پاکستانی فاسٹ بولر محمد عامر نوں برطانوی شہریت مل گئی
پاکستانی فاسٹ بولر محمد عامر نوں باقاعدہ طور اُتے برطانوی شہریت مل گئی اے تے اوہناں نوں برطانوی پاسپورٹ وی جاری کر دتا گیا اے۔
برطانوی شہریت ملن توں بعد ہن تکنیکی طور اُتے اوہناں لئی انڈین پریمیئر لیگ (آئی پی ایل) دے بوہے وی کھل گئے نیں۔
میڈیا رپورٹاں دے مطابق محمد عامر اپنی برطانوی نژاد گھر والی نرجس خان تے بچیاں دے نال لمے عرصے توں برطانیہ وچ رہ رہے سن، سارے قانونی مرحلے تے مقررہ ویلا پورا ہون توں بعد ہن اوہ باقاعدہ شہریت حاصل کر چکے نیں۔
بدھ دے دن سوشل میڈیا پلیٹ فارم اُتے شیئر کیتی گئی اک پوسٹ نوں محمد عامر نے اپنے آفیشل اکاؤنٹ توں شیئر کیتا، جس وچ اک صارف نے برطانوی شہریت ملن اُتے اوہناں لئی نیک خواہشاں دا اظہار کیتا سی۔
بھارتی کرکٹ بورڈ (بی سی سی آئی) نے پاکستانی کھڈاریاں دی آئی پی ایل وچ شرکت اُتے پابندی لا رکھی اے، ایہو وجہ اے کہ ماضی وچ پاکستان دے سابق آل راؤنڈر اظہر محمود بھی برطانوی شہریت حاصل کرن توں بعد آئی پی ایل وچ شریک ہوئے سن۔
برطانوی پاسپورٹ ملن توں بعد ہن محمد عامر وی تکنیکی طور اُتے آئی پی ایل کھیڈن دے اہل ہو گئے نیں، ایہہ خبراں وی چل رہیاں نیں کہ جے اوہناں نوں آئی پی ایل ولوں پیشکش آئی تاں اوہ ایس وچ شرکت اُتے ضرور غور کرن گے۔
واضح رہے کہ محمد عامر کئی واری آئی پی ایل وچ کھیڈن دی خواہش دا اظہار کر چکے نیں۔
