سید وارث شاہؒ ہوراں دے مزار تے پِلاک ولوں محفل عارفانہ کلام

رپورٹ: آفاق بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام عظیم صوفی شاعر سید وارث شاہ ؒ دے 222 ویں سالانہ عرس دے موقعے اُتے ایہناں دے مزار واقع جنڈیالہ شیر خان، شیخوپورہ اک محفل عارفانہ کلام دا انعقاد کیتا گیا۔

جس وچ ڈائریکٹر جنرل پلاک ڈاکٹر صغرا صدف، ڈائریکٹر محمد عاصم چودھری، ڈپٹی ڈائریکٹر خاقان حیدر غازی، شفاعت عباس تے دیگر سٹاف توں علاوہ زائرین دی کثیر تعداد نے شرکت کیتی۔

محفل عارفانہ کلام وچ معروف شاعر ویر سپاہی نے ہیر وارث شاہ تحت اللفظ مع تشریح پیش کیتی تے بابا گروپ (حسنین اکبر و اسلم باہو) نے ہیر وارث شاہ اپنے مخصوص انداز وچ پیش کر کے خوب داد وصول کیتی۔ ڈائریکٹر جنرل پلاک ڈاکٹر صغرا صدف نے کہیا کہ صوفیاء کرام ساڈے ثقافتی ہیرو نیں، ایہناں دے مزارات ثقافتی سرگرمیاںدا مرکز نیں، ایتھے آ کے ہر بندے نوں دلی سکون تے راحت نصیب ہوندی اے۔ جیہڑا وی ایہناں نال محبت کردا اے ایہناں دے ای رنگ وچ رنگ جاندا اے، صوفیا دا فیض عام اج وی جاری اے۔ ڈائریکٹر پلاک محمد عاصم چودھری نے کہیا کہ ہیر وارث شاہ نوں پنجاب دی تاریخ دا درجہ حاصل اے جس وچ سانوں ایس دور دا جیتا جاگدا، پنجاب نظر آندا اے۔ ڈپٹی ڈائریکٹر پلاک خاقان حیدر غازی نے کہیا کہ ہیر وارث شاہ نوں علمی و ادبی تے عوامی حلقیاں وچ جیہڑی مقبولیت حاصل ہوئی اوہ اج تیکر کسے ہور کلام نوں نہیں مل سکی۔
ڈائریکٹر جنرل ڈاکٹر صغرا صدف دے نال پلاک دے سٹاف و دیگر زائرین نے سید وارث شاہ دے مزار اُتے چادر پوشی کیتی تے فاتحہ خوانی وی کیتی۔ بعد وچ زائرین ڈھول دی تھاپ اُتے دھمال وی پاندے رہے۔