پاکستان نے آسٹریلیا دے خلاف ون ڈے سیریز جِت لئی

پاکستان نے آسٹریلیا نوں تِیجے ون ڈے میچ وچ 4 وکٹاں نال ہرا دتا اے۔

پاکستان نے 3 میچاں دی سیریز 1-2 نال اپنے ناں کر لئی، پاکستان نے 158 رنز دا ہدف 42ویں اوور وچ پورا کر لیا۔

پاکستانی بولراں نے کمال دی بولنگ کر کے آسٹریلوی ٹیم نوں صرف 157 رنز تے ای پویلین موڑ دتا۔ آسٹریلیا نے تِیجے تے آخری میچ وچ پہلے بیٹنگ کردیاں ہویاں پاکستان نوں جِتݨ لئی 158 رنز دا ہدف دتا سی۔ آسٹریلوی ٹیم دے کپتان جوش انگلس نے 65 رنز دی اننگز کھیڈی، جَد کہ مارنس لیبوشین تے ایلکس کیری نے 19-19 رنز بݨائے تے ایڈم زمپا 10 رنز بݨا کے آؤٹ ہویا۔

پاکستان ولوں شاہین شاہ آفریدی نے 3، ابرار احمد تے شاداب خان نے 2-2 کھڈاریاں نوں آؤٹ کیتا، جَد کہ ہک کھڈاری نوں حارث رؤف نے پویلین گھلیا۔

ہدف دا پچھا کردیاں ہویاں پاکستانی ٹیم وی کُجھ مشکلاں وچ پھسی رہی، بابر اعظم نے 40 رنز دی سنبھل کے اننگز کھیڈی تے معاذ صداقت نے 27 رنز بݨائے۔ آخر وچ عبدالصمد تے شاداب خان نے ستویں وکٹ لئی 49 رنز دی تگڑی سانجھے داری (شراکت) بݨا کے میچ جتوا دتا۔

چیتے رہے کہ تِن ون ڈے میچاں دی سیریز دے پہلے میچ وچ پاکستان نے آسٹریلیا نوں 5 وکٹاں نال ہرایا سی، جَد کہ دوجے میچ وچ آسٹریلیا نے پاکستان نوں 42 رنز نال ہرا کے میچ اپنے ناں کیتا سی۔