میرے تے شاہین دے وچکار کوئی اختلاف نہیں سوشل میڈیا دیاں خبراں سچیاں نہیں بولنگ کوچ عمر گل
سلہٹ: پاکستان کرکٹ ٹیم دے بولنگ کوچ عمر گل نے صاف آکھیا اے کہ اوہناں دے تے فاسٹ بولر شاہین آفریدی دے وچکار کوئی اختلاف نہیں اے، تے سوشل میڈیا اتے چلن والیاں خبراں بالکل سچیاں نہیں نے۔
قومی ٹیسٹ ٹیم دے بولنگ کوچ عمر گل نے بنگلادیش دے خلاف دوجے ٹیسٹ دے تیجے دن دی کھیڈ مکنے توں بعد پریس کانفرنس وچ دسیا کہ، “کل سویرے جدوں میں اٹھ کے سوشل میڈیا ویکھیا تے شاہین تے میرے بارے گلاں ہو رہیاں سن کہ شاہین کوچ دی گل نہیں من رہا۔”
عمر گل نے وضاحت کردیاں آکھیا کہ، “ایسی کوئی گل نہیں اے۔ حسن علی ڈگ پیا سی تے اوہدے سر اتے چوٹ لگی سی۔ شاہین باہر بیٹھا ہویا سی، میں اوہدے نال گل کیتی کہ حسن دے سر اتے گیند لگی اے، تے کنکشن (Concussion) لئی ویلا گھٹ ہوندے، ایس لئی تسی گراؤنڈ وچ چلے جاؤ۔” اوہناں دا کہنا سی کہ ویکھن وچ انج لگ رہا سی جیویں شاہین کہہ رہا ہووے کہ اوہدا دماغ ٹھیک نہیں، پر ایسا کچھ نہیں سی۔
میچ دے بارے گل کردیاں عمر گل نے آکھیا کہ ساڈے کول اجے دو دن ہے نے تے بارش ہون دی امید وی اے۔ میچ وچ اجے کافی ویلا اے۔ جے اسیں دو دن لگاتار بیٹنگ کریئے تے ساڈے کول میچ جتن دا موقع اے۔ ایہ میچ ڈرا نہیں ہوئے گا، بلکہ دوواں ٹیماں کول جتن دا چانس اے۔
اوہناں آکھیا کہ 437 رنز دا ہدف پورا کرن لئی 2 توں 3 چنگیاں پارٹنرشپ لگنیاں چاہیدیاں نے، اسیں ذہنی طور اتے تیار آں تے پوری کوشش کراں گے۔ عمر گل نے ہور آکھیا کہ پچ ہن بیٹرز لئی چنگی ہو گئی اے، بنگلادیش دے بیٹرز نے بہت ودیا کھیڈیا پر ساڈے بولرز بدقسمت رہے۔ اوہناں گلہ کیتا کہ اسیں ٹیسٹ کرکٹ گھٹ کھیڈدے آں، چھ مہینے بعد ٹیسٹ کھیڈن نال بولرز دا ردھم بنن وچ مشکل ہوندی اے۔
