اے۔ جویں لہور ویسٹ مینجمنٹ کمپنی دے چیئر مین تے صوبے دے دیگر چیئر میناں دے بورڈز دا فیصلہ کرنا باقی اے انج دے عہدیاں اُتے جماعت دے مخلص تے قابل بندیاں نوں لایا جائے تاں جے سیاسی کارکناں دی حوصلہ افزائی ہوئے تے تھلڑی سطح اُتے کم کرن والیاں وچ جوش و جذبہ پیدا ہو سکے۔ پنجاب توں اعجاز منہاس انج دے بندیاں لئی سفارش تیار کردے نیں فیر مختلف اداریاں وچ تعیناتیاں ہوندیاں نیں پر جس انداز وچ اداریاں وچ تقرریاں تے تعیناتیاں ہو رہیاں نیں ایہناں وچ نظریاتی کارکن تے کدھرے نظر نہیں آندے جنہاں نوں اہم عہدیاں اُتے لایا جا رہیا اے ایہناں دا نظریات نال تے کوئی تعلق نہیں۔ خانہ پُری لئی کئی گمشدہ عہدیاں اُتے نظریاتی کارکناں نوں لایا گیا اے۔ ایہہ اوہ عہدے نیں جتھے اوہ کجھ کر نہیں سکدے۔
سیاسی طاقت رکھن والے تے گھٹ ای کسے عہدے اُتے لگدے نیں نجانے کدھرے ہور توں آن والے اہم عہدیاں اُتے چلے جاندے نیں۔ انج ملی بھگت نال نظریاتی کارکناں نوں نظر انداز کرن دا سلسلہ جاری اے۔ ایس ویلے وی نظریاتی کارکناں دا ایہناں دا حق نہ دتا گیا تے آئندہ انتخابات وچ پاکستان تحریک انصاف نوں شدید مسائل دا ساہمنا کرنا پئے گا کیوں جے ایہو لوک حقیقی معنیاں وچ جماعت لئی کم کردے نیں۔ جے ہن ایہناں نظریاتی بندیاں نوں لایا جائے گا تے ایہناں نوں کم کرن لئی اک ڈیڑھ ورہا لبھ سکدا اے کیوں جے دو ورہے ہو چکے نیں آخری ورہا تے وعدیاں دا ہوندا اے ایس وچ ترقیاتی کماں دا ویلا نہیں بچدا۔ جنہاں لوکاں نے عمران خان دے نال ورھیاں ایمان داری تے جوش و خروش نال کم کیتا اے ایہناں نوں عزت تے مقام دینا تے ایہناں دی صلاحیتاں توں فائدہ چکنا وزیراعظم عمران خان دی ذمے داری اے۔ جے حقیقی کارکن نظرانداز ہو رہے نیں سیف اللہ نیازی تے ایس دا جواب دینا ہوئے گا۔