سانوں کیہ کرنا چاہیدا اے؟
لكهت:رابعہ رحمن
عرف عام وچ کہیا جاندا اے کہ سیاست عبادت دا ناں اے پر سانوں ہاں ایہہ یکسر طور اُتے صرف مفادات دا ناں بن کے رہ گیا اے۔ اسیں ہر ویلے الاپ تے جمہوریت دا الاپنے آں پر ذاتی تے اجتماعی طور اُتے ساڈی سوچ تے طرز عمل بالکل غیر جمہوری اے۔ ایسے طرزِ عمل دی بنا اُتے غیر جمہوری قوتاں نوں ایس گل دا جواز مل جاندا اے کہ اوہ جمہوریت دی بساط لپیٹاں تے اقتدار اُتے قبضہ کر لین۔ جدوں وی کہ ساڈے کول حزب اختلاف زیادہ طور اُتے مخالفت برائے مخالفت دی سیاست ای کردی اے تے فیر جدوں آپ حکومت وچ آندی اے تے ایسے طرز عمل دا ساہمنا کرنا پیا اے۔ باوجود حکومت دے ہر اقدام دی مخالفت کرنا حزب اختلاف دے ایمان دا جویں حصہ بن چکیا اے نتیجتاً ہر جائز اختلاف تے تنقید وی بے اثر ہو جاندی اے تے اپنی اہمیت کھو دیندی اے۔ ایس وچ وی کوئی شک نہیں کہ حکومت نوں وی عوامی بہبود دے بوہت سارے اقدامات نوں عملاً شروع کرن توں پہلے عوامی رائے لینا چاہیدا اے تاں جے عوام نوں اصل حقیقت دا پتہ چل سکے تے مفاد پرست عناصر ایہناں نوں گمراہ نہ کر سکیے۔ عوام دی شمولیت نال نہ صرف حکومت دی مقبولیت وچ وادھا ہوئے گا بلکہ منفی سیاست کرن والے وی ناکام ہون گے۔ اج کل جنہاں ایشوز اُتے منفی سیاست ہو رہی اے ایہناں وچ پٹرولیم مصنوعات دیاں قیمتاں تے ٹیکس جہے اقدامات شامل نیں۔ جے ایہناں سارے اقدامات دا وکھر ا وکھرا بغور جائزہ لیا جائے تے ایہہ حقیقت واضع ہو جاندی اے کہ ایہناں اُتے احتجاج عوام دی فلاح دی بجائے ایہناں نوں اُکسا کے اپنی سیاست نوں پروان چڑھانا اے۔ ایہہ گل ہر کوئی جان دا اے کہ پچھلی دو دہائیاں توں زیادہ ساڈا ملک شدید بدانتظامی تے مالی بحران دا شکار اے جس دی بدولت قومی خزانے نوں ہر مہینے ارباں روپئے دا نقصان برداشت کرنا پئے رہیا اے۔ ایس دوران انتظامیہ وچ وی تبدیلیاں کیتیاں گئیاں پر خاطر خواہ نتیجے حاصل نہیں ہو سکے۔اج ایس معاملے اُتے سب توں زیادہ شور شرابا کرن والی پارٹیاں وی اپنے دور وچ ایہناں مسئلیاں دے حل وچ ناکام رہی اے۔ ایہناں حالات وچ اداریاں نوں مل بہہ کے بہترین حکمت عملی اپنانی تے ایس اُتے عملدرآمد نوں یقینی بنانا چاہیدا اے کیوں جے پوری دنیا وچ بوہت ساری انج دیاں مثالاں موجود نیں جتھے خسارے وچ جان والی معیشت بہترین حکمت عملی ای توں ٹھیک راہ اُتے گامزن ہوئی۔ حکومت دی طرفوں کسے وی ادارے دے ملازمین دے تحفظ دی یقین دہانیاں دے بعد عوام بدحالی توں بچ سکدی اے۔ عوام سیاستداناں دے سیاسی مقصد تے حزب اختلاف دی سازشاں نوں بخوبی جان دے نیں ہن عوام نوں ہنیرے وچ رکھنا اینا آسان نہیں رہیا۔ جے واقعی ایہناں لوکاں نوں جیہڑی اج عوام دے ہمدرد بن کے مختلف ترقیاتی منصوبیاں اُتے واویلا کر رہے نیں ایس ویلے اوہ کیوں چپ سن جدوں ایہناں دی اپنی حکومت سی۔جتھوں تیکر بین الاقوامی مارکیٹ دا تعلق اے تے بے شک قیمتاں انتہائی گھٹ سطح اُتے آ چکیاں نیں پر ہر ملک اپنے حالات تے معیشت دی صورتحال دے مطابق کمی بیشی دا فیصلہ کردی اے۔ پاکستان وچ پٹرولیم مصنوعات سارے گوانڈھی ملکاں توں گھٹ نیں حالاں کے اوہ وی تے تیل بین الاقوامی منڈی توں ای خریددے نیں مزید اک انج دا ملک جتھے لوک ٹیکس دین توں نسدے ہون اوتھے حکومتاں لئی ایس طرح دے لازمی ٹیکس لانا اک مجبوری ہوندی اےتے انج ماضی وچ وی کیتا جاندا رہیا اے۔ رہیا سوال اوگرا دی سفارشاں دا تے ایہہ گل وی ذہن وچ رکھنی چاہیدی اے کہ کئی موقعیاں اُتے اوگرا قیمتاں بڑھان دی وی سفارش کردا اے پر حکومت نہیں پڑھاندی ایس ویلے تے کوئی اعتراض نہیں ہوندا۔ ایس احتجاج دا مقصد صرف تیل دیاں قیمتاں وچ کمی دا فائدہ حکومت تیکر نہ اپڑن دینا اے۔ ہمیشہ توں حکومتاں ٹیکس نیٹ ورک نوں بڑھان لئی مختلف سکیماں ساہمنے لیاندیاں رہیاں نیں ایہہ دوجی گل ایہہ کہ ایہناں دے صحیح فائدے گھٹ ای حاصل ہوندے نیں۔ ایہہ وی ایسے طرح دی اک کوشش اے پر آپ ٹیکس نہ دین والے ودھ چڑھ کے ایس دی مخالفت کر رہے نیں۔ جدوں تاجر احتجاج کر رہے سن تے ایہناں دے نال بھرپور اظہار یکجہتی کیتا گیا ہن حکومت نے مذاکرات دے ذریعے ایہناں نوں ٹیکس نیٹ ورک وچ شامل کرن دی کوشش کیتی اے تے دوجے طریقے نال احتجاج کیتا جا رہیا اے۔ ایس ساری صورتحال نال یقیناً غیر یقینی دی صورتحال وچ وادھا ہوئے گا جس نال حکومت تے کمزور ہوئے گی ای پر اصل نقصان تے پاکستان دا ہوئے گا۔ ایس منفی طرز سیاست نال سانوں بعض رہنا چاہیدا اے۔ایہہ منافقت، جھوٹ تے مفاد پرستی دی انتہا نہیں تے ہور کیہ اے۔ حکومتاں تے آندی جاندیاں رہندیاں نیں اج اختلافات تے احتجاج کرن والیاں نوں کل آپ وی ایسے طرح دی صورتحال دا ساہمنا کرنا پئے سکدا اے۔ایہہ بلی چوہے دا کھیڈ آخر کدوں ختم ہوئے گا تے کدوں اسیں بحیثیت مجموعی ذمے دارانہ طرز عمل دا مظاہرہ کراں گے۔ منفی سیاست کرن والے پاکستان دی بنیاداں لئی دیمک دا کردار ادا کرن توں باز آ جان کہ جس طرح دہشت گرداں لئی اللہ دی مدد نال جنرل قمر جاوید باجوہ جہیا سپہ سالار پاکستان فوج نوں ملیا اے ایسے طرح انشاء اللہ ایہناں مفاد پرست منفی سیاست کر کے عوام تے ملک دی سالمیت دے در اُتے ہون والیاں لئی وی ساڈے وچوں ای کوئی اللہ ولوں قائدین بن کے ابھرے گا تے ایہناں نال ملک نوں پاک کرن لئی ضرب عضب دے نال نال ضرب آہن شروع کر دیوے گا ۔ انشاء اللہ۔ عوام نوں اپنے زور بازو اُتے اینا اعتماد اے کہ اوہ کسے وی مشکل وچ ہمت نہیں ہارن گے۔ نظریہ پاکستان دی حفاظت عسکری طاقتاں دے نال نال عوام نے وی ہر میدان وچ کیتی اے۔ اج وی ساڈے جوان تے افسر بڑی دلیری تے ہمت نال مقابلہ کردے ہوئے اپنی جان ایس وطن دے ناں کردے نیں۔
