اسپغول تے کج نا پھول
لھکت:ایثار رانا
پنجاب دا گبرو وزیراعلیٰ جگرا رکھے تے تگڑا ہو جائے، جے عتیقہ اوڈھو نوں شراب کیس وچ 210 پیشیاں، 12 ججاں دے تبادلے تے 9 ورہے دو مہینے بعد انصاف مل سکدا اے تے اوہناں نے کیہڑی قوم دی مج چوری کیتی اے ایہہ تے معجزیاں دا ملک اے ایتھے اپنے ویلے دا سب توں ٹائٹ، چیف جسٹس اک قتل دے مجرم دے جیل والے کمرے توں ملن والی شراب ثابت نہ کر سکیا۔ بھیا میرے ڈاڈے دی شراب وی شہد ہوندی اے۔ بس میرے وزیراعلیٰ نوں ایہہ گل سمجھ لینی چاہیدی اے کہ مولے نوں مولانہ مارے تے مولا نہیں مردا۔ اسیں تے پہلے ای مسلم لیگ دی ماڑی کملی جہی مریم اورنگ زیب نوں پیر فقیر مندے آں کیہ خوب اوہناں نے کہیا کہ سلیکٹڈ وزیراعظم نوں این آر او دین دا اختیار ای نہیں جویں غریب عوام دا ہر ویلے گھگو بولدا اے اونج ای سیاستدان دا تجربہ بولدا اے۔ اپنا سنتا سنگھ میوزیم گیا اوتھوں ایہناں توں اک کپ ٹٹ گیا۔ میوزیم افسر بولیا سنتا جی ایہہ کپ 5 سو ورہے پرانا سی۔
سنتا بولیا شکر اے میں سمجھیا نواں سی۔ سمجھ سمجھ دی گل اے مریم اورنگ زیب سمجھ گئیاں باقیاں نوں وی جلدی سمجھ آ جائے گی۔ کیوں جے، اے گھوڑی تے ایہہ گھوڑی دا میدان، لہٰذا سیاست دے میدان دے شیراں، چیتیاں، گھوڑے، گھوڑیاں تے کھوتیاں نوں ایہہ گل سمجھ لینی چاہیدی اے کہ این آر او عمران خان توں نہیں کسے ہور کھوکھے توں ملنا اے۔ کھوئے والی بابے دی قلفی دی جنی مرضی جمہوریت نما فرنچائز کھل جان بابے دی قلفی دی پورے ملک وچ اک ای دکان اے۔ مریم نے اصؒ وچ ایہہ کہیا اے کہ کدے جانا اے کدے تیرا دھیان اے۔ بابے دی کھوئی والی قلفی دی پنڈی وچ اصل دکان اے۔ سو میرے ہر دل عزیز وسیم اکرم پلس وچ ایس گیند دے وی قربان جاواں جیہڑی چمکا تے بنا کے کوئی دیندا اے تے سوئمنگ تسیں کردے او۔ ایہہ تسیں وی جاندے او کہ کہیا دھی نوں جا رہیا اے تے سنایا نوہ نوں۔ تہاڈی تے فلم وچ ایکشن سسپنس تے تھرل برقرار رکھن لئی انٹری کرائی گئی اے۔
میرے سابق وڈے بھرا چنگی طرح جاندے نیں کہ سیاست دے کھیڈ وچ کدی کدی، تھومارا، نہیں ہوندا۔ ایس لئی اوہناں نے مجبوری دی حیاتی دے بجائے مفروری دی حیاتی نوں بہتر سمجھیا۔ جتھے تسیں جدوں چاہو جتھے چاہو اپنی منجھی ڈاہ سکدے او۔ جمہوریت تے انقلاب وڑ گیا بھانڈے وچ بندے نوں اپنی زندگی عزیز رکھنی چاہیدی اے۔ اسیں تے پہلے آکھدے ساں ڈان نوں پھڑنا مشکل ای نہیں ناممکن اے ویکھ لوئو ڈان نے کنج تہاڈے عدالتی نظام، اداریاں تے عوامی جذبات دی ککڑوں کوں کرائی بس اینی جہی اوقات اے ایس نظام دی۔ ایتھے غریب بجلی چوری کرن اُتے جیل دے اندر تے طاقتور ملک توں باہر ہوندا اے۔ بھیا میرے ایس ملک دا نظام چیچو چیچ گنڈیریاں اے جس وچ دو تیریاں نیں تے دو میریاں نیں جس وچ چٹ وی تہاڈا تے پٹ وی تہاڈا۔ رہی ایہہ 22 کروڑ عوام نما کیڑے ایہناں دا کم آوے آوے جیوے جیوے کہندے مر جانا اے۔ تے انقلابی کروڑ دو کروڑ دی بلٹ پروف گڈی وچ اعلیٰ ترین پارلر دے میک اپ دے نال کافی دی چسکیاں لیندے نیں ورکر پابا جولاں ڈنڈے سوٹے کھان۔ ایہناں دے کپڑے لیرولیر ہو جان ۔ جسماں اُتے ڈنڈے کھا کے گومڑے پئے جان یا سراں وچ ڈنٹ پئے جان، بس جمہوریت دی گڈی اُتے چریٹھاں نہیں پیندیاں چاہیدیاں ایہناں دی زندگی دی قیمت گڈی اُتے پین والی معمولی جہی چریٹھ توں زیادہ نہیں۔ ٹی وی اینکر نے اپنے بنتا سنگھ توں پچھیا بنتا جی حکومت کنج جا رہی اے اوہ بولیا کاکا پتر ڈاڈیاں نوں حوراں نظر آ رہیاں نیں تے سانوں ملک الموت ، پر ایہہ بنتا سنگھ اے جنہوں ملک الموت نظر آندا اے اسیں کیہ کریے کہ سانوں ملک الموت وچ ای اپنے دکھاں دا مداوا نظر آندا اے۔ کوئی ملک الموت جمہوریت دے گیٹ اپ وچ کوئی اسلامی ہیرو کوئی لبرل ازم تے کوئی نویں نکور پاکستان دا کھیس وٹ دے ساہمنے آندا اے تے اسیں ہر وار ایس دی اک پپی ایدھے اک پپی اُودھے لینے آں۔ اپنی زباناں کٹ کے ایہناں ملک الموتاں دی تلی اُتے رکھ دینے آں کہ مبادا ایہناں دی شان وچ گستاخی نہ ہو جائے۔ ہے کوئی ہے جوپچھے بھیا جس آئین وچ لکھیا اے کہ پاکستان دی قومی زبان اردو ہوئے گی، اوہ آئین انگلش وچ کیوں اے؟ مجال اے کسے نکر توں اواز آئے بھیا آئین دی پہلی شق اے ریاست دا نظام قرآن و سنت دے تابع ہوئے گا فیر ریاست دا نظام کاروباد سود وچ کیوں؟ بس بھائی چپ کر جا دڑ وٹ جا کیوں جے بانگ دین والا مرغا ای ذبح ہوندا اے۔ یعنی جیہڑا بولے اوہ ای کنڈا کھولے۔
ہے تے گھسا پٹا لطیفہ، تھوڑا بدتہذیب تے اخلاقی گروٹ دا شکار، بس سمجھ لوئواپنی جمہوریت جہیا لطیفہ اے۔ سنتا سنگھ نے بنتا سنگھ نوں کہیا سردار جی فصل کنج ہوئی، بنتا بولیا تے تیری بھین نے نس کے ویاہ نہیں کیتا سی۔سنتا سنگھ بولیا میں فصل دا پچھیا تے تو ایہہ کیہ بکوا س کردتی۔ بنتا بولیا فیر گلاں وچوں گل تے نکل آئوندی اے۔ ساڈا لاڈلے بھانجے نمبر 2 مرتضیٰ وہاب نے وی خوب گلاں وچوں گل کڈی، ایہناں توں کراچی دی بارش اُتے سوال ہویا تے اوہ بولے فیر کیہ ہویا کیہ لہور وچ بارش دا پانی کھڑا نہیں ہوندا؟ بھیا پانی گوڈے گوڈے کھڑا ہوئے یا گٹے گٹے ڈوبدا غریب ای اے۔۔۔ کرپشن دا چاہے بحر معجمند ای کیوں نہ ہویا میرشرم نال ڈب نہیں مردا۔ غریب چاہے گھوٹکی دا ہوئے یا پتوکی اک جہیا ہوندا اے۔ آپس وچ ناراض ناراض تے پارٹیاں، فرقیاں تے زباناں وچ تقسیم تے ایہناں اُتے حکومت کرن والے اتوں اتوں رولا پاندے نیں تے اندروں اندروں لٹ کے کھاندے نیں۔ نہیں تے ہے کوئی جیہڑا صرف ایہہ دس دیوے نواز شریف نوں کس عدالت نے ضمانت دتی یا کس ادارے نے ایہناں دا ناں ای سی ایل توں کڈیا۔ بس ایہہ ملک اسپغول تے کنج نہ پھول اے۔
