وسیم، مصباح تے فخرِ عالم نے حج کر کے وال کیوں نہیں منڈوائے؟

پاکستان دی منّی پرمنّی (نامور) ٹی وی شخصیت فخرِ عالم نے سابق کرکٹرز وسیم اکرم تے مصباح الحق دے نال حالے ای حج دا فریضہ پورا کیتا اے۔

تیناں شخصیات نے حج تے سر دے وال (بال) نہیں منڈوائے جیہدی وجہ فخرِ عالم نے اک ویڈیو وچ دسی اے۔

فخرِ عالم نے آکھیا کہ ‘حج تے آؤن توں پہلاں اسیں بہت سارے علمائے کرام توں ایس بارے پچھیا سی، سانوں صاف طور تے دسیا گیا کہ ہر کسے کول دو آپشن ہوندے نیں کہ بھاویں اوہ سر منڈواؤن تے بھاویں نہ منڈواؤن’۔ ٹی وی میزبان نے آکھیا ‘ہاں سر منڈوان دی زیادہ فضیلت اے پر تسی تھوڑے جئے وال کٹوا کے وی فرض پورا کر سکدے او’۔

فخرِ عالم دا ہور کہنا سی ‘ساڈے تے بہت سارے لوکاں نے تنقید کیتی کہ کی تسی اودھر پکنک منان گئے سی؟ تے میں دَسدا چلاں کہ ایس وچ 24 گھنٹے ہوندے نیں تے جدوں تسی پورا دن گزاردے او تے اوہدے وچ عبادت وی ہوندی اے، اوہدے وچ انسان کدی اداس وی ہوندا اے، کدی ہس وی ریہا ہوندا اے تے کدی دوستاں نال گلاں باتاں وی کردا اے’۔

اوہناں نے آکھیا کہ ‘ایہو ای حج اے کہ مسلمان آپس وچ مل جل کے رہن تے اک دوجے نال تعلق قائم کرن’۔