غداری نہیں،غیر ذمہ داری!
تحریر:شاہد ندیم احمد
میاں نواز شریف دی میڈیکل ٹیم دا اج وی ایہو اصرار اے کہ اوہ دل دے عارضے وچ مبتلا نیں تے ایہناں دا بائی پاس ہون والا اے، مزید ایہہ کہ ایہناں دے پلیٹلیس گھٹ ہون دی شکایت ہون پاروں ایہناں نوں علاج دی ہوبت لوڑ اے، جد کہ زمینی حقائق ایہہ نیں کہ نواز شریف دی سیاسی مصروفیات ویکھدے ہوئے انج لگدا نہیں کہ اینے شدید بیمار نیں۔ اوہ کافی پین تے دیگر مصروفیات دے علاوہ سیاست وچ بھرپور حصہ لے رہے نیں، ایس امر دے باوجود کہ تکنیکی طور اُتے اوہ نااہل قرار دتے جا چکے نیں، اوہناں نے ریاست مخالف بیانات دینا شروع کر دتے نیں، ایس اُتے وزیراعظم عمران خان نے تحفظات دا اظہار کردے ہوئے کہیا کہ میاں نواز شریف دے پچھے بھارت کھڑا اے تے اوہ ملک مخالف قوتاں دی پشت پناہی اُتے اک خطرناک کھیڈ کھیڈن دی کوشش کر رہے نیں۔ سیاست وچ اختیار دے حصول دی جدوجہد آئینی دائرے وچ رہ کے کیتی جاندی اے تاں ایس لحاظ نال ایہہ کم ذمہ داری دا تقاضہ کردا اے کہ بالغ نظر سیاستدان نہ صرف اپنے کردار اُتے داغ نہ لگن دین، بلکہ ایس امر نوں وی یقینی بنان کہ ایہناں دی گل بات طرز عمل تے حلقہ احباب دے رویاں نال کوئی ریاست مخالف گل نظر نہ آئے۔ ایس ویلے ملک مخالف قوتاں پاکستان نوں عدم استحکام دا شکار رکھنا چاہندیاں نیں۔ ملک دی سیاسی قیادت سارے حقائق توں بخوبی آگاہ نیں، ایس لئی ایہناں نوں اپنے باہمی اختلافات تے سیاسی مفادات نوں کدی انج دی سطح اُتے نہیں لیانا چاہیدا جتھے ریاست لئی خطرے پیدا ہو جان پر مسلم لیگ ن قیادت اپنی جمہوری ذمے داری نوں ریاستی مفادات دے تابع رکھن وچ ناکام نظر آندی اے۔
ایہہ کوئی لُکیا چھپیا معاملہ نہیں کہ شریف خاندان اقتدار وچ کس طرح آیا تے کس دی سرپرستی نال ایہناں نوں بارہا معافی، این آر او یا عبوری ریلیف ملدا رہیا اے۔ میاں نواز شریف تے ایہناں دے بھرا دا سارا خاندان منی لانڈرنگ، آمدن توں زاید اثاثے رکھن تے کئی طرح دے مالیاتی جرماں وچ رلت اے۔وزیراعظم عمران خان عرصے توں کہہ رہے نیں کہ نواز شریف سنے متعدد اپوزیشن رہنما حکومت توں این آر او طلب کر رہے نیں۔ ایس دا واضح ثبوت مسلم لیگ ن دے رہنمائواں دی آرمی چیف نال ملاقاتاں نیں جنہاں وچ نواز شریف تے مریم نواز لئی قانون دا کن مروڑن دی درخاست کیتی جاندی رہی اے۔ایہہ این آر او دی درخاست نہیں تے کیہ اے؟ آرمی چیف نے جدوں سیاسی معاملات توں لاتعلق دا اظہار کیتا تے حکومت دی انتظامی مشینری اُتے دبائو پان نوں جمہوریت مخالف قرار دتا تے مسلم لیگ ن دی قیادت نے اوہ ای لہجہ اختیار کر لیا جیہڑا ’’مجھے کیوں نکالا‘‘ مہم دے دوران اپنایا سی۔ ایس ویلے وی مسلم لیگ (ن) قائد نے اہم راز سینے وچ موجود ہون دی دھمکی دتی سی تے اج وی میزائل ٹیکنالوجی تے دفاعی معاملات نوں بین الاقوامی ذرائع ابلاغ وچ اچھال کے تاثر دے رہے نیں کہ ملک وچ ہر خرابی دی جڑ محافظ ادارے نیں۔
میاں نواز شریف دی مسلسل ملکی اداریاں اُتے تنقید تے اہم قومی رازاں نوں دنیا دے ساہمنے کھولن دے بعد اک حلقہ مسلسل ایہناں اُتے غداری دا مقدمہ چلان دی حمایت کر رہیا اے۔ ایس حوالے نال کجھ لوکاں دی خاصی سخت رائے وی اے، حکومت نوں اتفاق رائے کرن دی بجائے نفی کرنی چاہیدی اے پر ایہہ گل وی ضرور اے کہ کیہ ایہناں نوں گل بات کرنی چاہیدی سی؟ بیرون ملک بہہ کے ملکی سلامتی دے اداریاں، عدالتاں تے دیگر اداریاں نوں متنازع بنان دا موقف اپنانا کتھے دی حب الوطنی اے، کیہ ایس طرز عمل دے بعد قابل اعتبار رہے نیں، میاں نواز شریف نے تن وار بحیثیت وزیراعظم جیہڑا حلف چکیا سی کیہ ایس دی پاسداری کر رہے نیں، کیہ اپنے بیانات نال ملک دشمنی دے مرتکب نہیں ہو رہے، میاں نواز شریف نوں ایہناں گلاں دا جواب عوام نوں دینا ہوئے گا۔ میاں نواز شریف نے ملک دے سابق وزیراعظم دی حیثیت نال انتہائی غیر ذمے داری دا مظاہرہ کردے ہوئے ساریاں گلاں کر دتیاں جیہڑا حلف ایہناں نوں بیان کرن دی اجازت نہیں دیندا۔ میاں نواز شریف دی پیروی وچ مسلم لیگ ن دے دیگر رہنمائواں نے وی انج دے ای خیالات دا اظہار کرنا شروع کر دتااے۔ ایہو اوہ اقدامات نیں کہ جنہاں دی بنیاد اُتے میاں نواز شریف اُتے غداری دے مقدمے دا ماحول بن رہیا اے۔
جے کر میاں نواز شریف غدار نہیں ، غیر ذمے دار نیں، تاںایہناں دے بیاناں پاروں آئندہ آن والا ویلا مسلم لیگ ن قیادت لئی ساز گار وکھائی نہیں دے رہیا۔ ایس وچ شک نہیں کہ اک پاسے میاں نواز شریف نوں اقتدار توں وکھرا ہون دا بوہت دکھ اے جد کہ دوجے پاسے کرپشن دے الزاماں، مقدمیاں، عدالتاں توں مزید سزا ہو سکدی اے۔ سارا شریف خاندان عدالتاں وچ اے، اجوکے حالاں وچ میاں نواز شریف ولوں انج دے بیان ذہنی تنائو تے ایس بے یقینی دی وجہ نال نیں کہ دوبارہ اقتدار دے حصول دے سارے راہ بند ہو جاندے نیں۔ایہہ اقتدار دی ای ہوس اے کہ اوہناں نے حلف دی پاسداری دی بجائے ملکی اداریاں اُتے تنقید دا سلسلہ شروع کیتا اے جد کہ رانا ثناء اللہ کہندے نیں کہ کسے ادارے نال کوئی لڑائی نہیں پر حکومت دے ساہمنے نہیں جھکاں گے، جے اداریاں نال واقعی لڑائی نہیں تے فیر اداریاں نوں نشانہ کیوں بنایا جا رہیا اے۔ ایہناں نوں حکومت دے ساہمنے جھکن دا کسے نے نہیں کہیا حکومت ہر تنقید ضرور کرے، حکومت دیاں پالیسیاں نوں وی ہدف بنائو پر ایہہ وی دسو کہ کس دے اشارے اُتے قومی سلامتی دے اداریاں نوں ہدف بنایا جا رہیا اے۔
میاں نواز شریف سنے سیاسی ہم خیالاں نوں اپنی پالیسی اُتے نظر ثانی کرنی چاہیدی اے، ملک دے تن وار وزیراعظم رہن والے بندے نوں انج دی غیر ذمہ دارانہ گلاں زیب نہیں دیندیاں ۔
بلاشبہ میاں نواز شریف دے بیانیے نوں عوام نے وی مسترد کر دتا، ایس دا اظہار عوام نے احتجاجی ریلی وچ عدم شرکت کر کے دتا اے تاں حکومت نوں وی اپوزیشن دی تحریک نوں دبان لئی صرف الزاماں اُتے انحصار کرن دی بجائے مفاہمت دا راہ کڈنا چاہیدا اے، کیوں جے الزام جذباتاں نوں ودھیرا بھڑکاندے نیں، اوہناں نوں ٹھنڈیاں نہیں ہون دیندے، ایہہ ویلا انتشار دا نہیں، باہمی اتحاد دا اے۔ ایس لئی حکومت بے شک این آر او نہ دیوے، پر جمہوری عمل نوں جاری رکھن لئی اپوزیشن نوں مذاکرات دی پیشکش ضرور کرے تاں جے ماحول نوں ٹھنڈا کرن دی کوئی سبیل کڈی جا سکے، صرف نواز شریف نوں غدار کہندے رہن دی گل نہیں بنے گی، حکومت مخالف تحریک متحدہ اپوزیشن چلان جا رہی اے، ایہنوں رضا مند کرن دی کوئی کوشش وی تے ہونی چاہیدی اے، کیہ پوری اپوزیشن ای اداریاں دے خلاف یا غیر ملکی قوتاں دی آلہ کار بنی ہوئی اے؟ ثابت تے ایہو کرن دی کوشش اے کہ ملکی سیاست اج وی نابالغ اے، ایس وچ شعور دی سطح نہیں جیہڑے اج دے منظرنامے وچ نظر آنی چاہیدی اے اج وی اقتدار لئی چوہے بلی دا اک نہ ختم ہون والا کھیڈ جاری اے۔ ایس تناظر وچ اپوزیشن جماعتاں اُتے وی ذمے داری عائد ہوندی اے کہ اک حد فاصل دا تعین کریے کہ ایہناں نوں ریاست پاکستان دے مفادات عزیز نیں یا اک انج دے بیانیے دی حمایت کیتی جائے گی جیہڑا ملک دشمن طاقتاں نوں تقویت اپڑا رہیا اے۔
