آسٹریلیادے خلاف جِت، ہوم سیریز وچ سارے اپنی مرضی دیاں پچاں بناؤندے نیں اسیں وی سیریز جِتی سی: شاہین آفریدی

لاہور: پاکستان ون ڈے کرکٹ ٹیم دے کپتان شاہین آفریدی نے آسٹریلیا دے خلاف سیریز جِتݨ توں بعد آکھیا اے کہ ہوم سیریز وچ سارے اپنی مرضی دیاں پچاں بݨاؤندے نیں، اسیں وی سیریز جِتݨی سی۔

جمعرات نوں پاکستان نے آسٹریلیا نوں تِیجے ون ڈے میچ وچ 4 وکٹاں نال ہرا کے سیریز 1-2 نال اپنے ناں کر لئی۔ گرین شرٹس نے کینگروز دا 158 رنز دا ہدف 42ویں اوور وچ پورا کیتا۔

میچ توں بعد کپتان شاہین آفریدی نے پریس کانفرنس کردیاں ہویاں آکھیا کہ ورلڈ کپ وچ اجے 14، 15 مہینے باقی نیں، ایس لئی اجے کُجھ وی کہنا ویلے توں پہلے ہوئے گا۔

شاہین آفریدی نے دَسیا کہ ہوم سیریز وچ سارے اپنی پچز بݨاؤندے نیں، اسیں وی سیریز جِتݨی سی، پچاں اوکھیاں سن تے رنز بݨاؤݨا سکھالا نہیں سی۔

اوہناں آکھیا کہ کھڈاریاں نوں لگاتار موقع دیݨ لئی ٹیم تبدیل نہیں کیتی، شاداب خان تے سوال چُکے گئے سن پر اوہنے کنٹرول نال بولنگ کیتی تے میچ جتوایا۔ 2 فاسٹ بولرز کھلاؤݨ وچ حارث رؤف سبھ توں بہترین چوائس (انتخاب) لگے، سینئر کھڈاری وی بہتری دی کوشش کر رہے نیں، اوہناں نوں تھوڑا موقع دتا کرو۔