اے پی سی دے اثرات
تحریر حمیداللہ بھٹی
پیپلز پارٹی دی میزبانی وچ اے پی سی دا انعقاد ہو چکیا اے پر کیہ اینوں آل پارٹی کانفرنس کہہ سکنے آں؟ میرے خیال وچ نہیں کیوں جے ایس وچ ساری جماعتاں شریک نہیں ہوئیاں کجھ حکومتی اتحاد دا حصہ نیں جے ایہہ کہو کہ ایہہ اے پی سی حزب اختلاف دی سی تے میرے خیال وچ ایہہ وی ٹھیک نہیں کیوں جے جماعتِ اسلامی ایس اجلاس وچ شامل نہیں ہوئی بلکہ کئی دیگر نکی جماعتاں نے وفد گھلنا وی مناسب نہیں سمجھیا ایسے طرح بی این پی مینگل گروپ دی طرفوں وی پہلے یا دوجے نہیں بلکے تیجے درجے دی قیادت شامل ہوئی پر ایہہ وی کیہ گھٹ اے کہ حزب مخالف نال تعلق رکھن والی زیادہ تر جماعتاں نے مل بہہ کے حکومت توں چھٹکارے دا لائحہ عمل طے کرن دا سوچیا ایہہ وکھری گل اے کہ ڈھیراں تجویزاں پیش ہوئیاں پر عمل درآمد اتے متفق نہیں ہو سکیاں پر اے پی سی دے بعد ملک وچ اک وار فیر الیکٹ، سلیکٹ تے پرفیکٹ دا شور مچ گیا جیہڑا جس دا طرفدار اے دلیل دی بجائے مرن مارن نوں تیار ہونا بالغ نظری نہیں کہہ سکدے زاتی مفاد اُتے اجتماعی مفاد نوں ترجیح دتے بنا ملک و قوم لئی سود مند فیصلے نہیں کیتے جا سکدے۔
اے پی سی دے اثرات دی گل کریے تے ایس وچ شائبہ نہیں کہ ملک وچ بھونچال دی کیفیت اے حالاں کے عدم اعتماد سنے اسمبلیاں توں وی استعفیاں دی گل التوا وچ پا دتی گئی اے جنوری وچ اسلام آباد دی طرفوں مارچ تے دھرنے دا عندیہ ظاہر ہویا اے البتہ پاکستان ڈیمو کریٹک موومنٹ دا اشارہ ضرور دتا گیا اے جتھوں تیکر تنقید دی گل اے حکومت نوں سقوط کشمیر دا ذمے دا ر ٹھہران، کسے ادارے دی مداخلت دے بغیر نویں انتخابات دا مطالبہ کرن دے نال ملک گیر جلسے جلوس کرن دا فیصلہ کیتا گیا فیر وی اے پی سی نے حکومتی صفاں وچ ہر ایس پیدا کر دتا اے وفاقی صوبائی وزراء طعن و تشنیع وچ مصروف نیں سب دی اک ای نکتے اُتے تان ٹٹدی اے کہ سزایافتہ نوں خطاب دا موقع کیوں دتا گیا؟ پر انج کہندے ہوئے شاید ایہناں نوں یاد نہیں رہندا کہ جس جج نے سزا دتی سی اوہ آپ وی ہن سزا یافتہ اے جے اے پی سی ٹائیں ٹائیں فش اے تے کرپٹ مافیا دے اجتماع اے اے تے ایہہ دریافت کرنا تے بن دا اے کہ جدوں کجھ ہویا نہیں تے تسیں فیر کیوں ہلکان او؟
اپوزیشن جماعتاں وچ اے پی سی دی وجہ نال اتفاق دی فضا بنی اے حالاں کے مونالا فضل الرحمن دی طبیعت پارلیمنٹ توں سخت مکدر اے تے اوہ فوری استعفیاں دا کارڈ کھیڈنا چاہندے نیں پر ایس کارڈ دی چال چلن اُتے کوئی جماعت آمادہ نہیں شاید ایسے لئی ایہناں دا خطاب براہ راست نشر کرن اُتے قدغن لائی گئی جس دا بلاول نال مولانا نے شکوہ وی کیتا اے ایہہ احتیاط ظاہر کردی اے کہ اپوزیشن ہجے ساری کشتیاں جلا کے میدان وچ نہیں آنا چاہندی بلکے واپسی دے محفوظ راہ رکھن چاہندی اے پی ٹی ایم دی شرکت توں اے پی سی اُتے فوج مخالف بیانیے دی حامل سیاسی قیادت دی چھاپ نوں نواز شریف دے خطاب نے مزید گہرا کیتا اے مقابلہ عمران دی بجائے ایہناں نوں لیان والیاں دی گل توں ثابت ہو گیا اے کہ ہجے اوہ اداریاں توں نفرت اُتے مشتمل بیانیہ چھڈن اُتے آمادہ نہیں تے مینوں نہیں لگدا اے کہ ایہہ بیانیہ اقتدار دی منزل اسان کر سکدا اے۔آصف زرداری نے تن ورہے لئی آن تے ہمیشہ رہن دی گل کر کے بوہت کجھ کھویا تے فیر بیان نوں سیاق و سباق توں ہٹ کے پیش کرن دیاں تاولاں پیش کردے رہے پر نواز شریف نے اے پی سی نال خطاب کردے ہوئے کسے مصلحت نال کم نہیں لیا جس دا مطلب اے کہ اوہ اقتدار دی بجائے محاذ آرائی ول جانا سیاسی لحاظ نال اپنے لئے زیادہ سود مند تصور کردے نیں حالاں کے پنجاب وچ انج دے بیانیے نوں پذیرائی ملنا بوہت مشکل اے جد کہ نواز شریف دا زیادہ تر ووٹ بینک پنجاب وچ اے ٹویٹر اُتے بنائے اکائونٹ وچ پہلا ٹویٹ ای ووٹ نوں عزت دیو توں وی ایہو واضح ہویا کہ اوہ کسے نقصان دی پرواہ کیتے بغیر اپنی ڈگر اُتے کاربند نیں شہناز شریف دے نال مریم نواز نوں اے پی سی وچ گھلن نال وی ایہو ظاہر ہویا کہ ایہناں نوں اداریاں توں راہ و رسم رکھن وچ کوئی دلچسپی نہیں پر یاد رکھن والی گل ایہہ وے کہ پاکستان وچ مسلح فوجاں دے خلاف گل سنن تے فیر تائید دا کوئی کلچر نہیں بلکے انج دی سوچ رکھن والے کوچہ ، اقتدار دے نال لوکاں دے دلاں توں وی اتر جاندے نیں فیر وی گھاٹے دا سودا کیوں کیتا گیا آیا کسے طرفوں حوصلہ افزائی ہوئی اے یا کجھ ہور گل اے تے اداریاں نوں ہدف تنقید بنان نال مسلم لیگ ن دی سیاست متاثر ہون دا غالب امکان اے۔
عمران خان فیصلیاں اُتے پچھتاوے دا اظہار کردے رہندے نیں نواز شریف نوں بیرون ملک گھلن نوں وی غلطی قرار دیندے نیں پر نواز شریف دی تقریر براہ راست وکھان والے میڈیا دے خلاف کاروائی کرن دا عزم ظاہر کرن والے وزیراں دی گل نہ من کے اوہناں نے اک پاسے تے خود اعتماد ی ظاہر کیتی اے دوجا میڈیا اُتے پابندیاں دے شور نوں وی غلط ثابت کیتا اے۔ ایہہ انج دی تبدیلی اے جس نال عمران خان دا سیاسی قد ودھیا اے کیوں جے ہن تے ایہہ گل واضح ہو گئی اے کہ براہ راست تقریر نشر کرن دی عمران خان نے آپ اجازت دتی اے اے پی سی وچ مسلم لیگ ن تے پی ٹی ایم دی یکساں سوچ نوں بے نقاب کیتا اے۔ نواز شریف لیان والیاں نال اعلان جنگ دی بجائے جے حالیہ اسکینڈل تیکر محدود رہندے تے مہنگائی دے ستائے لوک یقینی طور اُتے زیادہ پذیرائی دیندے مہنگائی دے خلاف لگ کرن دے خواہاں لوکاں نوں ہن نواز شریف دی مشکلاں وچ وادھا ہوندا وکھائی دیندا اے الطاف حسین نے وی اداریاں نال وگاڑ کر کے ملک دے خلاف نعرہ بازی کیتی ہن گھنٹیاں میڈیا اُتے بولن والے کس حال وچ نیں شاید ملک وچ گھٹ لوک ای جان دے نیں پر بیمار نواز شریف دے اداریاں اُتے تابڑ توڑ حملے سمجھ توں باہر نیں بظاہر تے انج محسوس ہوندا اے اے پی سی توں حکومت دی بجائے نواز شریف اُتے دبائو ودھنا بعید ازقیاس نہیں جنہاں نے پاکستان وچ سیاست کرنی اے اوہ ذہن نشین کر لین لندن وچ قیام پذیر نواز شریف دی تقریر تے پی ٹی ایم جہی جماعت نوں نال بٹھا کے کوئی اے پی سی حکومت لئی خطرہ پیدا نہیں کر سکدی۔
اے پی سی دے فیصلیاں اُتے اتفاق لئی اکتوبر توں دسمبر تن مہینے بہت اہم نیں۔جے فیصلیاں اُتے عملدرآمد دا طریقہ کار طے کر لیا جاندا اے تے اگلے ورھے مارچ وچ متوقع سینٹ الیکشن وچ پی ٹی آئی دا اکثریت حاصل کرن دا خواب متاثر ہو سکدا اے نہیں تے شہباز شریف سیمنٹ لان دا لکھ دعویٰ کردے رہن دراڑاں پینا تے اک پاسے متحدہ اپوزیشن دی سوچ عملی جامہ نہیں پہن سکدی پچھلے ہفتے آرمی چیف جنرل قمر جاوید باجوہ تے ڈی جی آئی ایس آئی جنرل فیض حمید نال سیاسی جماعتاں دے پارلیمانی رہنمائواں دی ہون والی ملاقات وچ کسے نے اداریاں دی مداخلت دی گل نہیں کیتی بلکے نیب دے طریقہ کار اُتے اعتراض کیتا اے۔ مزے دی گل ایہہ کہ نیب دے سربراہ دی تعیناتی دی ذمے دار پی پی تے ن لیگ دی قیادت اے۔ گلگت بلتستان نوں صوبہ بنان لئی منعقدہ اجلاس وچ نیب دا قصہ قطعی غیر مناسب سی جے اپوزیشن نے حکومت توں چھٹکارہ حاصل کرنا اے تے ایہنوں طریقہ کار وی طے کرنا ہوئے گا۔ اداریاں نال محاذ آرائی وچ توانائیاں ضائع کرن دی بجائے حکومت اُتے دبائو پانا ہوئے گا پر اے پی سی توں حکومت دی بجائے اداریاں دی مخالفت دا تاثر ملیا اے۔
