کراچی: سرکاری سکول دی دیوار ڈِگن نال 5 افراد جاں بحق، 2 زخمی
اورنگی ٹاؤن فٹبال چوک دے نیڑے نشئی دیوار توں سریا کڈھ رہے سن، 5 افراد جاں بحق، 2 زخمی
جاں بحق افراد وچوں 3 دی شناخت ہوگئی، حادثے دے ویلے ادارہ خالی سی، نشئی سکول دے دروازیاں تے کھڑکیاں دیاں گرلاں وی کاٹ کے لے جاندے سن، ایم پی اے دا دورہ
کراچی (سٹاف رپورٹر) کراچی دے علاقے اورنگی ٹاؤن بلاک 11 ایل فٹبال چوک دے نیڑے قائم سرکاری سکول دی دیوار ڈِگن نال 5 افراد جاں بحق، جدوں کہ 2 زخمی ہوگئے۔
پولیس دے مطابق واقعے وچ جاں بحق تے زخمی ہون والے افراد نشے دے عادی نیں۔ واقعہ اوہدوں پیش آیا جدوں نشے دے عادی افراد سکول دی دیوار توں سریا کڈھ رہے سن۔
حادثے دی اطلاع ملدیاں ہی ریسکیو رضاکار، پولیس تے رینجرز دی نفری جائے وقوع اُتے پہنچ گئی تے ملبے تھلے دبے افراد نوں کڈھن لئی ہنگامی ریسکیو آپریشن شروع کر دِتا گیا۔
جاں بحق افراد وچوں 3 دی شناخت کر لئی گئی، جنہاں وچ 22 سالہ شاہ زیب، 50 سالہ محمد علی تے 30 سالہ معین شامل نیں۔ لاشاں تے زخمیان نوں عباسی شہید ہسپتال منتقل کر دِتا گیا۔
علاقہ مکیناں دا کہنا اے کہ کے ایم سی دے زیرِانتظام چلن والے ایس سکول وچ صبح تے شام دی شفٹ وچ بچے پڑھدے نیں، تاہم حادثے دے ویلے سکول خالی سی۔ سکول دی عمارت انتہائی خستہ حال اے۔
علاقہ مکیناں نے دَسیا کہ نشے دے عادی افراد سکول دے دروازیاں تے کھڑکیاں دیاں گرلاں وی کاٹ کے لے جاندے نیں۔ ایس حوالے نال کئی وار متعلقہ محکمے نوں شکایتاں کیتیاں گئیاں، پر کوئی کارروائی نہیں ہوئی۔
رکنِ صوبائی اسمبلی اعجاز الحق نے وی جائے وقوع دا دورہ کیتا تے میڈیا نال گل کردیاں آکھیا کہ سکول دی عمارت کے ایم سی دی ملکیت اے تے عمارت تے دیواراں دی حالت بہت خراب اے۔
اوہناں سوال چکیا کہ دَسیا جاوے کے ایم سی نوں ملن والا بجٹ کتھے جاندا اے۔
اعجاز الحق دا کہنا سی کہ سکول دی خستہ حالی دا ذمہ دار کے ایم سی تے محکمہ تعلیم اے۔ جے محکمہ کم نہیں کر سکدا تے عہدیدار استعفیٰ دے دین۔
ایم پی اے نے سکول دی عمارت وچ نشے دے عادی افراد دے بیٹھن اُتے تشویش دا اظہار کردیاں آکھیا کہ پولیس دا کم اے کہ اوہ منشیات فروشی تے نشہ کرن والے افراد خلاف کارروائی کرے۔
