آئی سی سی کوڈ آف کنڈکٹ دی خلاف ورزی اُتے سلمان علی آغا دی سرزنش
پاکستانی کرکٹر سلمان علی آغا نوں بنگلادیش دے خلاف سلہٹ وچ کھیڈے گئے دوجے ٹیسٹ میچ دے دوران آئی سی سی ضابطہ اخلاق دی خلاف ورزی اُتے سرکاری طور اُتے تنبیہ جاری کر دتی گئی۔
انٹرنیشنل کرکٹ کونسل (آئی سی سی) دے مطابق سلمان آغا نے لیول ون دے ضابطے دی خلاف ورزی کیتی جو میچ دے دوران کرکٹ سامان، گراؤنڈ دے آلات یا دوجیاں شے واں دے نال نامناسب رویے توں متعلق اے۔
ایہہ واقعہ پاکستان دی دوجی اننگز دے 82ویں اوور وچ پیش آیا جدوں سلمان آغا نے آؤٹ ہون توں بعد واپس پویلین جاندیاں ہویاں غصے وچ اشتہاری بورڈ اُتے بیٹ دے ماریا۔
آئی سی سی نے سلمان آغا دے ڈسپلنری ریکارڈ وچ اک ڈی میرٹ پوائنٹ وی شامل کر دتا اے، پچھلے 24 مہینیاں دے دوران ایہہ اوہناں دی دوجی خلاف ورزی اے، جس توں بعد اوہناں دے مجموعی ڈی میرٹ پوائنٹس دی گنتی دو ہو گئی اے۔
ایس توں پہلے مارچ وچ ڈھاکا وچ بنگلادیش دے خلاف ون ڈے میچ دے دوران وی اوہ اسی نوعیت دی خلاف ورزی دے مرتکب پائے گئے سن۔
سلمان آغا نے اپنی غلطی تسلیم کردیاں ہویاں میچ ریفری جیف کرو دی پاسوں تجویز کیتی گئی سزا قبول کر لئی اے، جس پاروں باقاعدہ سماعت دی لوڑ پیش نہیں آئی۔
