اسلام آباد: محکمہ وائلڈ لائف دی کارروائی غیر قانونی شکار دے الزام وچ غیر ملکی بندہ گرفتار
اسلام آباد: مارگلہ ہلز وچ غیر قانونی شکار دے الزام وچ غیر ملکی بندہ گرفتار، وائلڈ لائف اہلکار نوں دنداں نال وڈھ لیا
اسلام آباد دی مارگلہ ہلز وچ غیر قانونی شکار دے الزام وچ اک غیر ملکی باشندے نوں گرفتار کر لیا گیا اے۔
محکمہ وائلڈ لائف دے ذرائع دے مطابق اسلام آباد وائلڈ لائف مینجمنٹ بورڈ نے کارروائی کردے ہوئے مارگلہ ہلز وچ غیر قانونی شکار دے الزام وچ اک غیر ملکی شہری نوں دبوچ لیا اے۔
ذرائع نے دسیا کہ ملزم نے نایاب نسل دے ہرن سمیت کئی جنگلی جانوراں دا شکار کیتا تے رات دیاں غماں وچ پھندے وچ پھسے جنگلی جانور نوں وڈھ ٹک کے باکس وچ پیک کیتا۔ ذرائع دا کہنا اے کہ پھندیاں دی اطلاع ملن تے اسلام آباد وائلڈ لائف مینجمنٹ بورڈ نے اک خفیہ ٹیم لائی سی، جیہنے ملزم نوں موقعے تے ای رنگے ہتھیں گرفتار کر لیا۔
ذرائع نے ہور دسیا کہ گرفتاری دے دوران ملزم نے مزاحمت کیتی تے دنداں نال وڈھ کے اک وائلڈ لائف اہلکار نوں زخمی وی کر دتا۔
ذرائع دے مطابق محکمہ وائلڈ لائف دی مدعیت وچ تھانہ کوہسار وچ 11 مئی نوں اس واقعے دا مقدمہ درج کیتا گیا سی۔ مقدمے دے متن دے مطابق سیکٹر ای سیون (E-7) دے نیڑے جنگل وچ معائنے دے دوران شکار لئی لائے گئے پھندے لبھے سن، جہاں اک ہرن پھندے وچ پھس کے مر چکا سی۔ مقدمے وچ لکھیا گیا اے کہ جانوراں دے غیر قانونی شکار وچ کجھ مقامی بندیاں دے نال غیر ملکی شہری وی رلے ہوئے نے۔
