ٹروتھ کمیشن ناگزیر اے

لكهت:آصف عنایت

شہباز شریف دی درخواست ضمانت دے مسترد ہون اُتے سب توں زیادہ جاندار تجزیہ شہزاد اکبر دا سی کہ ’’بھتیجی نے چاچے دی سیاست دا باب بند کر دتا‘‘ ایس دے بعد نیب انکوائری تے عدالتی فیصلے دی کیہ حیثیت رہ گئی اے؟ حکومت آکھدی اے عدالتی فیصلہ اے حکومت دا کوئی تعلق نہیں، ریلوے وزیر نوابی شوق دے مالک شیخ رشید جیہڑا پرویز مشرف دے آن تیکر نواز شریف دے ساتھی رہے فرماندے نیں دسمبر تیکر جھاڑو پھر جائے گی۔بہرحال عدالتی فیصلہ اے آئندہ وی فیصلے آندے رہے نیں پر نہ جانے کیوں عدالتی فیصلیاں دی تاریخ دے دریچے کھلدے چلے گئے۔ جسٹس محمد منیر دی سربراہی وچ مولوی تمیز الدین دے مقدمہ وچ صرف مسٹر جسٹس کارنیکئیس نے اختلافی نوٹ لکھیا باقی جسٹس صاحبان نے جسٹس منیر دی تقلید کیتی تے قوم دے داہ ورھے آمریت دے حوالے کر دتے گئے۔ یحییٰ خان دے 3ورھے دے بعد جدوں ایوب و یحییٰ دور ترقی نہیں بلکہ حق تلفی دی ہنڈیا دا ڈھکن چکیا گیا تے مشرقی پاکستان وکھرا ہو چکیا سی ۔ عدالتی فیصلہ سی جیہڑا ایوب خان لئی آیا تاں کجھ نہیں کہیا جا سکدا۔ ایوب، یحییٰ، ضیاء، مشرف، میاں نواز شریف دے پہلے دو ادوار وچ سارے وڈے سیاسی اقدام عدالتی فیصلہ جات دے گفٹ پیپر وچ سن فیر کیہ ہویا کہ مولانا فضل الرحمن نے زرداری صاحب دے دور وچ افتخار محمد چوہدری دی ہر مقدمے نوں اک اکھ نال ویکھن والی عدالت لئی ریمارکس دتے کہ ہن مورچہ سپریم کورٹ وچ اے۔ نواز شریف دے مقدمے وچ دوران سماعت جسٹس کھوسہ نے کہیا کہ فیصلہ 20 ورھے تیکر یاد رکھیا جائے گا شاید بھل گئے کہ مولوی تمیز الدین، جناب بھٹو کیس تے اودوں توں ہن اج تیکر جنہے سیاستی فیصلے عدالتاں توں لئے گئے قوم کدی بھل نہیں سکے گی تے ایس وچ عسکری قیادت دا کردار ہمیشہ نمایاں طور اُتے زیر بحث رہیا۔
اگلے دن چوہدری شفقت محمود کہندے نیں اپوزیشن وچ جان نہیں، نہیں تے حکومت کدوں دی ختم ہو چکی ہوندی گویا اقرار کردے نیں کہ کارکردگی نہیں اپوزیشن دی وجہ نال حکومت قائم اے۔ عجیب دور اے کہ اپوزیشن اپنی دشمن آپ تے حکومت وی اپنی دشمن آپ اے عوام کدھر جان۔ ایس ویلے سارا تنازع ای ایہہ کہ اپوزیشن نوں کس نے روکیا ہویا اے؟ قوم دے ان گنت مسئلے وچوں اک ایہہ وی اے کہ ساڈے اکثر دانشور، سب مکاتب فکر دے علماء سیاسی مفکر جھوٹ نوںاپنی زبان تے قلم توں کہہ کے تاریخ مسخ کر رہے نیں۔ جے کوئی گل کسے کاذب نے لکھ دتی۔ لوکاں نے روزی روٹی دا ذریعہ بنان لئی رقم کیتا تے ہن موجودہ دور وچ ایس گل دا حوالہ دین لئی 40,50 کتاباں وچ نقل شدہ گل کر دتی جائے گی جس دی بنیاد جھوٹ اُتے سی۔ ایہہ سیاسی مذہبی، تاریخی فکری میدان وچ سر عام ہویا اے۔ جعلی دانشور جناب ذوالفقار علی بھٹو لئی کہندے نیں کہ ایوب لے کے آیا حالاں کے سکندر مرزا ایہناں نوں کابینہ وچ لیائے بھٹو صاحب نے سکندر مرزا دے دور وچ اک کتابچہ ’’فیڈرل یا یونیٹری گورنمنٹ‘‘ دے عنوان توں شائع کرایا جس اُتے مرزا جیہڑا سر شاہنواز بھٹو نال خاندانی تعلق رکھدے سن دی حکومت سخت ناراض ہو گئی۔ فیر بھٹو صاحب نوں عالمی کانفرنس وچ گھلیا جس دے بعد وزیر تجارت بنایا۔ سکندر مرزا دی حکومت ختم ہون دے بعد ایوب خان دے بار بار اصرار اُتے اپنی بیوی تے ماںدے مشورے نال کابینہ وچ شامل ہوئے۔ 1977ء وچ جدوں ایجنسیاں، بنیاد پرستاں تے سیاسی مخالفین نے کردار کشی دی مہم چلائی تے بوہت ساری گلاں وچ اک ایہہ وی بکواس کر دتی کہ جناب بھٹو ایوب خان نوں ڈیڈی کہندے سن ایہہ 1977 وچ ایجاد کیتی گئی گل سی بالکل ایسے طرح جویں ’’ادھر تم ادھر ہم‘‘ والی سرخی لان والے شاہ جی درجناں کالم لکھ چکے کہ اوہ محض اخبار دی سرخی سی نہیں تے ایہہ الفاظ نہیں سن۔ جناب بھٹو نے 1965ء وچ استعفیٰ دتا جیل گئے تے 1967وچ پیپلز پارٹی دی بنیاد رکھی۔ میرے کالم دا موضوع تے کجھ ہور سی تاریخ دی مسخ شدہ تصویر صاف کرن دی کوشش کیتی اے۔ اپوزیشن دا ٹروتھ کمیشن دا مطالبہ انتہائی جائز تے قوم دے آئندہ سفر لئی ناگزیر اے۔ ڈیمو کریٹک موومنٹ نوں اگے چل کے کافی اتار چڑھائو دا ساہمنا ہوئے گا پر میاں محمد نواز شریف، بلاول بھٹو، مولانا فضل الرحمن تے دیگر جیہڑی خاموشی نوں زبان دے چکے نیں ایس دی بازگشت کئی دہائیاں آندی رہے گی جس طرح کہیا جاندا اے کہ عسکری قیادت سیاستداناں دے خلاف نہیں البتہ کجھ لوکاں دے متعلق تحفظات رکھدی اے۔ ایسے طرح اپوزیشن فوج نہیں کجھ سٹیک ہولڈرز دے متعلق تحفظات رکھدی اے۔ نواز شریف نے فوج نہیں کجھ جرنیلاں دی گل کیتی اے۔ ویکھیا جائے تے ایہناں دی کسے گل وچ جھوٹ نہیں البتہ ادھا سچ اے۔ نواز شریف نے تے کجھ جرنیلاں دی گل کیتی اے عمران خان تے پوری فوج نوں ای ہدف بناندے رہے نیں۔ احتساب دے حوالے نال ہر پاسے اک جنرل صاحب لئی گل کیتی جا رہی اے۔ سیاست داناں تے سویلین دے متعلق تے ایہہ گلاں نویاں نہیں سن پر ہن جدوں ایس سطح اُتے گلہون لگے تے ملک و قوم لئی لمحہ فکریہ اے۔ نواز شریف نے عمران خان نوں پاگل، سلیکٹڈ قرار دتا۔ شاید مولانا یا بلاول بھٹو کوئی متبادل مناسب لفظ استعمال کر سکیے۔ نواز شریف نے انگریزاں دے بعد کسے ہور دی غلامی تے مولانا وی غلامی وچ زندہ نہ رہن دی گل کیتی اے بلاول بھٹو نے پارلیمنٹ دا قبضہ چھڑان دا عندیہ دتا اے۔ حالات ایہہ نیں کہ نیب دے دعویٰ اُتے کوئی یقین نہیں کردا۔ حکومت جھوٹی تے اپوزیشن سچی وکھائی دین لگی۔ سڑکاں گھراں وچ آبرو ریزیاں ہو رہیاں نیں۔ روٹی روزی ناپید ہو گئی۔ بجلی دا بل دشمن ملک دا ہر مہینے حملہ لگن لگیا۔ دوائیاں، سبزیاں، پھل ٹرانسپورٹ، تن دا کپڑا روٹی کپڑا، مکان، بجلی گیس، عز ت نفس سب بنیادی حقوق توںحسرتاں وچ بدل گئے تے حکومت اے کہ یاوا گوائیاں توں ای فرصت نہیں۔ نہیں جاننا کہ اپنے وطن وچ کس دی حکمرانی اے پر دہائی دینا واں رحم کرو اپنی نک توںاگے ویکھو۔ موجودہ حکمراناں دا دعویٰ سی لوک باہر توں نوکریاں لین آن گے۔ چشم تصور وچ ذرا سوچو اج جے عرب، ایشیائی، یورپین ملک یا انگلینڈ یا امریکہ ویزے آسان کر دیوے تے وطن عزیز وچ شاید حکمران طبقے وی نہ رہن سوائے ویلے دے حاکماں دے۔ قوم دی زندگی اجیرن کر دتی اے۔ کوئی اک شعبہ انج دا نہیں جتھے کرپشن دا عروج نہ ہوئے۔ موجودہ حکومت نے بوہت وڈا کارنامہ کیتا اے کہ سفارش ختم کر دتی ہن صرف رشوت رہ گئی اے۔
عمران خان کہندے نیں میں وزیراعظم ہوندا تے استعفیٰ منگن اُتے ڈی جی آئی ایس آئی نوں برخاست کر دیندا۔ انج کرنا تے دور دی گل مرضی نال ساہ ای لے لین گے تے وڈی گل ہوئے گی۔ تسیں اک پیج اُتے ہوئو یا دونواں اُتے اک پیج ہوئے عوام دے دکھاں دا ازالہ کون کرے گا۔ ایہناں دی محرومیاں دا مداوا نہ ہویا تے موجودہ حکمران تاریخ وچ مکافات عمل، عبرت تے جھوٹے دے حوالے نال جانے جان گے۔ عمران کہندے نیں فوجی نرسری وچ پرورش نہیں پائی حالاں کے حمید گل دی انگلی پھڑ کے سیاست وچ آئے تے ایمپائر دی انگلی دا نعرہ لاندے رہے۔ پی ٹی آئی دی افزائش آئی جے آئی، ق لیگ، جونیجو لیگ و دیگر لیگ توں وکھری نہیں۔ ساڈی تاریخ الزامات، کردار کشی تے جھوٹ دی بنیاد اُتے اے لہٰذا ٹروتھ کمیشن ناگزیر اے۔