سر مایہ کاری نوں ودھان لئی چنگا ماحول دینا پہلی ترجیح اے، احسن اقبال

اوورسیز پاکستانی سرمایہ کاری راہیں ملک دی ترقی وچ حصہ پاؤن، شکاگو وچ خطاب

اسلام آباد (مانیٹرنگ ڈیسک)

وفاقی وزیر احسن اقبال نے شکاگو وچ اک بیٹھک نال خطاب کیتا جس وچ فارچیون 500 کمپنیاں دے پرانے وڈے افسراں، آرٹیفیشل انٹیلیجنس (مصنوعی ذہانت) دے شعبے نال جڑے منے پرمنے ماہرین، امریکی ٹیکنالوجی سرمایہ کاراں تے پاکستانی نژاد امریکی بندیاں نے شرکت کیتی۔ وفاقی وزیر نے آکھیا کہ سرمایہ کاری، کاروبار تے نویاں کاڈھاں (اختراع) نوں ودھان لئی چنگا تے سازگار ماحول دینا سرکار دی پہلی ترجیح اے۔ قومی سلامتی، اثر دار سفارت کاری تے معاشی مضبوطی وچ ملن والیاں کامیابیاں نوں پائیدار معاشی ترقی وچ بدلنا ویلے دی اہم لوڑ اے۔

سرکار نے معاشی اصلاحات راہیں ملک نوں اک واری پھر معاشی مضبوطی دے راہ تے پا دتا اے، مہنگائی وچ وڈی کمی کیتی اے تے بیاج دی شرح (شرحِ سود) وچ وی کمی نوں ممکن بنایا اے۔ سرکار نے اک پکی بنیاد دے دتی اے، ہن لوڑ اس گل دی اے کہ اوورسیز پاکستانی اپنی سرمایہ کاری، تجربے، کاروباری رابطیاں تے مہارت راہیں پاکستان دی ترقی وچ پورا حصہ پاؤن۔

شکاگو دے دورے دوران وفاقی وزیر نے یونیورسٹی آف شکاگو دے وکھو وکھ شعبیاں دے آگوآں تے ماہرین نال وکھریاں ملاقاتاں وی کیتیاں۔ پروفیسر مادھو راجن تے پروفیسر کیٹی ہیرنیاک نال ملاقات وچ اس گل تے اتفاق کیتا گیا کہ پاکستانی پڑھاکوآں (طلبہ) لئی اک سانجھا تعلیمی پروگرام شروع کیتا جائے گا، جس تھلے اوہ اپنی پڑھائی دا اک حصہ شکاگو وچ تے ریسرچ (تحقیق) دا کم پاکستان وچ پورا کرن گے۔