سائبان ویلفیئر سوسائٹی، روزوار بھلیکھا تے گوجرانوالہ آرٹس کونسل دی سانجھ نال ’’ نویدِ بہار ‘‘ مشاعرہ

رپورٹ: آفاق بٹ

گوجرانوالہ دی ادبی شخصیات وچ عتیق انور راجہ ہوراں دا اک اپنا مقام اے، او سائبان ویلفئیر سوسائٹی تے روزوار بھلیکھا دی سانجھ نال مختلف مشاعرے تے سیمینارز دا پربندھ وی کردے نیں۔ عتیق انور راجہ ہوراں دی شخصیت تے تنظیم دی اک خاص گل ایہہ ہے کہ او نویں نسل تے نوجوان شاعراں نوں پرموٹ کرن دے قائل نیں۔

ایہی وجہ اے کہ اوہناں دی تقریبات وچ نوجوان شاعراں ، ادیباں دی وڈی تعداد رلت کردی اے۔ عتیق انور راجہ ہوراں دی پنجابی زبان ، رہتل تے ادب نال محبت دی وجہ توں اوہناں دے پروگرامز وچ رلت کرن والے لوک وی متاثر نیں تے اوہناں دے مشاعریاں وچ شعراء دی وڈی تعداد پنجابی شاعری ای سنائوندی اے۔ ایسے طرح او سکولز تے کالجز وچ ہون والے پرگرامز وچ وی پنجابی زبان دی اہمیت اُتے گل بات کردے نیں تے اساتذہ اور نویں نسل دی اپنی ماں بولی تے رہتل نال محبت جگان وچ کامیاب وی ہو رہے نیں۔

پچھلے دیہاڑگوجرانوالہ آرٹس کونسل ہال وچ روزوار بھلیکھا تے سائبان ویلفیئر سوسائٹی رجسٹرڈ دی سانجھ نال نویدِ بہار دے عنوان توں اک مشاعرے دا انعقاد کیتا گیا۔ سپرنٹنڈنٹ سنٹرل جیل ساجد بیگ نے کہیا کہ ٹیم سائبان حقیقی معنیاں وچ اپنی زبان، روایات تے ثقافت دے فروغ لئی کم کر رہی اے۔ عتیق انور راجہ نے کہیا کہ لوک پچھدے نیں کہ خزاں دے دناں وچ بہار دے ناں توں مشاعرے دا کیہ مطلب اے تے ایہناں دی خدمت وچ عرض اے کہ دنیا وچ اج اوہ ای ملک ترقی یافتہ اکھوا رہے نیں جنہاں نے اپنے نوجواناں دی بہتر تربیت کیتی۔ تربیت دا بہترین طریقہ ایہہ ہے کہ نوجواناں نوں مسلسل انج دی سرگرمیاں دا حصہ بنان دی کوشش کیتی جائے جنہاں وچ اوہ اپنے جذبات دا اظہار کر سکدے نیں۔ کھل کے ہَس کھیڈ سکدے نیں۔

گنگنا سکدے ہون تے قہقہے وی لا سکن۔ بدقسمتی نال پاکستان وچ مجموعی طور اُتے انج کدی وی نہیں ہویا ایسے لئی ساڈا اج دا نوجوان ذہنی گھٹن دا شکار اے۔ ایہہ گھٹن ساری حیاتی ایس دے نال چلدی اے۔ اسیں پچھلے پنج ورھیاں توں لوکاں دے رویاں وچ بہتری لئی ادبی تے ثقافتی تقریباں تے سیمینارز دا اہتمام کرن دی کوشش کر رہے آں تے ساڈی کامیابی ایہہ ہے کہ ساڈے ایس کارواں وچ ہر طبقہ فکر دے لوک شامل ہو رہے نیں۔ سعید احمد تاج سابق صدر چیمبر آف کامرس گوجرانوالہ نے کہیا کہ شاعری مشاہدے تے احساسات دا نام اے جس قلم کار دا مشاہدہ چنگا ہوئے گا جس دے اندر دا انسان جنہا باشعور ہوئے گا جیہڑا جنہا اخلاقی قدراں دا پاسدار ہوئے گا اوہدے قلم دی کاٹ اوہنی ای طاقتور ہوئے گی۔میں شروع دن توں عتیق انور راجہ تے ایہناں دی ٹیم دیاں کوششاں دا معترف آں۔ ایہہ لوک حقیقی معنیاں وچ اپنی زبان، روایات تے ثقافت دے ودھا لئی کم کر رہے نیں۔ ایہہ لوک ویلے دی پابندی دی کوشش کردے نیں۔ ایس لئی میں اپنی مصروفیات وچوں ویلا کڈ ھ کے ایہناں دے مشاعراں تے سیمینارز وچ شرکت کرن دی کوشش کرنا واں۔

نومنتخب صدر چیمبر عمر اشرف مغل نے کہیا کہ ایس تقریب دا حصہ بن کے بوہت خوشی محسوس کر رہیا واں تے مینوں ایہہ احساس ہو رہیا اے کہ اسیں چیمبر دے پلیٹ فارم توں اپنا بھرپور کردار ادا کرنا اے۔ اسیں نوجواناں نوں ادبی تے ثقافتی ماحول نال وابستہ کر کے معاشرے نوں پرامن بنان وچ اپنا کردار ادا کرئیے۔ ایس شاندار مشاعرے دی صدارت ڈاکٹر صغیر احمد صغیر نے کیتی جد کہ مہمانانِ گرامی قدر وچ بلال ثاقب،اسامہ مغل،صاحبزادہ گلزیب احمد خان،وحید الیاس مغل،حافظ عبدالقادر،سہیل بشیر، سید واجد علی،سہیل بشیر،چوہدری محمد انور، سجاد مشتاق،رانا اظہر،سجاد سردار وڑائچ،طارق مغل تے دیگر شامل سن۔ شعراج اکرام وچ عرفان صادق،ثمینہ سید،حسن بانو،ڈاکٹر سعید احمدسعدی،شثکت ڈار،عرفانہ امر،اکمل حنیف، فرحانہ عنبر،جابر حسین،نبیل نجم،بشیر کمال، آصف انصاری،امین جان،شبنم مرزا،علی جوشا،سرور رحمن،راحت ثمر،دلشاد احمد،عبید اللہ توحیدی،رجب چوہدری،محمد احمد شاد،علی صدف،ڈی ایس پی غلام عباس،طارق محمود انجم،زاہد علی اُداس،امجد شہزاد،عامر رفیق، افتخار شاہد،مطلوب حسین،طارق فیاضی،عمران تنہا، مرزا سیف اللہ ساجد،لیاقت قندیل، رمضان تائب،جاوید ساگر،اجمل ہاشمی،ربینا ناز،احمد ریاض رانا،ملک ذلفی ناز،سمیرا شجاع، گوہر علی گوہر شامل سن۔