اپوزیشن تحریک نہیں ، مہنگائی حکومت ہلا دیوے گی!
لكهت:شاہد ندیم
پیپلز پارٹی تے مسلم لیگ ن قیادت نے ذاتی مفادات لئی ملک دی بنیاداں نوں کمزور کیتا پر ایس دا مطلب ہر گز نہیں کہ مسلسل ودھدی ہوئی قیمتاں دی ذمے دار وی اپوزیشن اے۔ وزیراعظم عمران خان نے برسر اقتدار آن دے بعد ملک نوں ریاست مدینہ دی طرز اُتے چلان دا وعدہ کیتا سی پر دو ورھے لنگھن دے باوجود عوام دی توقعات اُتے پورا نہیں اتر سکے ۔ حکومت دے پہلے دو ورھے وچ ای مہنگائی دا گراف اینا اُچا ہویا کہ عوام دا تنفس دا رشتہ برقرار رکھنا محال ہو چکیا اے۔ اک پاسے حکومتی وزیر ایس مہنگائی دا اعتراف کردے نیں جد کہ دوجے پاسے کابینہ دی اقتصادی رابطہ کمیٹی نے سوئی ناردرن گیس نوں 69 ارب روپئے دا ریونیو شارٹ فارل پورا کرن دی اجازت دے دتی اے۔ اک ورھے پہلاں وی حکومت نے قومی خزانے دا سالانہ 154 ارب روپئے دا خسارہ پورا کرن لئی گیس دیاں قیمتاں وچ 10 توں 143 فیصد وادھا کیتا سی۔ ایس دے بعد عوام سراپا احتجاج ہوئے تے وزیراعظم عمران خان نے گیس دیاں قیمتاں وچ وادھے دا نوٹس لے کے صارفین نوں پیسے واپس کرن دا اعلان کیتا سی۔ حکومت نے اک وار فیر بجلی و گیس دیاں قیمتاں وچ وادھے دا اعلان کیتا اے۔ایس توں پہلاں جان بچان والیاں دوائیاں دی قیمتاں وچ 9 توں 262 فیصد تیکر وادھا کیتا گیا اے۔ عوام دوائیاں دیاں قیمتاں وچ بے تحاشہ وادھے اُتے احتجاج ای کر رہے سن کہ حکومت نے بجلی، گیس دیاں قیمتاں وچ وادھا کر دتا اے۔ بجلی و گیس دے بل جدوں زیادہ آن گے تے عوام اک وار فیر حکومتی پالیسیاں دے خلاف سراپا احتجاج ہون گے۔ اپوزیشن جماعتاں وی حکومت دے خلاف صف آرا ہو چکیا نیں۔ حکومتی پالیسیاں دے نتیجے وچ ودھدی مہنگائی، بے روز گاری، لاقانونیت، ادارہ جاتی بدنظمی تے ملکی سکیورٹی نوں لاحق خطریاں دی بنیاد اُتے عوام سخت پریشان و مضطرب نیں۔جے ایس صورت حال دے پیش نظر حکومت نے اپنی پالیسیاں اُتے نظر ثانی نہ کیتی تے عوام حکومتی اقدامات پاروں اپوزیشن جماعتاں دے احتجاج وچ شامل ہو سکدے نیں۔
تحریک انصاف حکومت نوں اقتدار وچ آئے دو ورھے توں ودھ دا عرصہ ہو گیا اے پر عوامی مسئلے گھٹ ہون دی بجائے ودھدے جا رہے نیں ، مہنگائی دا جن قابو توں باہر اے۔ ملاں نے چینی، آٹا مہنگا کر دتا، دکاندار من مانی قیمتاں وصول کر رہے نیں جد کہ انتظامیہ مہنگائی کنٹرول کرن اُتے کوئی توجہ نہیں دے رہی۔ عمران خان نیا پاکستان تے ترقی یافتہ پاکستان دا سنہری خواب وکھا کے اقتدار وچ آئے سن، پر نویں پاکستان دے حکمراناں نے بجلی، گیس سنے ہر شے دی قیمت ودھان نوں نیا پاکستان دا ناں دے دتا اے۔ عام بندا پہلے ای غریب تے تنگدستی دے ہتھوں مجبور تکلیف دہ زندگی لنگھان اُتے مجبور سن، ہن دو ویلے دی روٹی پوری کرنا وی جوئے شیر لیان دے مترادف بنا دتا گیا اے۔ حکومت دی مہنگائی کنٹرول کرن وچ ناکامی دے متعلقہ محکمے ذمے دار نیں، انتظامیہ دی ناجائز منافع خور مافیا نال ملی بھگت مہنگائی گھٹ کرن وچ وڈی رکاوٹ اے۔ حکومت نوں مہنگائی توں نجات لئی جتھے کڑے اقدامات چکنے چاہیدے نیں اوتھے پرائس کنٹرول کمیٹیاں نوں وی خواب غفلت توں جگانا ہوئے گا۔ کابینہ ولوں مہنگائی اُتے محض تشویش دا اظہار نہیں ہونا چاہیدا، ایس دے ذمے داراں دی گردن وی ناپی جانی چاہیدی اے۔
تحریک انصاف حکومت دے دو ورھے لنگھن دے بعد عوام وزیراں مشیراں دی دلیلاں اُتے کن دھرن لئی تیار نہیں کہ غربت، مہنگائی، بے روزگار وچ وادھے دے ذمے دار سابقہ حکمران نیں تے مہنگی روٹی سابقہ حکومت دی عوام دشمن پالیسی دا شاخسانہ اے۔ دو سالہ حکمرانی دے بعد گران فروشاں، ذخیرہ اندوزاں، سمگلراں تے دیگر مافیاز نوں قابو کرنا حکومتی ٹیم دی ذمے داری اے، صوبیاں دے وزراء اعلیٰ تے وفاقی و صوبائی وزراء مہنگائی مافیاز دے ساہمنے بے بس نیں تے سابقہ حکمراناں نوں مودالزام ٹھہراندے رہنا عوام نوں عوام نوں دھوکہ دین دے برابر اے۔ جے حکومت مہنگائی کنٹرول نہ کر پائی، آٹے، چینی، سبزی ، گوشت، چائے تے گھیو دیاں قیمتاں انج ای ودھدیاں رہیاں تے بجلی و گیس دے نرخاں وچ ہوشر با وادھا ہوندا رہیا تے اپوزیشن تحریک چلائے نہ چلائے عوام آپ ای ایہنوں چلدا کرن دی تدبیر سوچاں گے۔ میاں نواز شریف دی دوجی حکومت دے دوران شیخ رشید ٹھیک کہیا کردے سن کہ جس گھر وچ مہنگی بجلی، گیس دا بل جاندا اے، اوتھے دے ووٹر ساڈے توں نفرت کرن لگدے نیں۔ اپوزیشن اتحاد کوشش دے باوجود حکومت دا کجھ نہیں وگاڑ سکدے پر غربت تے مہنگائی حکومت دی بنیاداں نوں ہلا سکدی اے، ایس لئی مہنگائی دا تدراک جنہی جلدی ہوئے چنگا اے، اپوزیشن نوں ریاستی ادارے مل کے غیر موثر کر سکدے نیں پر مہنگائی دا زور و جبر نال مقابلہ ممکن اے نہ چکنی چپڑی گلاں نال مزید وقت گزاری کیتی جا سکدی اے۔
جے تحریک انصاف نے ویلے دی نزاکت دا احساس کردے ہوئے عوام دیاں امنگاں دے مطابق ایہناں نوں ریلیف فراہم نہ کیتا تے فیر عوام ایہناں دے نال پیپلز پارٹی تے مسلم لیگ ن نال وی بھیڑا برتائو کر سکدے نیں۔ ایس لئی وزیراعظم بجلی، گیس تے ضروری شیواں دی ودھدی قیمتاں دا نوٹس لین تے عوام نوں ریلیف فراہم کرن دی حتی المقدور کوشش کرن ۔ جے حکومت قیمتاں نوں عوام دی پہنچ وچ لیان وچ کامیاب ہو گئی تے اپوزیشن دا احتجاج آپ ای دم توڑ جائے گاپر جے حکومت اک وار فیر قیمتاں کنٹرول نہیں کردی تے فیر مہنگائی دے ستائے عوام نوں سڑکاں اُتے آ کے اپوزیشن دی تحریک دا حصہ بنن توں روکنا اوکھا ہو جائے گا۔
حکومتی وزراء تے اداریاں نوں اپنی بے عملی اک پاسے رکھدے ہوئے مہنگائی وچ کمی تے معاشی استحکام لئی کم کرنا ہوئے گا، جے بروقت اقدامات وچ مزید تاخیر کیتی گئی تے سپ نکل جان دے بعد سب لے کے پٹدے ای رہ جان گے۔
موسمی حدت وچ کمی دے باوجود سیاسی حالات وچ گرمی تے تلخی ودھ رہی اے حالاں کے ملک نوں پیش آئے اندرونی و بیرونی چیلنجاں دا تقاضہ سیاسی استحکام اے انج محسوس ہوندا اے کہ سیاسی قیادت نوں اپنے مفادات دے تحفظ دے سوا کجھ کرنا ای نہیں آنداا پاکستان دے بعد آزادی حاصل کرن والے کئی ملک اج ترقی دی نس بھج وچ ساڈے توں اگے نکل گئے نیں پر اسیں قرضے لے کے گزارہ کرن اُتے مجبور نیں۔ ایس حالت دی ذمے
