فیفاورلڈکپ 2026 وچ 1248 کھڈاریاں دی شمولیت ایونٹ تریخ دا سب توں وڈا ٹورنامنٹ بن گیا
فیفا ورلڈ کپ 2026 لئی ساریاں 48 ٹیماں دے اسکواڈ فائنل ہو گئے نیں، ایس ایونٹ وچ مجموعی طور تے 1248 کھڈاری شامل ہوون گے۔
کھیڈاں دی دنیا دا سب توں وڈا میلہ فیفا فٹبال ورلڈ کپ 12 جون توں شروع ہووے گا۔
امریکہ، میکسیکو تے کینیڈا دی سانجھی میزبانی وچ ہوون والا ایہہ ٹورنامنٹ پہلا فٹبال ورلڈ کپ اے جیہدے وچ 48 ٹیماں نوں شامل کیتا گیا اے۔
ٹورنامنٹ وچ شامل 48 ٹیماں نوں 12 گروپاں وچ ونڈیا گیا اے تے ہر گروپ وچ 4 ٹیماں نیں، جڈوں کہ پورے ٹورنامنٹ وچ مجموعی طور تے 104 میچ کھیلے جاون گے۔
ایونٹ وچ 1248 کھڈاریاں دی شمولیت نال ہی ایہہ ورلڈ کپ فیفا دی تریخ دا سب توں وڈا ٹورنامنٹ بݨ گیا اے۔
357 کھڈاری پہلے بھی فیفا ورلڈ کپ کھیل چکے نیں جڈوں کہ 891 کھڈاری پہلی واری میدان وچ اترن گے۔
لیونل میسی، کرسٹیانو رونالڈو تے گیلرمو اوچوا اپنا چھٹا ورلڈ کپ کھیلݨ لئی تیار نیں۔ 4 دیس کیپ ورڈے، کوراساؤ، اردن تے ازبکستان پہلی واری ورلڈ کپ وچ شامل ہوئے نیں۔
فیفا ورلڈ کپ 2026 وچ سب توں گھٹ عمر کھڈاری 17 سال دا اے، جڈوں کہ سب توں وڈی عمر دا کھڈاری 43 سال دا اے۔
ایس ٹورنامنٹ وچ شامل 7 کھڈاریاں دی عمر 40 سال توں ودھ اے تے انڈر-20 (20 سال توں گھٹ عمر) دے 22 پلیئرز شریک نیں۔
