“56 سالاں دی زنانی اپنے ای پوتے نوں جنم دے کے دادی بن گئی”
امریکہ وچ اک 56 سالہ ماں اپنی ای نونہہ (بہو) دے بچے نوں جنم دے کے دادی بن گئی اے۔ ‘ڈیلی سٹار’ دے مطابق امریکی ریاست اوٹاہ دی رہن والی ایس خاتون دا ناں نینسی ہاؤک اے۔ اوہدی 30 سالہ نونہہ کیمبریا نوں ماں بنن وچ مشکل پیش آ رہی سی، جس اُتے ڈاکٹروں نے اوہنوں ‘سروگیٹ’ (متبادل ماں) دے ذریعے بچہ حاصل کرن دا مشورہ دتا۔
کیمبریا تے اوہدے 33 سالہ شوہر جیف نے جدوں ایہہ ساری گل نینسی نوں دسی، تے اوہنے اپنے ای پتر تے نونہہ دے بچے نوں اپنے پیٹ وچ پالن تے پیدا کرن دی ذمہ داری خود چکن دا فیصلہ کر لیا۔ ڈاکٹروں نے کیمبریا تے جیف دے ذریعے ‘ایمبریو’ تیار کیتا تے اوہنوں نینسی دے رحم وچ رکھ دتا۔
نینسی نے 9 مہینے تیکر بچے نوں اپنے پیٹ وچ رکھیا تے پچھلے دناں اوہنے اک پیاری جہی پوتی نوں جنم دتا۔ رپورٹ دے مطابق بچی تے نینسی دوویں بالکل تندرست نیں۔ گھر والیاں نے بچی دا ناں ‘ہینا’ رکھیا اے۔ نینسی دا کہنا اے کہ ”اپنے پتر تے نونہہ دے بچے دی ماں بننا اک روح نوں سرور دین والا تجربہ اے۔ میں ایس انوکھے سفر دے بارے وچ اک کتاب وی لکھاں گی تاکہ لوکاں نوں ایہدے بارے پتہ لگ سکے۔“
