متحدہ عرب امارات دا نیتن یاہو دے دورے متعلق خبراں دی تردید، دعوے مسترد
متحدہ عرب امارات (UAE) نے اسرائیلی وزیراعظم دے دفتر ولوں کیتے گئے دعوے نوں جھٹھلا دتا اے، جس وچ آکھیا گیا سی کہ بنیامین نیتن یاہو نے ایران نال جنگ دے دوران لک چھپ کے امارات دا دورہ کیتا سی۔ اماراتی سرکاری خبر رساں ادارے ‘وام’ دی رپورٹ دے مطابق، یو اے ای اوہناں خبراں دی تردید کردا اے جنہاں وچ آکھیا جا رہا اے کہ اسرائیلی وزیراعظم نے کوئی دورہ کیتا یا اماراتی بھوئیں (زمین) اُتے کسی اسرائیلی فوجی وفد دا استقبال کیتا گیا۔
رپورٹ وچ واضع کیتا گیا اے کہ متحدہ عرب امارات دے اسرائیل نال تعلقات سب دے سامنے (اعلانیہ) نیں، اے تعلقات کسی لکی چھپی گل یا خفیہ انتظاماں اُتے مبنی نہیں نیں۔ ایس لئی کسی وی غیر اعلانیہ دورے دے دعوے بے بنیاد نیں، جدوں تیکر اماراتی حکومت خود تصدیق نہ کرے۔ اماراتی حکومت نے میڈیا نوں وی زور دتا اے کہ اوہ ایہو جہی غیر مصدقہ معلومات کھلارن توں پرہیز کرے تے سیاسی تاثر بنان لئی جھٹھیاں خبراں دا سہارا نہ لے۔
یاد رہے کہ اے تردید اودوں سامنے آئی اے جدوں عالمی میڈیا وچ اے خبراں چل رہیاں سن کہ نیتن یاہو نے ایران جنگ دے دوران خفیہ طور تے امارات دا دورہ کر کے صدر محمد بن زاید النہیان نال ملاقات کیتی اے۔
