افغانستان وچ سرکاری ملازماں تے فوجی اہلکاراں لئی اسمارٹ فونز دے استعمال اتے پابندی لا دتی گئی
افغانستان وچ سرکاری ملازماں تے مسلح افواج (فوجی) اہلکاراں نوں بدھ دے دہاڑے توں اپنے دفتراں وچ اسمارٹ فون لیاؤن توں روکن دا حکم دے دتا گیا اے۔
ایس فیصلے توں بعد کئی سرکاری اداریاں نوں متبادل ذرائع اپناؤن وچ مشکلاں دا سامنا اے، تے حکام نے واٹس ایپ دی تھاں عام موبائل کالاں دا استعمال شروع کر دتا اے۔
امریکی اخبار ’نیویارک ٹائمز‘ دے مطابق ایہ حکم افغانستان دی سپریم کورٹ ولوں جاری کیتا گیا اے پر ایہدی کوئی صاف وجہ بیان نہیں کیتی گئی۔
سرکاری نمائندیاں نے ایس معاملے اتے گل بات کرن توں گریز کیتا، پر پنج صوبیاں وچ اٹھ سرکاری ملازماں، پولیس اہلکاراں تے تعلیمی شعبے نال جڑے بندیاں نے پابندی دی تصدیق کردیاں ہویاں آکھیا کہ ایہدے اتے عملدرآمد شروع ہو چکا اے۔
اخبار دے مطابق دایکُندی صوبے دے کمیونیکیشن افسر خالد احمد فاضلی نے آکھیا کہ ’سانوں احکامات مل چکے نیں تے اوہناں اتے عملدرآمد جاری اے‘۔
اک ہور صوبائی عہدیدار تے سپریم کورٹ دے ترجمان نے وی ناں ظاہر نہ کرن دی شرط اتے ایس حکم دی تصدیق کیتی۔
آن لائن گھمن والے (گردش کرن والے) حکم نامے دے مطابق خلاف ورزی کرن والیاں دے اسمارٹ فون بھن (توڑ) دتے جان گے تے اوہناں دے خلاف کارروائی وی کیتی جائے گی۔
