پاکستانی لہو نے دنیا جِت لئی برطانوی باکسر حمزہ شیراز ورلڈ چیمپئن بن گئے
پاکستانی نژاد برطانوی باکسر حمزہ شیراز نے عالمی چیمپئن بن کے کھیڈاں دی دنیا وچ اک واری پھر پاکستان دا جھنڈا اچیرا کر دتا اے۔
تفصیلات مطابق، پاکستانی نژاد برطانوی باکسر حمزہ شیراز نے ڈبلیو بی او (WBO) سپر مڈل ویٹ عالمی ٹائٹل اپنے ناں کر لیا اے، حمزہ شیراز نے جرمنی دے ایلم بیگچ نوں دوجے ہی راؤنڈ وچ ناک آؤٹ کر کے پہلی واری ورلڈ چیمپئن بنن دا مان (اعزاز) حاصل کر لیا اے۔
حمزہ شیراز نے فائٹ دی شروعات توں ہی تکھا (جارحانہ) انداز اپنائی رکھیا، اوہناں دے اودھڑویں تے سدھے پنچاں (مکیاں) نے جرمن حریف نوں بے بس کر دتا۔
حمزہ شیراز دے خطرناک لیفٹ ہک پاروں جرمن باکسر رنگ وچ سنبھل نہ سکیا تے ریفری نے مقابلہ اودوں ہی روک دتا۔
26 ورھیاں دے حمزہ شیراز نے ریٹائرڈ ٹیرنس کرافورڈ دی خالی کیتی ہوئی ڈبلیو بی او سپر مڈل ویٹ بیلٹ جِت کے تاریخ لکھ دتی اے۔
جِت توں بعد پاکستانی نژاد برطانوی باکسر حمزہ شیراز نے رنگ دے اندر ہی شکر دا سجدہ کیتا تے اپنی ٹیم نال رل کے جِت دا یادگار جشن منایا۔
حمزہ شیراز نے اپنی ایس شاندار جِت دے موقعے میڈیا نال گل بات کردیاں اکھیا، “ایس کامیابی توں بعد ہن میں 168 پاؤنڈ کیٹیگری دے سارے عالمی باکسراں دا ساہمنا کرن لئی پوری طرح تیار واں۔”
اوہناں اکھیا، “میرے لئی ایہ مقابلہ بڑا ہی اسان سی، پہلا مکہ (پنچ) لگدے ہی حریف پورے دباؤ وچ آ گیا، میں اوہنوں مسلسل پریشر وچ رکھ کے ڈھیر کر دتا۔”
حمزہ شیراز ایس توں پہلے ستمبر 2024 وچ ٹائلر ڈینی نوں ہرا کے یورپی مڈل ویٹ ٹائٹل وی اپنے ناں کر چکے نیں.
پاکستانی سوشل میڈیا ورتن والیاں تے کھیڈاں دے شائقین نے حمزہ شیراز دی ایس تاریخی جِت نوں پاکستان لئی فخر دا باعث قرار دتا اے۔
