آئی پی ایل وچ حصہ لین تے ممبئی انڈینز نے ادھا معاوضہ دتا نیوزی لینڈ دے مچل سینٹنر دا انکشاف
نیوزی لینڈ دے آل راؤنڈر مچل سینٹنر نے انکشاف کیتا اے کہ آئی پی ایل (IPL) وچ حصہ لین تے ممبئی انڈینز ولوں اوہناں نوں آدھے معاوضے (پیسیاں) دی ادائیگی کیتی گئی۔
مچل سینٹنر موڈھے (کندھے) دی انجری دا شکار ہو کے آئی پی ایل توں باہر ہو گئے سن، ممبئی انڈینز نے مچل سینٹنر نوں پوریاں 2 کروڑ بھارتی روپے ادا نہیں کیتے بلکہ آدھی رقم دتی، مچل سینٹنر نے اک انٹرویو وچ گل بات کردیاں آکھیا کہ آدھی رقم ملن تے اوہناں نوں بہت دکھ ہویا۔ مچل سینٹنر موڈھے دی انجری توں ٹھیک ہو کے انگلینڈ دے خلاف پہلے ٹیسٹ توں اک ہفتہ پہلاں ٹیم وچ شامل وی ہو گئے۔
مچل سینٹنر دے تکھے (جلد) فٹ ہو کے نیشنل ٹیم وچ شامل ہون بارے جدوں سوال کیتا گیا، تے مچل سینٹنر نے پیسے پورے نہ ملن دی گل چھیڑ دتی۔
مچل سینٹنر نے دَسیا کہ اوہناں نے آئی پی ایل دا پہلا میچ اپنے دوجے بال (بچے) دی جمائش (پیدائش) پاروں مس کیتا، جدوں واپس آیا تے دہلی دے خلاف کھیڈیا تے انجری دا شکار ہو گیا جیہدے توں بعد اک ہفتے لئی باہر ہو گیا، میں دوبارہ واپس آیا تے پھر انجری دا شکار ہو گیا تے پھر میں گھر (وطن) واپس چلا گیا۔ مچل سینٹنر بولے کہ دو ہفتیاں دے وچکار میرا موڈھا دو واری انجری دا شکار ہویا، میں سمجھیا کہ میں اپنے پنڈے (جسم) تے بوجھ پا رہا واں۔
مچل سینٹنر دا کہنا سی کہ مینوں لگیا سی کہ مینوں فٹ ہون وچ 8 ہفتے لگن گے پر میں 4 ہفتیاں وچ ای فٹ ہو گیا واں، ہن چھیتی فٹ ہون توں بعد میڈیا وچ میرے بارے گلاں کیتیاں جا رہی نیں۔
مچل سینٹنر نے ممبئی انڈینز لئی 5 میچ کھیڈے، مچل سینٹنر 27 اپریل نوں پکے پیریں (باضابطہ طور پر) آئی پی ایل توں باہر ہوئے سن۔
آئی پی ایل دے قانوناں دے مطابق لیگ دے دوران جے کوئی کھڈاری زخمی ہوندا اے، تے اوہنوں آکشن (بولی) دے ویلے سائن کیتی گئی پوری رقم ملدی اے۔
بھارتی میڈیا دے مطابق آدھی رقم دین دے معاملے تے ممبئی انڈینز ولوں ہجے تیکر کوئی گل بات یا تبصرہ سامنے نہیں آیا۔
