اماں بس دعا کریں!
لكهت:رئوف کلاسرا
اک ادھ وزیر اے جس نال دعا سلام بچی ہوئی اے۔ اپوزیشن دے دناں وچ سیاستداناں دے اسیں ہیرو آں پر وزیر بن دے ای ایہناں نوں سرخاب دے پر لگ جاندے نیں۔ کئی انج دے سیاستدان، جنہاں دی عزت کردے سن جدوں اقتدار ملیا تے پتہ چلیا کہ سب مایا اے۔ اقتدار نے سب نوں ایکسپوز کر دتا تے اسیں خوش رہنے آں کہ تسیں روٹھے اسیں چھوٹے۔ صحافی دا کم وڈے لوکاں نوں ناراض کرنا ہوندا اے نہ کہ خوش رکھنا۔
خیر ایس وزیر نال بڑے دناں بعد ملاقات ہوئی ، کہن لگے، دو مہینے لنگھ گئے نیں، تسیں نہیں کیتا؟ میں کہیا: مینوں تہاڈے نال اک کم ہو سکدا اے تے اوہ تسیں کردے نہیں تے فون کیوں کراں۔ بولے ، اوہ کیہ؟ میں کہیا کہ تسیں خبراں نہیں دیندے، سرکاری ٹھیکے تے میں لینے نہیں نہ ٹرانسفر پوسٹنگ کرانی اے۔ اوہ ہس پئے میں کہیا: سمجھدار وزیر ہمیشہ خبر دیندے رہندے نیں۔ بولے: کیہ خبر دیواں، سب کجھ تے ٹھیک چل رہیا اے، ساڈی حکومت بوہت چنگی جا رہی اے، نکی موٹی جھڑپاں تے ہر پارٹی وچ چلدیاں رہندیاں نیں۔ایم این ایز وزیراں نال ناراض نیں تے وزیراں دے وچکار اپنی جنگ چل رہی اے۔ طاقتور وزیراں دا وکھرا گروپ اے جیہڑا وزیراعظم دے لاڈلے نیں ایہناں توں کمزور وفاقی وزیراں دا وکھرا گروپ اے، اوہ بے چارے سارا ویلا کڑھدے رہندے نیں کہ اسیں وزیراعظم دے نیڑے کیوں نہیں۔ بیرونی شہریت دے حامل معاونین خصوصی اپنی زندگی وچ مگن نیں۔ ہاں ایہہ ضرور اے کہ وزرا سپیشل اسسٹنٹس نوں زیادہ لفٹ نہیں دیندے۔ اوہ ایہناں نوں مسئلیاں دی وجہ سمجھدے نیں، جد کہ سپیشل اسسٹنٹس سمجھدے نیں کہ وزیراں نوں کوئی کم نہیں آندا۔ باقی سب چنگا چل رہیا اے۔ تھوڑا جہیا مہنگائی دا ایشو اے، پر ایہہ کوئی اینا وڈا مسئلہ نہیں۔
میں تھوڑی دیر بعد بولیا: تسیں انج کہہ رہے او جویں مہنگائی مسئلہ ای نہیں، چینی، آٹا تے دوائیاں دی مہنگائی نے لوکاں نوں مار دتا اے۔ اسلام آباد صرف 24 کلومیٹر دے رقبے وچ واقع اے تے 50 وزیر مشیر تے معاون خصوصی کم کر رہے نیں۔ اٹھارویں ترمیم دے بعد اسلام آباد وچ جیہڑا کم اک سیکشن افسر یا ڈپٹی کمشنر دا اے ایس لئی پورا وزیر رکھ لیا گیا اے۔ فیڈرل حکومت نوں صرف 10 وزیراں دی لوڑ اے۔ باقی سب قوم تے خزانے اُتے بوجھ نیں۔ عمران خان صوبیاں وچ زیادہ قابل تے بہتر بندے لیاندے جتھے ایہناں دی حکومت اے۔ ایہناں نوں زیادہ زور اپنے صوبیاں وچ دینا چاہیدا سی نہ کہ مرکزی حکومت وچ۔ ایہناں سارے سپیشل اسسٹنٹس دی پنجاب تے خیبر پختونخوا وچ لوڑ سی۔ ایہہ لوک جے اوتھے تبدیلی لے آندے تے پورے ملک وچ تبدیلی نظر آندی۔ ، 10، 12 ضروری وزیراں دے علاوہ باقی کسے دے کول کرن نوں کوئی کم نہیں ایس لئی سارا دن ٹوئٹ کردے رہندے نیں تے سانوں دسدے رہندے نیں کہ پچھلی حکومتاں کنیاں کرپٹ سن۔ وزیر صاحب ناشتے اُتے ٹوئٹ، لنچ اُتے پریس کانفرنس تے ڈنر اُتے ٹی وی شو کردے نیں۔ ایہہ اے ایہناں دی سارے دن دی مصروفیت۔ لوک ہن اُکتا چکے نیں۔ ایس حکومت نے میڈیا دے نال تعلقات آندے ای اینے خراب کر لئے کہ ہن میڈیا دے کول اپنی جان بچان دا اک ای حل سی کہ اوہ اپوزیشن نوں دوبارہ اپنے پیراں اُتے کھڑا کرے تاں جے خان صاحب نوں اوہ اپنے ول مصروف کرن تے اوہ وچکار وچ بچے رہن۔ ہن اپوزیشن تگڑی ہو گئی اے کیوں جے حکومت ہر محاذ اُتے شکست کھا رہی اے۔ عوام نوں اک ای گل بار بار سنائی جا رہی اے کہ سب کیتا دھریا پچھلیاں دا اے، تاں حکومت نے پہلے دن توں ای موہڈیاں اُتے کوئی بوجھ محسوس نہیں کیتا۔ مہنگائی نے لوکاں دا جینا حرام کر دتا اے تے حکومت دے کول کوئی پلان نہیں۔ ذرائع دے مطابق دو ہفتے پہلاں کابینہ اجلاس وچ اسد عمر نے چینی تے گندم دیاں قیمتاں ودھن اُتے شدید احتجاج کیتا سی، اک ٹی وی شو وچ اسد عمر نوں میں کہیا کہ عجیب گل اے، تسیں کابینہ اجلاس وچ مہنگائی دے خلاف احتجاج کر رہے او پر جدوں تسیں وزیر خزانہ سی تے تسیں ای 11 لکھ ٹن چینی دی ایکسپورٹ دی اجازت دتی سی تے پنجاب نے 3 ارب روپئے سبسڈی وی دتی۔ ہن اوہ ای چینی مہنگے پیسیاں دی باہروں منگوا رہے او ایسے طرح گندم دے کیس وچ ہویا پر تسیں کابینہ وچ احتجاج وی کر رہے او۔
میں اپنے ایس وزیر دوست نوں کہیا کہ ہجے پچھلے کابینہ اجلاس وچ انکشاف ہویا کہ وزیراعظم سنے سب وزیراں نوں غلط اعداد و شمار دے کے غلط فیصلے کرائے گئے جس نال چینی تے گندم دا بحران پیدا ہویا تے مہنگائی اسمان تیکر اپڑ گئی۔ شہزاد اکبر نے کہیا سی کہ چینی اک روپئے فی کلو ودھن نال پنج ارب روپئے عوام دی جیب توں نکل جاندے نیں پر پچھلے اک ورھے وچ چینی دی قیمت 55 روپئے توں اک سو پنج روپئے تیکر اپڑ گئی۔ شہزاد اکبر دا فارمولا اپلائی کیتا جائے تے پتہ چلے گا کہ ڈھائی سو ارب روپئے تے عوام دی جیب توں اک ورھے وچ صرف چینی دی مد وچ نکل گئے نیں۔ ہن اک ارب ڈالرز دے نیڑے چینی باہر توں منگوائی جا رہی اے، ایس اُتے اک سو سٹھ ارب روپئے خرچ ہون گے۔ پوری دنیا توں ڈالرز منگے سن تے ایس دے بدلے اوہ چینی منگوا رہے نیں جیہڑی ساڈے کول وافر پئی سی۔ ایہہ صرف اک غلط فیصلے دی وجہ نال ہویا اے۔ ایس قوم نوں رزاق دائود، اسد عمر، وزیراعظم عمران خان تے ایہناں دی کابینہ دا فیصلہ بوہت مہنگا پیا اے۔
گندم دی سن لوئو پہلے شہباز شریف دور وچ گندم دا سیزن شروع ہوندے ای اوہ پنجاب دی سرحد بند کر دیندے سن تے صرف سرکاری طور اُتے گندم صوبے توں باہر جا سکدی سی۔ ایس وار چوں کے پنجاب تے کے پی کے وچ حکومت پی ٹی آئی دی سی تاں سرحد بند نہیں ہوئی تے سمگلراں نے آرام نال گندم قریبی ملکاں نوں سمگل کر دتی۔ ملک وچ گندم گھٹ ہو گئی پر خیبر پختونخوا دے سوداگراں دی چاندی ہو گئی۔ ایس سمگل شدہ گندم دی کمی پوری کرن لئی 20 لکھ ٹن گندم باہر توں مہنگی خریدی جا رہی اے۔ انج اک ہور فیصلہ سانوں دو تن ارب ڈالرز وچ پین والا اے۔ میں کہیا کہ ایہہ کنج دے لوک نیں جنہاں توں کوئی وی غلط اعداد و شمار دے کے غلط فیصلہ کرا لیندا اے تے عوام دی جیب توں اک ہزار ارب روپئے نکل جاندے نیں تے کسے دے کن اُتے جوں تیکر نہیں رینگدی۔ کیہ وزیراعظم نے کسے خلاف ایکشن لیا کہ تسیں لوکاں نے کہیا سی کہ چینی تے گندم وافر اے تے میرے کولوں فیصلہ کرالیا کہ باہر گھل دیو؟ ہن کتھے اے چینی تے گندم؟ جدوں سب وزیراں تے بابوئواں نوں علم اے کہ وزیراعظم نے کاروائی نہیں کرنی تے فیر ایہو کجھ ہوئے گا جو ہو رہیا اے۔ دوائیاں دیاں قیمتاں اسمان نال گلاں کر رہیاں نیں تے تسیں فیر وی کہندے او کہ کجھ نہیں ہویا، سب چنگا چل رہیا اے۔
وزیر صاحب کافی دیر تیکر میرا بھاشن سن کے کجھ متاثر ہو چکے سن بولے: اک گل دساں جے کسے نوں نہ دسو ، میں کہیا ارشاد: بولے، آپ میری اماں وی ساڈی حکومت دے خلاف ہو چکی اے۔ میں جدوں وی اماں نوں فون کرنا واں تے اوہ بُرا بھلا کہنا شروع کر دیندی اے۔ میں حیرانی نال کہیا: واقعی؟ اوہ بولے جی ہاں، پر اماں دی شکایت کجھ ہور اے۔ اماں دا کہنا اے کہ لہور چنگا خاصا خوبصورت سی، صاف ستھرا تے سرسبز، روز صفائی ہو جاندی سی پر ہن لہور دی حالت بوہت بُری ہو چکی اے کیوں جے خان صاحب دے لاڈلے وزیراعلیٰ نوں نہ دلچسپی اے نہ ای ایہناں نوں کوئی سیریس لیندا اے۔ اوہ وزیر بولے: اماں آکھدی اے تہاڈی حکومت نے ساڈے لہور دا بیڑا غرق کر دتا اے۔ کہن لگے: ہن میں ڈر دے مارے اماں نوں فون نہیں کردا کہ گالیاں کھانیاں پیندیاں نیں کوئی اماں دی گالیاں ٹیپ کر کے وزیراعظم نوں ای نہ پیش کر دیوے تے میری چھٹی ہو جائے۔ کل فوج کیتا تے اماں بُرا بھلا کہنا شروع ای ہوئیاں سن کہ میں رولا پایا، اماں بس بس ، اماں نہ رکیاں تے میں فوراً ایہہ آکھ کے فون بند کر دتا کہ اماں بس دعا کرو۔
