شکایتاں توں اعلانیہ نفرت
تحریر: حمیداللہ بھٹی
فوج نوں ہدف تنقید بنانا سیاستداناں دا پرانا وطیرہ اے۔ ایس توں علاوہ ہدف تنقید بنان ویلے ایس امر دا خیال رکھیا جاندا کہ موجودہ دی بجائے سابق قیادت نوں موردِ الزام ٹھہرایا جائے پر آصف زرداری نے اٹ نال اٹ وجان دا بیان دے کے نویں روایت قائم کیتی پر نویں روایت قائم کرنا ایہناں لئی تکلیف دہ ثابت ہویا موجودہ اپوزیشن اتحاد نے وی جلسیاں وچ ناں لئے بغیر قومی سلامتی دے ذمے دار ادارے اُتے انگلیاں چکنا شروع کیتیاں پر نواز شریف نے سار یاں احتیاطاں نوں بالائے طاق رکھدے ہوئے سپاہ سالار نوں نااہل کران تے انتخابی شکست دے نال عدالت توں سزا دلوان دا ذمے دار ٹھہرا کے لال لکیر کراس کر لئی اے جس اُتے فوج نے تے تحمل دا مظاہرہ کیتا پر عمران خان نے نواز شریف نوں آندے ای جیل وچ پان تے پروڈکشن آر ڈر دے خاتمے دی گل کر کے اپنی دانست وچ ترجمان بنن دی کوشش کیتی حالاں کے پروڈکشن آرڈر سپیکر دا اختیار اے کیہ ایہہ اختیار وی وزیراعظم اپنے کول رکھن گے؟ جے انج ہویا تے مستقبل دا سیاسی منظر خاصہ خوفناک تے پراگندہ ہو سکدا اے سیاست وچ رواداری تے وضع داری دا عنصر پہلے ای گھٹ سی جے موجودہ حالات وچ مکالمے دا اہتمام نہیں کیتا جاندا تے بہتری دی گنجائش گھٹ ہو جائے گی کیوں جے سیاست وچ اختلافِ رائے نوں دشمنی دا پیراہن پانا جمہوری اقدار دی نفی اے۔
نواز شریف نے مصیبتاں دا ذمے دار آرمی چیف نوں قرار دے کے چنگا نہیں کیتا کیوں جے فوجی جوان تے افسران ملک و قوم دی حفاظت کردے ہوئے دہشت گرداں دا نشانہ بن رہے نیں جاناں دے نذرانے پیش کرن والیاں اُتے تنقید دے نشتر چلانا معیوب ای نہیں مزموم فعل اے پر ایہہ شیخ رشید جہے لوکاں دا سیاسی جماعت اُتے پابندی دی تجویزاں دینا اصل وچ کنڈیاں دی فصل بون دے برابر اے اپنی حیثیت بنان دے چکر وچ تذلیل دی راہ اپنانا جائز نہیں مینوں ایہہ کہن وچ کوئی شرم نہیں کہ اپوزیشن اتحاد دی تشکیل وچ سب توں زیادہ ہتھ حکومت دا اے جس نے سب نوں کندھ نال لان دی کوشش کیتی تے شکایتاں نوں اعلانیہ نفرت دا رنگ دین دی راہ وکھائی اے۔ 126 دن دے دھرنے وچ حکمراناں نوں چور تے ڈاکو توں لے کے وطن دشمن تیکر کیہ نہیں کہیا گیا پر کسے نے چہرے اُتے ہتھ لا کے دھمکی دتی؟ ہر گز نہیں بلکہ حکومت نوں غیر جمہوری حربیاں توں ختم کرن دی کوششاں نوں پارلیمنٹ دے ذریعے ناکام بنایا گیا غور کرن والی گل ایہہ اے کہ موجودہ حالات وچ کیہ حکومت پارلیمنٹ دے ذریعے دیگر جماعتاں دا تعاون حاصل کر سکدی اے؟انج ممکن ای نہیں کیوں جے وزیر تے اک پاسے عمران خان وی اپوزیشن توں مفاہمت نہ کرن اُتے بضد نیں جدوں آوے دا آوا ای وگڑیا ہوئے تے کسے اک نوں کیہ الزام دیئے یاد ریکھیے جے موجودہ اعلانیہ نفرت توں نقصان ہویا تے اپوزیشن دا کجھ نہیں وگڑیا سب توں زیادہ خسارہ حکومت دے حصے وچ ای آئے گا۔
عمران خان اج کل فوج اُتے فریفتہ نیں ہونا وی چاہیدا اے یہہ ساڈے ملک دا انج دا ادارہ اے جس نے دہشت گرداں نوں کچلن دا معرکہ سرانجام دتا اے کجھ اک دے سوا ملک دی اکثریت فوج توں پیار کردی اے پر فوج توں محبت جتا تے ہوئے وی عمران خان دا لب و لہجہ تے الفاظ خاصے تکلیف دہ نیں بلکہ جس طرح دی فوج نال اوہ محبت جتاندے نیں جے چپ رہیے تے زیادہ بہتر اے مثال دے طور اُتے انتخابی عمل 2018 دے نتیجے دی رات اوہناں نے خواجہ آصف ولوں عسکری سربراہ توں ہار بچان تے فتح دلان دی التجا دا ذکر کیتا اے جس دا مطلب مداخلت دی تصدیق دے سوا کجھ نہیں ایہہ کنج الفت تے وکالت اے؟ ایہہ تے اپوزیشن دے موقف نوں تقویت دین والی گل اے کاش اوہ بولدے ہوئے الفاظ دے معنی و مطالب اُتے غور کر لیا کرن بلاشبہ ناسمجھ دی دوستی دانا دشمن توں زیادہ نقصان دہ ہوندی اے۔
کسے ولوں وی کسے ادارے دی ساکھ توں کھیڈن نوں سراہنا کسے طور مناسب نہیں چاہے اوہ کوئی حکومت وچ بیٹھا بندا ہوئے یا اپوزیشن دی سختیاں جھیلن والا چہرہ ہوئے جیہڑا وی حدود و قبود توں تجاوز کرے غلط گل اے نواز شریف دے موقف دی تائید نہیں کیتی جا سکدی پر اینا یاد کرانا ضروری اے کہ عمران خان نے اپنی سوانح عمری وچ فوج دے بارے جیہڑا لکھیا جے بھلے نہیں یاد اے تے نازیبا الفاظ لکھن دا کیہ جواز اے؟ ذرا وضاحت فرمادتیاں تے بوہت سارے لوکاں دا مغالطہ دور ہو جائے گا آئی ایس آئی دے سیاسی ونگ دے سربراہ اوہناںنے اپنی ملاقاتاں دا احوال وی تحریر کیتا اے میجر جنرل احتشام ضمیر ولوں پرویز مشرف دی حمایت طلب کرن دا ذکر کرنا سیاسی معاملات وچ مداخلت دی تصدیق نہیں تے ہور کیہ مطلب اے؟مداخلت کرنا کنج دی وکالت اے کیہ مداخلت دے احوال تحریر کرنا قابلِ قدر یا قابلِ تعریف حرکت اے ؟
غداری دے الزامات تے پکڑ دھکڑ نے ملک نوں ایس نہج اُتے اپڑا دتا اے کہ پہلے جیہڑے شکوے شکایتاں سن ہن اعلانیہ نفرت دا روپ دھارن لگیاں نیں بلوچستان کے پی کے تے سندھ وچ قوم پرستاں دی وڈی تعداد چنگی بھلی سیاسی قوت بن چکے نیں اک پنجاب قوم پرستی توں دور وفاق پرستی دا قائل سی پر 16 اکتوبر نوں گوجرانوالہ جلسے توں ایہہ ابہام وی دور ہو گیا اے نواز شریف ولوں ہن پنجابیت دا پرچار تے پنجاب دی سیاست خارج ازمکان نہیں جیہڑا ملک دی بدقسمتی ہوئے گئی ، کئی سابق جنرلاں، آزاد کشمیر دے سابق وزیراعظم راجہ فاروق حیدر تے دیگر نمایاں سیاستداناں اُتے اک بدنام زمانہ بندے ولوں غداری دے مقدمے دے اندراج دی بازگشت ختم نہیں ہوئی سی ہن کراچی وچ مزار قائد اُتے حاضری دی پاداش وچ حکومت نے ایف آئی آر درج کرا دتی اے۔ ایس طرح جگ ہنسائی دے نال جمہوری اقدار دا جنازہ کڈیا اے مزار قائد دا تقدس بجا ویلے توں پہلاں موجودہ وزیراعظم وی اپنے لائو لشکر دے نال نہ صرف تقدس دی پامالی دے مرتکب ہو چکے نیں بلکہ دھکم پیل دے نال مزار دے احاطے وچ توڑ پھوڑ دا موجب وی بن چکے نیں جس دی الیکٹرانک میڈیا اُتے کوریج وی ہوئی اینا کہن دی جسارت کر رہیا واں کہ شکایات نوں شکایات یا اختلافِ رائے ای رہن دین اعلانیہ دشمنی نہ بنائیے جے اعلانیہ دشمنی تیکر جانا اے تے گھٹ توں گھٹ اداریاں تے ملک نال الفت جتان توں اجتناب کریئے۔
