مریض دی نرس نال جسمانی تعلق دے دوران موت پر فیر نرس نے ایمبولینس منگوان دی بجائے کیہ کیتا؟
برطانیہ دے علاقے ویلز وچ ہسپتال نے اک نرس نوں اوس ویلے نوکری توں کڈھ دتا جدیوں ایہہ پتہ لگا کہ مرن والے مریض نال اوہدا چکر چل رہا سی تے مریض دی موت وی جسمانی تعلق دے دوران ہوئی سی۔
‘انڈیا ٹوڈے’ دی رپورٹ دے مطابق، ہسپتال دی نرس نے مرن والے بندے نال اک سال توں چل رہے تعلق دا اعتراف کر لیا اے۔ مریض دی لاش ہسپتال دی پارکنگ وچ کھڑی گڈی دی پچھلی سیٹ توں ملی تے اوس ویلے اوہدے جسم اُتے پتلون وی نہیں سی۔ نرس اُتے الزام اے کہ جدوں جسمانی تعلق دے دوران مریض دی حالت بگڑی تے اوہنے مدد لئی ایمبولینس نوں وی نہیں بلایا۔ 42 سالہ نرس دی پچھان ”پینیلوپ ولیمز“ دے ناں توں ہوئی اے۔ مریض ہسپتال وچ اپنے ڈائلیسسز لئی آؤندا سی تے اوہدی موت دل دا دورہ پین (حرکتِ قلب بند ہون) نال ہوئی۔
رپورٹ وچ ایہہ گل وی سامنے آئی اے کہ نرس دے نال کم کرن والیاں نوں ایہناں دے چکر دا پتہ سی تے اوہناں نوں خبردار وی کیتا گیا سی پر اوہ باز نہ آئی۔ جدوں میڈیکل ایمرجنسی ٹیم پارکنگ وچ پہنچی تے اوہناں نے مریض نوں بے ہوش پایا تے اوہدے جسم اُتے کپڑے وی نہیں سن۔ نرس نے نہ صرف اپنے پیشے دی حد پار کیتی بلکہ ایمبولینس نوں نہ بلا کے دوجا وڈا جرم وی کیتا۔ اوہنے ایمبولینس دی بجائے اپنے اک ساتھی نوں مدد لئی سدیا، جدوں مریض گڈی وچ ساہ توڑ رہا سی۔ نرس دا ساتھی اوہنوں بار بار ایمبولینس بلان دا کہندا رہا پر اوہنے اک نہ سنی۔
