“بھارت لُکیاں کاروائیاں تے پراکسی بندیاں راہیں امن خراب کر رہیا اے: وزیراعظم”
شہباز شریف دا کراچی نیول اکیڈمی وچ خطاب
کراچی: وزیراعظم شہباز شریف ہوراں آکھیا اے کہ بھارت پاکستان وچ امن تے استحکام نوں نقصان پہنچان لئی لُکے چورے ہتھکنڈیاں تے پراکسی بندیاں دے استعمال وچ مسلسل وادھا کر رہیا اے۔
پاکستان نیول اکیڈمی وچ پاسنگ آؤٹ پریڈ نال خطاب کردیاں وزیراعظم نے آکھیا کہ پاکستان ایس ویلے اندرونی تے بیرونی طور تے اوکھے سکیورٹی چیلنجز دا سامنا کر رہیا اے۔ پچھلے سال مئی دے جھیڑے وچ شرمناک ہار توں بعد چڑدے پاسے دا گوانڈھی ملک (بھارت) پاکستان دے اوکھے سوکھے کمائے ہوئے امن تے چین نوں خراب کرن لئی لُکیاں کاروائیاں تے پراکسی عناصر دا سہارا لے رہیا اے۔
دہشت گردی دا ڈٹ کے مقابلہ تے عالمی امن
وزیراعظم نے آکھیا کہ دوجے پاسے پاکستان دیاں بہادر مسلح افواج لہندے پاسے دیاں سرحداں توں بیرونی شہہ تے ہون والی دہشت گردی دا ڈٹ کے مقابلہ کر رہیاں نیں۔ پوری قوم اپنی فوج دے نال موڈھے نال موڈھا جوڑ کے کھلوتی اے تے دشمن دے ماڑے ارادیاں نوں مٹی وچ رولن لئی تیار اے۔ پر ایہدے نال نال پاکستان ساریاں رولیاں نوں مکاون لئی امن، گل بات تے سفارت کاری دی پالیسی تے وی قائم اے۔ اوہناں آکھیا کہ پاکستان کشمیریاں، غزا دے لوکاں تے فلسطینیاں دے حقِ خودارادیت تے انصاف دی حمایت دے اپنے عزم تے پکا کھلوتا اے۔
اوہناں آکھیا کہ پاکستان دنیا وچ اک امن پسند ملک لئی جانیا جاندا اے۔ بھرا تے سجن ملکاں دے تعاون تے پاکستان دی سچی ثالثی دی کوششاں پاروں امریکہ تے ایران وچکار ‘اسلام آباد مفاہمتی یادداشت’ تے تریخی دستخط ہوئے، جیہدے تے بطور ثالث اوہناں نوں وی دستخط کرن دا مان ملیا۔
وزیراعظم نے چیف آف آرمی اسٹاف فیلڈ مارشل عاصم منیر نوں خراجِ تحسین پیش کردیاں آکھیا کہ اوہناں ساریاں دھریاں نوں امن دی راہ تے لے اون لئی دن رات اک کیتا۔ ایران دے صدر مسعود پزشکیان دے پاکستان پھیرے دا ذکر کردیاں اوہناں آکھیا کہ ایہ دورہ دوہاں ملکاں دی پکی بھرا بندی دا ثبوت ہون دے نال نال خطے وچ امن لئی پاکستان دے وڈے کردار دا اعتراف وی اے۔
سمندری سلامتی تے جدید ٹیکنالوجی
وزیراعظم نے آکھیا کہ بدلدے ہوئے حالات پاروں پوری دنیا دی معیشت لئی سمندری سلامتی دی اہمیت ہور ودھ گئی اے۔ سمندراں وچ جہازاں دی ازادانہ آمدورفت ہن صرف اک سہولت نہیں بلکہ پوری دنیا دی لوڑ بن چکی اے۔ اوہناں یقین دوایا کہ حکومت پاکستان بحریہ نوں ہور مضبوط، تکڑا تے جدید دفاعی قوت بنان لئی پورا زور لائے گی۔
پاس آؤٹ ہون والے کیڈٹس نوں ودھائی دیندیاں وزیراعظم نے آکھیا کہ اوہ سخت ٹریننگ مگروں پاک بحریہ وچ بطور افسر اپنیاں ذمہ داریاں سانبھر رہے نیں۔ اوہناں تقریب وچ ترکیہ، بحرین، بنگلہ دیش، عراق، سری لنکا تے جبوتی دے جوان افسراں دی موجودگی تے خوشی دا اظہار کیتا۔ اوہناں آکھیا:
“ایہ افسر ایسے ویلے پاک بحریہ دا حصہ بن رہے نیں جدوں سمندری شعبہ تیزی نال جدید ٹیکنالوجی، مصنوعی ذہانت (آرٹیفیشل انٹیلی جنس) تے بغیر پائلٹ دے نظاماں ول ودھ رہیا اے۔”
کیڈٹس دا حوصلہ وڈھاندیاں اوہناں آکھیا:
“پدھرے تے پرسکون سمندر کدی ملاح دی پرکھ نہیں لیندے تے نہ ہی سدھیاں ہواواں کپتان دی لایقتا دا ناپ ہوندیاں نیں، بلکہ طوفانی سمندر تے تیز ہواواں ہی انسان دے حوصلے تے کردار دا اصل امتحان ہوندیاں نیں۔”
کراچی آمد
وزیراعظم آفس دے مطابق وزیراعظم شہباز شریف اج سویرے کراچی پہنچے جپھے سندھ دے گورنر نہال ہاشمی تے وزیراعلیٰ مراد علی شاہ نے اوہناں دا استقبال کیتا۔ ایس موقعے تے وزیر دفاع خواجہ آصف تے وفاقی وزیر اطلاعات عطا اللہ تارڑ بھی اوہناں دے نال سن۔
“بھارت لُکیاں کاروائیاں تے پراکسی بندیاں راہیں امن خراب کر رہیا اے: وزیراعظم”
