ٹک ٹاک دا جنگل تے دنگل
لكهت:اسد اللہ غالب
ایس ورھے 7 جولائی نوں مصر وچ5 خواتین نوں 2 توں لے کے 5 ورھے تیکر قید دی سزا سنائی گئی، ایہہ سزا ایہناں نوں اک موبائل ایپ ٹک ٹاک دے غیر اخلاقی استعمال دی بنا اُتے دتی گئی
پاکستان وچ وی ایہہ ایپ اپنے رنگ وکھا رہی سی تے نیڑے سی کہ ایہہ ساڈے معاشرے نوں وی لے ڈبدی کہ وزیراعظم عمران خان دی ہدایت اُتے پاکستان ٹیلی کمیونیکشن اتھارٹی نے ایہنوں بلاک کر دتا۔ پاکستان ٹیلی کمیونیکیشن اتھارٹی نوں عوام الناس دی طرفو انج دی شکایات متواتر موصول ہو رہیاں سن جنہاں وچ نوجواناں دی غیر اخلاقی حرکت ولوں توجہ دلوائی گئی سی۔ انج دے واقعے وی ساہمنے آئے جنہاں وچ جرم دی تشہیر کیتی جا رہی سی۔ ٹک ٹاک دے ذریعے فحش ویڈیوز بنائی جاندیاں سن جنہاں دی وجہ نال نوجواناں تے بالاں دی مسلسل برین واشنگ ہو رہی سی، تے اوہ پڑھائی توں دور ہو رہے سن۔ ایس ورھے پاکستان وچ 46 لکھ لوکاں نے ٹک ٹاک ایپ نوں ڈائون لوڈ کیتا۔ ایس دی اک وجہ کرونا لاک ڈائون سی جس دوران وچ بچے تے نوجوان سکولاں تے کالجاں دی بجائے گھراں وچ مقید سن تے ایہناں ای بے کار شیواں تے فتنیاں دے ذریعے اپنا ویلا لنگھان وچ مصروف سن۔ ایس طرح دی قبیح مصروفیات نال بالاں تے نوجواناں نوں کئی طرح دے نقصان ہو رہے سن۔ ایہناں دیاں اکھاں اُتے غیر ضروری بوجھ پئے رہیا سی۔ ایہناں وچ کئی کئی گھنٹے موبائل فون نوں ویکھن دی وجہ نال اونج وی بالاں دی اکھاں اُتے بھیڑا اثر پئے رہیا اے۔
نکے نکے بالاںنوں عینکاں لگ چکیاں نیں تے ایس دی وجہ موبائل فون دا بے جا استعمال اے۔ اُتے انٹرنیٹ دے پیکج اینے سستے کر دتے گئے نیں کہ بالاں تے نوجواناں دی عید ہو گئی اے۔ اوہ 10 روپئے وچ چار چار گھنٹے مسلسل گیم کھیڈدے نیں پر ایہناں دا دل فیر وی نہیں بھردا۔ ایہہ مسلسل اپنا ویلا تے پیسہ برباد کرن وچ لگے نیں۔
وزیراعظم عمران خان دے معاون خصوصی برائے سیاسی ابلاغ شہباز گل دے مطابق غیر اخلاقی ویڈیوز ٹک ٹاک ایپ دی بندش دی وجہ بنی۔ وزیراعظم نال کجھ والدین نے ایس متعلق شکایت کیتی سی تے ویڈیوز وی گھلیاں سن۔ انج ای بیان وفاقی وزیر اطلاعات شبلی فراز دا وی ساہمنے اآیا سی جس وچ اوہناں نے کہیا کہ وزیراعظم ٹک ٹاک تے ایس جہی دیگر ایپس دے منفی استعمال تے معاشرتی وگاڑ دے حوالے نال فکر مند نیں۔
امریکہ نے وی ٹک ٹاک نوں بین کرن لئی متعلقہ فرم نوں پیشگی مطلع کر دتا اے۔ بنگلا دیش تے دیگر کجھ ملکاں وچ وی ایہہ ایپ کجھ عرصے لئی بند کیتی جاندی رہی اے۔
ہن ایس دے نقصانات تے افسوسناک واقعات ول آندے نیں۔ ہجے کل دی گل اے کہ گوجرانوالہ وچ اک طالب علم نہر کنارے ٹک ٹاک ویڈیو بنان دے دوران نہر وچ جا ڈگیا تے لاپتہ ہو گیا۔ تاحال ایس نوجوان دا کوئی پتہ نہیں چل سکیا۔ اک ہور خبر دے مطابق کراچی وچ اک نوجوان اپنے تن ساتھیاں دے نال تیزی گڈی چلاندے ہوئے ایکسیڈنٹ وچ جان دی بازی ہر گیا تے ایس دی وجہ وی ٹک ٹاک ویڈیوسی جیہڑی تیز رفتار ڈرائیونگ دے دوران بنائی جا رہی سی۔دوجی خبر وچ کراچی وچ ای تنویر نامی اک نوجوان ٹک ٹاک دے دوران پستول صاف کر رہیا سی کہ گولی چل گئی تے اوہ اوتھے ڈھیر ہو گیا۔ ٹک ٹاک غیر اخلاقی بلکہ غیر انسانی حرکتاں کیتیاں جاندیاں نیں۔ منڈے اپے سر دے ادھے وال کٹوا کے عجیب و غریب مخلوق دی شکل اختیار کر لیندے نیں جویں اوہ زمین دی بجائے مریض توں آئے ہون۔ ڈانس، موسیقی تے بیہودہ ڈائیلاگ دے امتزاج توں بنن والی ایہہ کجھ سیکنڈ دی ویڈیوز نویں نسل لئی زہر قاتل دی حیثیت رکھدیاں نیں جنہاں دا سلسلہ بند کر کے وزیراعظم عمران خان نے نہ صرف معاشرے نوں اخلاقی تباہی توں بچا لیا اے بلکہ کروڑاں والدین دا دل وی جت لیا اے۔
ایس ایپ دے ذریعے علماء سیاست داناں تے ریاستی داراں دی تضحیک کیتی جاندی اے۔ ڈیڑھ اٹ دی مسجد دا مولوی وی فرقہ پرستی دا زہر ودھا کے خانہ جنگی دی فضا پیدا کرن وچ مصروف اے۔ مضحکہ خیز کارٹون نما فلماں نال ہر کسے دی پگڑی اچھالی جاندی اے۔ سیاسی جماعتا نے اپنے اپنے خفیہ سیل بنا لئے نیں جیہڑے ٹک ٹاک اُتے مخالف سیاست داناں دی تحقیر تے تضحیک کردے نیں۔ کجھ لوک تے اپنے دوستاں تیکر دی دل آزاری دا باعث بن دے نیں تے انج پاکستانی معاشرہ بے لگام ہوندا جا رہیا اے۔ ستم ظریفی دی انتہا ایہہ اے کہ اک پاسے ملک وچ شور برپا اے کہ آزادی اظہار میسر نہیں تے دوجے پاسے ایس قدر بے محابا تے شتر بے مہار آزادی میسر اے کہ جس کسے نوں چاہن ایس دی درگت بنا دین۔آزادی اظہار اُتے پابندی دا رونا رون والا طبقہ اپنے اخباراں نوں وی مذموم مقصد لئی استعمال کردا اے فیر ایہناں نوں اپنا چینل وی میسر اے تے ایس اُتے مسزادایہہ کہ اک چینل توں اٹھدے نیں تے دوجے اُتے جا بیٹھ دے نیں تے جیہڑی گالی گلوچ کرنی ہوئے لاروک ٹوک کردے نیں۔ ایس اُتے وی دل دی بھڑاس نہ نکلے تے بی بی سی اردو ڈاٹ کام، وائس آف ، امریکہ ڈاٹ کام نوں پلیٹ فارم مل جاندا اے پر ایہناں نوں چین فیر وی نہیں آندا تے ٹک ٹاک دا ہتھیار استعمال کردے نیں تے یوٹیوب فیس بک تے ٹوئٹر یا انسٹاگرام اُتے دل دے پھپھولے پھوڑدے نیں آزادی اظہار دا تے بس رونا اے اصل وچ اوہ آزادی اظہار دا حق منگدے نیں کہ جس دی چاہیے پگڑی اچھالیے۔
آزادی اظہار، آزادی آزاد تے آزادی عمل دی کوئی انتہا نہیں، بھک اے کہ مٹدی نہیں پر حکومت چپ تماشائی نہیں بن سکدی۔ ایہنوں آخر کار قانون دی بالادستی لئی اقدام کرنا پیااے۔
