وزیراعظم، اعتماد دا ووٹ تے ریلوے حادثہ

روہیل اکبر

وزیراعظم میاں شہبازشریف نے قومی اسمبلی توں اعتماد دا ووٹ لے لیا مبارک ہووے‘ پی ڈی ایم نے 80 ارکان دی حمایت حاصل کر لئی ایہدے بعد وزیراعظم نے اپنے خطاب وچ مخالفین نوں چنگا لتاڑیا‘ شیخ رشید نوں شیخ حرم وی کہہ دتا پر اوہناں نے محکمہ ریلوے دے اوس حادثے دا ذکر نہیں کیتا۔ ایس حادثے وچ کراچی ایکسپریس دی بوگی وچ اگ لگ گئی ست مسافر جانوں چلے گئے۔ اللہ تعالیٰ دا لکھ لکھ شکر اے کہ ایس بوگی وچ حکمران خاندان دا کوئی بندہ نہیں سی کیوں ایہناں ساریاں دے کول کروڑاں روپیے دیاں گڈیاں موجود نیں جو لوکاں دے پیسیاں نال خریدیاں گئیاں نیں تاں جے ساڈے ایہ لیڈر سانوں ملک وچ سوکھتاں پیدا کر کے دین کیوں جے ایہناں نوں اقتدار تک جان لئی ایہناں لوکاں دے ووٹاں دی ضرورت اے جو کدی اگ وچ سڑ کے مر جاندے نیں تے کدی بمب دھماکیاں وچ جان دے دیندے نیں۔
خیر ایہ اک معمولی جیہا واقعہ ایسے لئی تے کسے وی میڈیا وچ نہیں چلیا تے نہ ای ایہدے تے سنجیدگی وکھائی صرف سوشل میڈیا تے ایس حادثے دیاں تفصیلاں شیئر کیتیاں گئیاں تے فیر کیوں نہ اج اسیں وی سوشل میڈیا دی ای گل کر لیے کہ ایہدے تے کیہ چل رہیا اے کیوں جے اک پاسے سپریم کورٹ اے تے دوجے پاسے پی ڈی ایم دی حکومت اے تے تریجے پاسے پی ٹی آئی اے جے ویکھیا جاوے تے لوک کدھرے نظر نہیں آندے جہناں دیاں خبراں سڑن تے مرن دے بعد آندیاں نیں اوہ وی ہن نہیں آ رہیاں اللہ خیر کرے کہ جدوں توں الیکشن دا معاملہ سپریم کورٹ وچ گیا اے اودوں توں سوشل میڈیا وی بہت زیادہ گرم اے ایتھے کیوں جے اظہار دی آزادی اے ایس لئی ہر کوئی کھل کے اپنے اپنے خیالات دا بیانیہ چلا رہے نیں۔ ایس حوالے نال وکھووکھ گروپاں وچ کیہ کیہ سیاسی رنگ بکھرے ہوئے نیں اج اوہناں نوں ای اسیں پڑھنے آں اک گروپ وچ حکومت تے ڈاڈھی تنقید کردے ہوئے لکھیا اے کہ پاکستان توں پاکستان وچ مار کرن والے میزائل PDM-13 دا کامیاب تجربہ جنہے پورے ملک وچ تباہی مچا کے رکھ دتی۔ میزائل نے پاکستانی اکانومی نوں نشانہ بنایا تے مکمل تباہ کیتا۔ میزائل لانچ کرن والیاں وچ خوشی دی لہر‘ اک ہور گروپ وچ کسے منچلے نے لکھیا کہ پنجاہ کروڑ توں گھٹ کرپشن والے اسمبلی وچ ہون گے تے پنجی من توں ودھ کنک رکھن والے جیل وچ ہون گے۔ الیکشن دا ناں آندے ای دھماکے کون کرا رہیا اے ذرا سوچو کدھرے الیکشن رکوان لئی لہو بہانا ضروری تے نہیں ہو گیا تے جو کہندے نیں ساڈی مرضی دے بناں ملک وچ نہ کوئی آ سکدا اے نہ جا سکدا اے فیر دہشت گرد کیویں آ گئے۔ مراد سعید اصل نشانہ سی پختوناں دا‘ اک واری فیر لہو بہایا جاوے گا۔ نگران حکومت دا کم ’’الیکشن‘‘ دی نگرانی ہوندا اے ایہ پہلی نگران حکومت اے جو کرپٹ بندیاں دی نگرانی تے رہ کے الیکشن توں نسن وچ مدد کردی رہی تے جمہوریت دی چیمپئن جماعتاں الیکشن توں نس رہیاں نیں۔
فردوس عاشق اعوان نال کمپنی دے لوکاں دیاں خفیہ ملاقاتاں‘ کجھ دن بعد عمران خان دے خلاف لانچ کیتا جاوے گا۔ ڈالر دی قیمت ودھن نال چیزاں مہنگیاں ہو گئیاں پر پشتوناں دا لہو اج وی 2007ء دے مُل تے ای وک رہیا اے۔ انڈیا نے اک چارجنگ تے 850 کلومیٹر چلن والی کار بنا لئی اے تے پاکستان وچ اجے تک صرف اک پلیٹ بریانی دی خاطر اک دوجے دے کپڑے پاڑدے ہوئے نظر آن گے۔ اک گروپ وچ لکھیا اے کہ لوکاں دے پیسے نال ارباں روپیے مالیت دی ٹیکنالوجی خریدی جاندی اے کہ دشمن ملکاں دی جسوسی کیتی جا سکے پر پاکستان وچ ایس ٹیکنالوجی نال وزیراعظم‘ چیف جسٹس‘ ججز فیملیز دی جسوسی کیتی جاندی اے کہ اوہ کیہ گلاں کردے نیں۔ معروف ٹی وی اینکر صابر شاکر نے آصف علی زرداری دے ایس بیان تے کہ میرے بعد بلاول بھٹو زرداری تے آصفہ بھٹو زرداری اگے آن گے لکھیا اے کہ ماشاء اللہ باقی غلاماں لئی اپنے جیندے جی زرداری دا پیغام۔ ن لیگ دا ٹکٹاں جہاز توں سٹن دا فیصلہ‘ جو پھڑے اوہو الیکشن لڑے۔
عمران ریاض دی لکھت اے کہ پنجاب اسمبلی تحلیل تقریباً 99دن‘ خیبرپختونخوا اسمبلی دے تقریباً 95 دن ہو گئے آئین کہندا اے 90 دن وچ الیکشن ہون گے پر نہیں ہوئے جہدا مطلب ہویا آئین ٹُٹ چکیا اے آئین تے قنون دا جنازہ اے۔ میرا خیال اے اج لئی ایناں ای کافی اے کیوں بہت سارے لوکاں نوں ایہ وی ہضم نہیں ہووے گا ہن کجھ گلاں اوہناں سرکاری ملازماں دیاں جو لمے چر توں اپنے ای افسراں دے ناروا رویاں دا شکار نیں۔ محکمہ لوکل گورنمنٹ دے کجھ افسران لمے چر توں ترقیاں دی اڈیک وچ نیں اوہناں دیاں فائلاں اک تھاں توں دوجی تھاں گردش تے ضرور کردیاں نیں پر اوہناں تے کاروائی نہیں ہو رہی ایسے طرح محکمہ تعلیم دے استاد نیں جو تقریباً 15 ورھے توں ترقیاں دی اڈیک وچ نیں تے اوہناں دی کدھرے شنوائی نہیں ہو رہی۔ پنجاب دے نگران وزیراعلیٰ محسن نقوی ایس حوالے نال بڑا کم کر رہے نیں خاص کر ساڈے سرکاری ہسپتالاں دی جو حالت ہو چکی سی اوہناں نوں ٹھیک کرن دی بھرویں کوشش کر رہے نیں روزانہ کسے نہ کسے شہر دے ہسپتال وچ جاندے نیں مریضاں نوں ملدے نیں تے سرکاری ہسپتالاں دی کارکردگی دا جائزہ لیندے ینں۔ محسن نقوی جس طرح محکمہ صحت تے دوجے اداریاں دی بہتری لئی کم کر رہے نیں اوسے طرح محکمہ تعلیم تے وی دھیان دین۔٭