ایشز دی تیاری: انگلش ٹیم اگلے سال پاکستان دے کیخلاف ٹیسٹ میچ کھیلے گی
ایشز دی تیاری: پاکستان تے انگلینڈ وچکار اگلے سال مئی وچ ٹیسٹ میچ شیڈول
پاکستان کرکٹ ٹیم اگلے سال مئی وچ انگلینڈ دے خلاف اک ٹیسٹ میچ کھیلے گی، جیہنوں ایشز سیریز توں پہلے انگلش ٹیم دی تیاریاں دا حصہ منیا جا رہا اے۔
برطانوی میڈیا رپورٹس دے مطابق، پاکستان تے انگلینڈ وچکار اے ٹیسٹ میچ ایسے ویلے ہووے گا جدوں انڈین پریمیئر لیگ (آئی پی ایل) وی چل رہی ہووے گی۔ انگلینڈ دے کئی کھلاڑی آئی پی ایل پاروں ٹیسٹ کرکٹ چھڈ چکے نیں۔
رپورٹس وچ دَسیا گیا اے کہ پاکستان نے 2027 وچ وائٹ بال سیریز لئی انگلینڈ دا دورہ کرنا اے، تے انگلینڈ کول ایشز سیریز توں پہلے اک ٹیسٹ میچ دی جگہ خالی سی۔
اولمپک گیمز تے کرکٹ دا ٹکراؤ:
برطانوی میڈیا دا کہنا اے کہ انگلش ٹیم دا فیوچر ٹور پروگرام (ایف ٹی پی) اولمپک گیمز نال وی ٹکرا رہا اے، کیوں جے اولمپکس دے دناں وچ ہی انگلینڈ تے ویسٹ انڈیز دے وچکار ٹیسٹ سیریز شیڈول اے۔
ویسٹ انڈیز تے انگلینڈ وچکار 2028 وچ تن ٹیسٹ میچاں دی سیریز ہونی اے، جدوں کہ اولمپک گیمز 14 جولائی توں 30 جولائی 2028 تک ہون گے۔ رپورٹس موجب، اولمپکس پاروں انگلینڈ دے تگڑے آل فارمیٹ کھلاڑی ہوم ٹیسٹ سیریز توں باہر رہ سکدے نیں۔
